Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 75: Sunnu Jọja Ẹnẹ to Babilọni

Otàn 75: Sunnu Jọja Ẹnẹ to Babilọni

AHỌLU Nẹbukadnẹzali ko bẹ Islaelivi he sewé hugan lẹpo yì Babilọni. Enẹgodo, ahọlu wá de mẹhe yọ́n dẹpẹ bosọ bí hugan lẹ sọn sunnu jọja lẹ mẹ. Sunnu jọja he hiẹ to mimọ tofi lẹ yin ẹnẹ to yé mẹ. Dopo to yé mẹ yin Daniẹli, podọ atọ̀n he pò lẹ wẹ Babilọninu lẹ nọ ylọdọ Ṣadlaki, Mẹṣaki po Abẹdinẹgo po.

Nẹbukadnẹzali basi tito nado plọnazọ́n sunnu jọja lọ lẹ nado wadevizọn to họ̀nmẹ etọn. To azọ́nplọnmẹ owhe atọ̀n tọn godo, ewọ na de mẹhe bí hugan to yé mẹ lẹ nado gọalọna ẹn nado nọ didẹ nuhahun lẹ. Ahọlu jlo dọ jọja lọ lẹ ni yin huhlọnnọ bo tindo agbasalilo dagbe to azọ́nplọnmẹ lọ whenu. Enẹwutu wẹ e degbè dọ devizọnwatọ etọn lẹ ni nọ na yemẹpo núdùdù he dojó po ovẹn dopolọ he ewọ po whẹndo etọn po nọ nù.

Daniẹli, Ṣadlaki, Mẹṣaki po Abẹdinẹgo po to zẹẹmẹ nuyise yetọn tọn basi

Pọ́n Daniẹli, sunnu jọja he to alọ de lọ. Be a yọ́n nuhe dọ e te na Aṣipenazi, ogán mẹmẹsi Nẹbukadnẹzali tọn ya? Daniẹli to didọna ẹn dọ emi ma jlo na dù núdùdù dojó lẹ sọn tafo ahọlu tọn ji gba. Ṣigba Aṣipenazi to nuhà. E dọmọ: ‘Ahọlu ko de nuhe mì na nọ dù bo na nọ nù lẹ. Podọ eyin mìwlẹ ma wá tindo agbasalilo di sunnu jọja he pò lẹ, e sọgan hù mi.’

Enẹ wẹ zọ́n bọ Daniẹli wá yì mẹgopọntọ he Aṣipenazi de nado nọ penukundo ewọ po họntọn etọn atọ̀n he pò lẹ po go dè. E dọmọ: ‘Jaale bo whlé mí pọ́n na azán 10. Nọ na mí omá nado dù podọ osin nado nù poun. Bo wá yí mí jlẹdo sunnu jọja he pò he nọ dù núdùdù ahọlu tọn lẹ go, bosọ pọ́n mẹhe na yọ́n dẹpẹ hugan.’

Mẹgopọntọ lọ yigbe nado wàmọ. Podọ to whenue azán 10 lọ lẹ pé, Daniẹli po họntọn etọn atọ̀n lẹ po tindo agbasalilo dagbe hugan sunnu jọja he pò lẹpo. Enẹwutu, mẹgopọntọ lọ jo yé do nado to omá yetọn dù kakati nido yin núdùdù ahọlu tọn lẹ.

To owhe atọ̀n lọ lẹ godo, yè bẹ yemẹpo sọyi Nẹbukadnẹzali dè. To hodidọ hẹ yemẹpo godo, ahọlu wá mọdọ Daniẹli po họntọn etọn atọ̀n lẹ po wẹ yin mẹhe bí hugan. Enẹwutu wẹ e hẹn yé dote nado gọalọna ẹn to họ̀nmẹ. Podọ whedepopenu he ahọlu kàn kanbiọ lẹ sè Daniẹli, Ṣadlaki, Mẹṣaki po Abẹdinẹgo po kavi ze nuhahun sinsinyẹn delẹ do nukọnna yé, yé nọ mọnukunnujẹemẹ whla 10 hugan depope to yẹwhenọ kavi nuyọnẹntọ etọn lẹ mẹ.

Daniẹli 1:1-21.



Kanbiọ lẹ

  • Mẹnu wẹ dẹpẹ ẹnẹ he tin to yẹdide lọ mẹ lẹ, podọ naegbọn yé do tin to Babilọni?
  • Linlẹn tẹlẹ wẹ Nẹbukadnẹzali tindo gando visunnu ẹnẹ lọ lẹ go, podọ gbedide tẹlẹ wẹ e na devizọnwatọ etọn lẹ?
  • Obiọ tẹwẹ Daniẹli basi gando dùdù po nùnù po go na ewọ po họntọn etọn atọ̀n lẹ po?
  • To omá dùdù na azán ao godo, nawẹ awusọhia Daniẹli po họntọn etọn atọ̀n lẹ po tọn te yijlẹdo jọja hatọ yetọn lẹ tọn go?
  • Nawẹ Daniẹli po họntọn etọn atọ̀n lẹ po wá tin to họ̀nmẹ ahọlu lọ tọn gbọn, podọ aliho tẹ mẹ wẹ yé hugan yẹwhenọ lẹ po nuyọnẹntọ lẹ po te?

Kanbiọ devo lẹ

  • Hia Daniẹli 1:1-21.

    Vivẹnu nankọtọn wẹ mí dona do eyin mí na nọavunte to whlepọn lẹ nukọn bo duto madogán lẹ ji? (Dan. 1:8; Gẹn. 39:7, 10; Gal. 6: 9)

    Aliho tẹlẹ mẹ wẹ jọja lẹ sọgan yin whiwhlepọn kavi yin kọgbidina nado kẹalọyi nuhe mẹdelẹ nọ pọnhlan nado yin ‘onú dojó’ lẹ te? (Dan. 1:8; Howh. 20:1; 2 Kọl. 6: 17-7:1)

    Nukunnumọjẹnumẹ tẹwẹ kandai Biblu tọn he gando jọja Heblu ẹnẹ lẹ go gọalọna mí nado tindo gando afọdidona oyọnẹn aihọn tọn go? (Dan. 1:20; Isa. 54:13; 1 Kọl. 3:18-20)