Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 74: Sunnu Adọgbotọ De

Otàn 74: Sunnu Adọgbotọ De

PỌ́N lehe gbẹtọ lẹ to sunnu jọja ehe ṣanko do. Be hiẹ yọ́n mẹhe ewọ yin ya? Jelemia wẹ. Yẹwhegán titengbe Jiwheyẹwhe tọn de wẹ ewọ yin.

Gbẹtọ lẹ to Jelemia ṣanko

To whenue Ahọlu Josia jẹ boṣiọ lẹ gbidi sọn aigba lọ ji godo, Jehovah dọna Jelemia nado lẹzun yẹwhegán Etọn. Ṣigba, Jelemia mọdọ emi yin yọpọvu gbau nado yin yẹwhegán de. Jehovah dọ dọ Emi na gọalọna ẹn.

Jelemia dọna Islaelivi lẹ nado doalọtena nuyiwa ylankan yetọn lẹ. E dọna yé dọmọ: ‘Yẹwhe lalo lẹ wẹ omẹ akọta lọ tọn lẹ to sinsẹ̀n.’ Islaelivi susu wẹ nọ sẹ̀n boṣiọ kakati dọ yé ni sẹ̀n Jiwheyẹwhe nugbo lọ Jehovah. To whenuena Jelemia dọna gbẹtọ lẹ dọ Jiwheyẹwhe na domẹplọnlọ yé go na ylanwiwa yetọn wutu, yé jẹ kikò e ji.

Owhe lẹ to yìyì. Josia wá kú, podọ osun atọ̀n to enẹgodo visunnu etọn Jehọiakimi lẹzun ahọlu. Jelemia sọ zindonukọn nado to didọna gbẹtọ lẹ dọmọ: ‘Jelusalẹm na yin vivasudo eyin mì ma diọ sọn aliho ylankan mìtọn lẹ mẹ.’ Yẹwhenọ lẹ hẹn Jelemia go bosọ dawhá dọmọ: ‘Hiẹ dona kú na onú he a dọ lẹ wutu.’ Enẹgodo yé dọna ahọvi Islaeli tọn lẹ dọmọ: ‘Jelemia dona yin hùhù na ewọ to onú agọ̀ dọ do tòdaho mítọn go wutu.’

Etẹwẹ Jelemia na wà todin? E ma dibu! E dọna yemẹpo dọmọ: ‘Jehovah wẹ do mi hlan nado dọ onú ehelẹ na mì. Eyin mìwlẹ ma diọ sọn aliho gbẹninọ tọn ylankan mìtọn lẹ mẹ, Jehovah na và Jelusalẹm sudo. Ṣigba mì ni yọnẹn dọ: Eyin mì hù mi janwẹ, be mì hù mẹhe ma waylan depope.’

Ahọvi lọ lẹ jo Jelemia do nado nọgbẹ̀, ṣigba Islaelivi lẹ ma diọ sọn aliho ylankan yetọn lẹ mẹ gba. To nukọn mẹ, Nẹbukadnẹzali, ahọlu Babilọni tọn wá bo funawhàn sọta Jelusalẹm. To godo mẹ, Nẹbukadnẹzali hẹn Islaelivi lẹ zun kanlinmọ etọn lẹ. E bẹ sunnu fọtọ́n susu sọn yé mẹ yì Babilọni. Pọ́n nuhe na yin numọtolanmẹ towe eyin mẹdelẹ wá ze we sọn owhé towe gbè yì aigba jonọ tọn de ji!

Jelemia 1:1-8; 10:1-5; 26:1-16; 2 Ahọlu lẹ 24:1-17.



Kanbiọ lẹ

  • Mẹnu wẹ dẹpẹ he tin to yẹdide lọ mẹ?
  • Etẹwẹ Jelemia lẹn gando azọ́ndenamẹ etọn nado yin yẹwhegán de go, ṣigba etẹwẹ Jehovah dọna ẹn?
  • Owẹ̀n tẹwẹ Jelemia zindonukọn nado to lilá na gbẹtọ lẹ?
  • Nawẹ yẹwhenọ lẹ tẹnpọn nado doalọtena Jelemia gbọn, ṣigba nawẹ e dohia gbọn dọ emi ma dibu?
  • Etẹwẹ jọ to whenuena Islaelivi lẹ ma diọ sọn aliho ylankan yetọn lẹ ji?

Kanbiọ devo lẹ

  • Hia Jelemia 1:1-8.

    Dile apajlẹ Jelemia tọn dohia do, etẹwẹ nọ hẹn mẹde pegan nado wà sinsẹ̀nzọn na Jehovah? (2 Kọl. 3:5, 6)

    Tulinamẹ tẹwẹ apajlẹ Jelemia tọn yin na jọja Klistiani lẹ to egbehe? (Yẹwh. 12:1; 1 Tim. 4:12)

  • Hia Jelemia 10:1-5.

    Nuyijlẹdonugo huhlọnnọ tẹwẹ Jelemia yizan nado do ovọ́-yinyin jidide zizedo boṣiọ lẹ mẹ tọn hia? (Jel. 10:5; Isa. 46:7; Hab. 2: 19)

  • Hia Jelemia 26:1-16.

    Dile pipotọ mẹyiamisisadode lẹ tọn to owẹ̀n avase tọn lọ lá to egbehe, nawẹ yé nọ flin gbedide Jehovah tọn na Jelemia ‘ma nado gbò ohó de pò do godo’ gbọn? (Jel. 26:2; Deut. 4:2; Owalọ 20:27)

    Apajlẹ dagbe tẹwẹ Jelemia zedai na Kunnudetọ Jehovah tọn lẹ to egbehe na nuhe dù avase Jehovah tọn lilá na akọta lẹ? (Jel. 26:8, 12, 14, 15; 2 Tim. 4:1-5)

  • Hia 2 Ahọlu lẹ 24:1-17.

    Kọdetọn awubla tọn tẹlẹ wẹ Juda tindo na nugbonọ-mayin etọn na Jehovah wutu? (2 Ahọ. 24:2-4, 14)