Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 73: Ahọlu Dagbe Godo Tọn to Islaeli

Otàn 73: Ahọlu Dagbe Godo Tọn to Islaeli

OWHE ṣinatọ̀n poun wẹ Josia tindo to whenuena e lẹzun ahọlu do whẹndo awe hùwaji Islaeli tọn ji. Owhe ehe whè taun na mẹde nado duahọlu. Enẹwutu, mẹhomẹ delẹ gọalọna ẹn nado dugán do akọta lọ ji to tintan whenu.

To whenue Josia yin ahọlu na owhe ṣinawe godo, e jẹ Jehovah dín ji. E hodo apajlẹ ahọlu dagbe delẹ tọn taidi Davidi, Jehọṣafati po Hẹzekia po. Podọ to whenue Josia ma tlẹ ko tindo owhe 20, e yinuwa po adọgbigbo po.

Ahọlu Josia po sunnu etọn lẹ po to boṣiọ lẹ gbà

Suhugan Islaelivi lẹ tọn yin ylanwatọ na ojlẹ dindẹn. Yẹwhe lalo lẹ wẹ yé nọ sẹ̀n. Yé nọ litaina boṣiọ lẹ. Enẹwutu wẹ Josia tọ́nyi po sunnu etọn lẹ po bo jẹ sinsẹ̀n lalo desẹ sọn otò lọ mẹ ji. Azọ́n daho de wẹ ehe, na gbẹtọ susu wẹ to yẹwhe lalo lẹ sẹ̀n wutu. Hiẹ sọgan mọ lehe Josia po sunnu etọn lẹ po to boṣiọ lẹ gbà do tofi.

To yidogọ mẹ, Josia wá de sunnu atọ̀n nado jla tẹmpli Jehovah tọn do. E ṣinyan akuẹ to gbẹtọ lẹ si bo yí na sunnu ehelẹ na yé nido suahọ na azọ́nwatọ lẹ. Dile yé to azọ́nwa to tẹmpli lọ mẹ, yẹwhenọ daho Hilkia mọ onú titengbe de to finẹ. Nulọ wẹ owe osẹ́n tọn lọ he Jehovah ko hẹn Mose nado basi kandai etọn sọn whenu dindẹn die. E ko bu sọn owhe susu die.

Owe lọ yin hinhẹn yì Josia dè, podọ e sọ biọ to yé si nado hia ẹ na ẹn. Dile Josia to todoai, e mọdọ gbẹtọ lẹ ma setonuna osẹ́n Jehovah tọn gba. E blawu taun na ehe wutu bosọ tlẹ́n awù etọn dile hiẹ sọgan mọ do to yẹdide lọ mẹ. E dọmọ: ‘Jehovah ko gblehomẹ do mí go na otọ́ mítọn lẹ ma payi osẹ́n he ko yin winwlan do owe etọn mẹ go wutu.’

Ṣafani po Ahọlu Josia po

Josia degbè na yẹwhenọ daho Hilkia nado yì dindona nuhe Jehovah na wà hẹ yé. Hilkia sọ yì yẹwhegán yọnnu Hulda dè nado yì kanbiọ ẹ. Owẹ̀n he Hulda do na ẹn sọn Jehovah dè nado yì dọna Josia die: ‘Jelusalẹm po omẹ etọn lẹpo po na yin yasana na yé sẹ̀n yẹwhe lalo lẹ bọ aigba lọ ko sọ gọ́ na ylanwiwa wutu. Ṣigba na hiẹ Josia, ko wà dagbe wutu, yasanamẹ ehe ma na wá kakajẹ okú towe godo.’

2 Otannugbo lẹ 34:1-28.



Kanbiọ lẹ

  • Owhe nẹmu wẹ Josia tindo to whenuena e lẹzun ahọlu, podọ afọdide tẹwẹ e jẹ zize ji to whenuena e duahọlu na owhe ṣinawe?
  • Etẹwẹ a mọdọ Josia to wiwà to yẹdide tintan lọ mẹ?
  • Etẹwẹ yẹwhenọ daho lọ mọ to whenuena gbẹtọ lẹ to tẹmpli lọ jlado?
  • Naegbọn Josia do tlẹ́n awù etọn?
  • Wẹndomẹ sọn Jehovah dè tẹwẹ Hulda yẹwhegán yọnnu lọ hẹnwa na Josia?

Kanbiọ devo lẹ

  • Hia 2 Otannugbo lẹ 34:1-28.

    Apajlẹ tẹwẹ Josia zedai na mẹhe sọgan ko jugbọn numimọ sinsinyẹn lẹ mẹ to ovu-whenu? (2 Otan. 33:21-25; 34:1, 2; Ps. 27: 10)

    Afọdide ayidego tọn tẹlẹ wẹ Josia ze nado dike sinsẹ̀n-bibasi nugbo ni zindonukọn to owhe 8, 12, po 18tọ gandudu etọn tọn po whenu? (2 Otan. 34:3, 8)

    Etẹwẹ apajlẹ Ahọlu Josia po Yẹwhenọ Daho Hilkia tọn po plọn mí dogbọn nukunpipedo nọtẹn sinsẹ̀n-bibasi tọn mítọn lẹ go dali? (2 Otan. 34:9-13; Howh. 11:14; 1 Kọl. 10:31)