Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 72: Jiwheyẹwhe Gọalọna Ahọlu Hẹzekia

Otàn 72: Jiwheyẹwhe Gọalọna Ahọlu Hẹzekia

BE HIẸ yọ́n nuhewutu dawe ehe do to dẹ̀ho hlan Jehovah ya? Naegbọn ewọ do bẹ wekanhlanmẹ ehelẹ do agbà Jehovah tọn nukọn? Hẹzekia wẹ dawe lọ. Ewọ wẹ yin ahọlu whẹndo awe hùwaji Islaeli tọn. Podọ nuhahun mẹ wẹ e te. Na etẹwutu?

Ahọlu Hẹzekia to dẹ̀ho

Na awhànpa Assilia tọn lẹ ko và whẹndo 10 agewaji tọn lẹ sudo. Jehovah wẹ jlo dọ ehe ni jọ na mẹhe nọ nọ̀ finẹ lẹ ylan gbau wutu. Todin, awhànpa Assilia tọn ko sọ wá nado funawhàn hẹ ahọluduta whẹndo awe tọn lọ.

Ahọlu Assilia tọn ṣẹṣẹ yí wekanhlanmẹ delẹ hlan Ahọlu Hẹzekia wẹ. Wekanhlanmẹ lọ lẹ wẹ Hẹzekia tẹ́ do Jiwheyẹwhe nukọn tofi. Yé ṣàn Jehovah ko to wekanhlanmẹ lọ lẹ mẹ bosọ biọ to Hẹzekia si nado jogbe. Enẹwutu wẹ Hẹzekia hodẹ̀ dọmọ: ‘Jehovah E, whlẹn mí sọn ahọlu Assilia tọn si. Podọ akọta lẹpo nasọ yọnẹn dọ hiẹ ṣokẹdẹ wẹ Jiwheyẹwhe.’ Be Jehovah sè odẹ̀ Hẹzekia tọn ya?

Ahọlu dagbe de wẹ Hẹzekia yin. E ma taidi ahọlu ylankan whẹndo 10 ahọluduta Islaeli tọn lẹ tọn kavi di Ahọlu ylankan Ahazi otọ́ etọn gba. Hẹzekia nọ payi nado setonuna osẹ́n Jehovah tọn lẹpo. Enẹwutu, to whenue Hẹzekia dotana dẹ̀hiho etọn godo, yẹwhegán Isaia dowẹn ehe na ẹn sọn Jehovah dè dọmọ: ‘Ahọlu Assilia tọn ma na biọ Jelusalẹm gba. Depope to awhànfuntọ etọn lẹ mẹ ma tlẹ na dọnsẹpọ ẹ. Yé ma na yìn owhán dopo tata do tòdaho lọ.’

Pọ́n yẹdide he tin to weda ehe ji. Be a yọ́n mẹhe oṣiọ awhànfuntọ ehe lẹpo yin ya? Assilianu lẹ wẹ. Jehovah do angẹli etọn hlan bọ e hù awhànfuntọ Assilianu 185 000 to ozán enẹ mẹ. Enẹwutu, ahọlu Assilia tọn jogbe bo lẹkọyi whé.

Oṣiọ awhànfuntọ Assilianu lẹ tọn

Ahọluduta whẹndo awe tọn lọ mọ whlẹngán, bọ gbẹtọ lẹ sọ nọ jijọho mẹ na ojlẹ de. Ṣigba to okú Hẹzekia tọn godo, Manassẹ visunnu etọn duahọlu. Ahọlu ylankan taun lẹ wẹ Manassẹ po visunnu etọn Amọni po. Enẹwutu, tòdaho lọ sọ gọ́ na hlọnhuhu po danuwiwa po. Whenuena Ahọlu Amọni yin hùhù gbọn devi etọn titi lẹ dali godo wẹ visunnu etọn Josia wá lẹzun ahọlu do ahọluduta whẹndo awe tọn lọ ji.

2 Ahọlu lẹ 18:1-36; 19:1-37; 21:1-25.



Kanbiọ lẹ

  • Mẹnu wẹ yin dawe he tin to yẹdide lọ mẹ, podọ naegbọn e do jẹflumẹ sọmọ?
  • Wekanhlanmẹ tẹlẹ wẹ Hẹzekia zedonukọnna Jiwheyẹwhe, podọ nawẹ Hẹzekia hodẹ̀ do?
  • Ahọlu nankọ wẹ Hẹzekia yin, podọ owẹ̀n tẹwẹ Jehovah dohlan ẹn gbọn yẹwhegán Isaia gblamẹ?
  • Dile yẹdide lọ dohia do, etẹwẹ angẹli Jehovah tọn wà na Assilianu lẹ?
  • Dile etlẹ yindọ ahọluduta whẹndo awe tọn lọ nọ jijọho mẹ na ojlẹ de, etẹwẹ jọ to okú Hẹzekia tọn godo?

Kanbiọ devo lẹ

  • Hia 2 Ahọlu lẹ 18:1-36.

    Nawẹ hoyidọtọ Assilianu lẹ tọn Labṣakẹ tẹnpọn nado hẹn yise Islaelivi lẹ tọn gbọjọ gbọn? (2 Ahọ. 18:19, 21; Eks. 5:2; Ps. 64:3)

    Eyin Kunnudetọ Jehovah tọn lẹ pehẹ agọjẹdomẹtọ lẹ, nawẹ yé nọ hodo apajlẹ Hẹzekia tọn gbọn? (2 Ahọ. 18:36; Ps. 39:1; Howh. 26:4; 2 Tim. 2:24)

  • Hia 2 Ahọlu lẹ 19:1-37.

    Nawẹ omẹ Jehovah tọn lẹ nọ hodo apajlẹ Hẹzekia tọn to ojlẹ ayimajai tọn lẹ mẹ gbọn to egbehe? (2 Ahọ. 19:1, 2; Howh. 3:5, 6; Heb. 10:24, 25; Jak. 5:14, 15)

    Awhànṣiṣi atọ̀n-to-pọmẹ tẹwẹ Ahọlu Sẹnnakelibi pehẹ, podọ mẹnu wẹ e nọtena to dọdai-liho? (2 Ahọ. 19:32, 35, 37; Osọ. 20:2, 3)

  • Hia 2 Ahọlu lẹ 21:1-6, 16.

    Naegbọn mí sọgan dọ dọ Manassẹ yin dopo to ahọlu he ylan hugan to mẹhe dugán to Jelusalẹm lẹ mẹ? (2 Otan. 33:4-6, 9)