Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 70: Jona po Whèvi Daho lọ Po

Otàn 70: Jona po Whèvi Daho lọ Po

PỌ́N dawe he to osin mẹ enẹ. Nuhahun daho de mẹ wẹ e te, kavi e ma yin mọ wẹ? Whèvi enẹ jlo na ze e mì! Be a yọ́n mẹhe dawe lọ yin ya? Jona wẹ e nọ yin. Gbọ mí ni pọ́n lehe e biọ nuhahun enẹ mẹ do.

Yẹwhegán Jehovah tọn de wẹ Jona. To okú yẹwhegán Eliṣa tọn godo, e ma dẹn bọ Jehovah dọna Jona dọmọ: ‘Fọ́n bo yì tòdaho Nineve tọn mẹ. Ylanwiwa gbẹtọ lẹ tọn ko sù gbau to finẹ, podọ yẹn jlo dọ hiẹ ni yì dowẹn ṣie na yé.’

Jona po whèvi daho lọ po

Ṣigba Jona ma jlo na yì. Enẹwutu, e yì biọ tọjihun de he jei fidevo pete gbọnvo na Nineve mẹ. Homẹ Jehovah tọn ma hùn do Jona go na e họ̀n wutu. Enẹwutu, E fọ́n yujẹhọn de dote. Jẹhọn lọ sinyẹn sọmọ bọ ohún lọ jlo na siọ. Obu daho de jẹ tọjihun-kùntọ lọ lẹ ji bọ yé sọ jẹ awhádo ji hlan yẹwhe yetọn lẹ na alọgọ.

Enẹgodo Jona dọna yé dọmọ: ‘Jehovah, Jiwheyẹwhe he dá olọn po aigba po wẹ yẹn nọ sẹ̀n. Podọ yẹn họ̀nna nuhe Jehovah dọna mi nado wà.’ Whenẹnu wẹ tọjihun-kùntọ lọ lẹ kanse dọmọ: ‘Etẹwẹ mí na wà na we na yujẹhọn lọ nido doalọte?’

Jona sọ dọmọ: ‘Mì ze mi dlan ohù mẹ, bọ ohù lọ nasọ nọ whii.’ Tọjihun-kùntọ lọ lẹ ma jlo na wàmọ, ṣigba whenuena yujẹhọn lọ to sinsinyẹn madoalọte, yé gbọ bo ze Jona dlan ohù lọ mẹ. Tlolo wẹ yujẹhọn lọ nọte bọ ohù lọ sọ nọ whii nugbo.

Dile Jona jẹ osin lọ mẹ, whèvi daho lọ ze e mì. Ṣigba e ma kú. E nọ homẹ na whèvi enẹ họ̀ okle atọ̀n ozán atọ̀n. E vẹna Jona taun dọ ewọ ma setonuna Jehovah nado yì Nineve. Todin, be a yọ́n nuhe e wà ya?

Jona biọ alọgọ Jehovah tọn to odẹ̀ mẹ. To whenẹnu wẹ Jehovah hẹn whèvi lọ nado kọ́ Jona jẹgbonu do agé. Enẹgodo wẹ Jona wá yì Nineve. Be enẹ ma plọn mí dọ nujọnu wẹ e yin nado wà nudepope he Jehovah dọna mí ya?

Owe Biblu tọn Jona.



Kanbiọ lẹ

  • Mẹnu wẹ Jona, podọ etẹwẹ Jehovah dọna ẹn nado wà?
  • Na Jona ma jlo na yì fie Jehovah do e hlan wutu, etẹwẹ e wà?
  • Etẹwẹ Jona dọna tọjihun-kùntọ lẹ dọ yé ni wà nado sọgan doalọtena jẹhọn sinsinyẹn lọ?
  • Dile hiẹ sọgan mọ do to yẹdide lọ mẹ, etẹwẹ jọ to whenuena Jona siọ biọ otọ̀ lọ mẹ?
  • Nawẹ Jona nọ homẹ na whèvi daho lọ dẹnsọ, podọ etẹwẹ e wà to finẹ?
  • Fie wẹ Jona yì to whenuena e tọ́n sọn homẹ na whèvi daho lọ godo, podọ etẹwẹ ehe plọn mí?

Kanbiọ devo lẹ

  • Hia Jona 1:1-17.

    Matin ayihaawe, etẹwẹ yin numọtolanmẹ Jona tọn gando azọ́ndenamẹ etọn nado yì dọyẹwheho na Ninevenu lẹ go? (Jona 1:2, 3; Howh. 3:7; Yẹwh. 8:12)

  • Hia Jona 2:1, 2, 10.

    Nawẹ numimọ Jona tọn na mí jide dọ Jehovah na na gblọndo odẹ̀ mítọn lẹ gbọn? (Ps. 22:24; 34:6; 1 Joh. 5:14)

  • Hia Jona 3:1-10.

    Tulinamẹ tẹwẹ mí mọyi sọn nugbo lọ mẹ dọ Jehovah zindonukọn nado to Jona yizan mahopọnna awugbopo etọn nado hẹn azọngban etọn di to tintan whenu? (Ps. 103:14; 1 Pita 5:10)

    Etẹwẹ numimọ he Jona tindo to whẹho Ninevenu lẹ tọn mẹ plọn mí gando owhẹ̀ agọ̀ didá na mẹhe tin to aigba-denamẹ mítọn ji lẹ go? (Jona 3:6-9; Yẹwh. 11:6; Owalọ 13:48)