Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 69: Viyọnnu de Gọalọna Dawe Asuka De

Otàn 69: Viyọnnu de Gọalọna Dawe Asuka De

BE HIẸ yọ́n nuhe viyọnnu pẹvi ehe to didọ ya? E to hodọna nawe enẹ gando yẹwhegán Jehovah tọn Eliṣa go, podọ gando onú jiawu he Jehovah ko gọalọna ẹn nado wà lẹ go. Nawe lọ ma yọ́n nudepope gando Jehovah go na ewọ ma yin Islaelivi de wutu. Enẹwutu, gbọ mí ni pọ́n nuhewutu viyọnnu lọ do wá to owhé nawe lọ tọn gbè.

Silianu de wẹ nawe lọ. Asu etọn nọ yin Naamani, awhàngán awhànpa Silia tọn. Silianu lẹ wẹ wle viyọnnu pẹvi Islaeli tọn ehe bo hẹn ẹn wá nado lẹzun deviyọnnu asi Naamani tọn.

Asi Naamani tọn po deviyọnnu etọn po

Naamani to azọ̀n ylankan de jẹ he yè nọ ylọdọ pòzọ̀n. Azọ̀n ehe tlẹ sọgan hẹn apadewhe agbasa mẹde tọn gble. Enẹ wẹ zọ́n bọ viyọnnu lọ dọna asi Naamani tọn dọmọ: ‘Yẹn jlo dọ ogán ṣie ni yì yẹwhegán Jehovah tọn dè to Islaeli. E nasọ hẹn pòzọ̀n etọn gbọ na ẹn.’ To nukọn mẹ, ehe wá yin didọna asu nawe lọ tọn.

Naamani jlo taun dọ azọ̀n emitọn ni gbọ; enẹwutu wẹ e de nado yì Islaeli. Whenuena e jẹ dọ́n, e yì owhé Eliṣa tọn gbè. Eliṣa sọ do devi etọn hlan ẹn nado yì dọna Naamani dọ ewọ ni yì lawu to Tọ̀sisa Jọdani mẹ whla ṣinawe. Ehe hẹn homẹgble Naamani taun, bọ e sọ dọmọ: ‘Tọ̀sisa he tin to otò ṣie mẹ lẹ yọ́n hú depope to Islaeli!’ Naamani lẹkọ to whenue e ko dọ ehe godo.

Ṣigba dopo to devi etọn lẹ mẹ dọna ẹn dọmọ: ‘Mẹdaho, eyin dọ Eliṣa dọna we nado wà nuhe sinyẹn de, hiẹ na ko wà ẹ be. Todin, etẹwutu wẹ a ma sọgan gbọ bo yì lawu lọ dile e dọ do?’ Naamani sè nuhe devi etọn dọ bo yì ylọn ede do Tọ̀sisa Jọdani mẹ whla ṣinawe. Whenuena e wàmọ, agbasa etọn sọ gọ̀ jẹgangan!

Homẹ Naamani tọn hùn taun. E lẹkọyi Eliṣa dè bo dọna ẹn dọmọ: ‘Yẹn yọnẹn nugbonugbo todin dọ Islaeli kẹdẹ wẹ Jiwheyẹwhe nugbo lọ tin te to aigba lẹpo ji. Enẹwutu, jaale bo yí nunina ehe to asi e.’ Ṣigba Eliṣa gblọn bo dọmọ: ‘Paali, yẹn ma na yí i.’ Eliṣa yọnẹn dọ e ma jẹ dọ emi ni yí nunina lọ na Jehovah wẹ hẹnazọ̀ngbọna Naamani wutu. Ṣigba devi Eliṣa tọn Gehazi jlo dọ nunina lọ ni yin emitọn.

Enẹwutu, nuhe Gehazi wà die. Whenuena Naamani ko yì godo, Gehazi họ̀nwezun nado yì plá ẹ. Gehazi sọ dọmọ: ‘Eliṣa do mi hlan nado dọna we dọ, emi ni yí pẹẹde to nunina towe lẹ mẹ na họntọn emitọn he ṣẹṣẹ wá lẹ.’ Lalo pete wẹ ehe. Ṣigba, Naamani ma yọnẹn dọ lalo wẹ ehe gba; enẹ wẹ zọ́n bọ e yí delẹ to onú lọ lẹ mẹ na Gehazi.

Whenuena Gehazi lẹkọwa whégbè, Eliṣa ko yọ́n nuhe e wà. Jehovah wẹ dọna ẹn. Enẹwutu e dọmọ: ‘Na hiẹ wà nuylankan ehe wutu, pòzọ̀n Naamani tọn na gọ̀ do dè we.’ Podọ e sọ yinmọ tlolo!

Etẹwẹ mí sọgan plọn sọn onú ehe lẹpo mẹ? Tintan, mí dona taidi viyọnnu pẹvi lọ bo nọ dọho dogbọn Jehovah dali. Ehe sọgan wà dagbe susu. Awetọ, mí ma dona yin goyitọ dile Naamani wà do to tintan whenu, ṣigba mí dona nọ setonuna devizọnwatọ Jiwheyẹwhe tọn lẹ. Podọ atọ̀ntọ, mí ma dona nọ dolalo dile Gehazi wà do. Be ehe ma dohia dọ nususu wẹ mí sọgan plọn sọn Biblu hihia mẹ ya?

2 Ahọlu lẹ 5:1-27.



Kanbiọ lẹ

  • To yẹdide lọ mẹ, etẹ dọ wẹ viyọnnu pẹvi lọ te na nawe lọ?
  • Mẹnu wẹ nawe he tin to yẹdide lọ mẹ, podọ etẹwẹ viyọnnu lọ to wiwà to owhé nawe lọ tọn gbè?
  • Etẹwẹ Eliṣa degbena devizọnwatọ etọn nado dọna Naamani, podọ etẹwutu wẹ Naamani do gblehomẹ?
  • Etẹwẹ jọ to whenuena Naamani dotoaina nuhe devizọnwatọ etọn lẹ dọna ẹn?
  • Naegbọn Eliṣa do gbẹ́ nunina Naamani tọn lẹ, ṣigba etẹwẹ Gehazi wà?
  • Etẹwẹ jọ do Gehazi go, podọ etẹwẹ mí sọgan plọn sọn ehe mẹ?

Kanbiọ devo lẹ

  • Hia 2 Ahọlu lẹ 5:1-27.

    Nawẹ apajlẹ viyọnnu Islaelivi lọ tọn sọgan na tuli jọja lẹ to egbehe gbọn? (2 Otan. 5:3; Ps. 8:2; 148:12, 13)

    Naegbọn mí dona nọ hẹn apajlẹ Naamani tọn do ayiha mẹ to whenuena mí mọ ayinamẹ sinai do Owe-wiwe ji de yí? (2 Ahọ. 5:15; Heb. 12:5, 6; Jak. 4:6)

    Etẹwẹ mí sọgan plọn sọn apajlẹ Eliṣa tọn yiyijlẹdo Gehazi tọn go mẹ? (2 Ahọ. 5:9, 10, 14-16, 20; Mat. 10:8; Owalọ 5:1-5; 2 Kọl. 2:17)

Plọnnu Dogọ

Jehovah Na Na We Adọgbigbo

Etẹwẹ sọgan gọalọna we nado gboadọ bo dọho na mẹdevo lẹ gando Jehovah go?