Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 68: Visunnu Awe He Gọwá Ogbẹ̀ Lẹ

Otàn 68: Visunnu Awe He Gọwá Ogbẹ̀ Lẹ

MÍ NI dọ dọ e wá jọ bọ a kú, nawẹ onọ̀ towe na yinuwa gbọn eyin yè hẹn we gọwá ogbẹ̀? Ayihaawe ma tin dọ e na vivi na ẹn taun! Ṣigba be mẹhe ko kú de sọgan gbẹ́ gọwá nọgbẹ̀ ya? Be enẹ ko jọ pọ́n ya?

Pọ́n dawe ehe, nawe lọ po visunnu pẹvi he tofi lọ po. Yẹwhegán Elija wẹ dawe lọ. Nawe he gbò visunnu etọn fán enẹ yin asuṣiọsi de to tòdaho Zalefati tọn mẹ. Visunnu lọ bẹ azọ̀n to gbèdopo. Azọ̀n lọ sinyẹn sọmọ bọ e wá kú. Elija sọ dọna nawe lọ dọ: ‘Ze visunnu lọ na mi.’

Elija gọna asuṣiọsi de po visunnu etọn he yin finfọnsọnku po

Elija sọ ze visunnu he kú lọ hẹaga bo ze e mlọnai do adọ́zan de ji. E sọ hodẹ̀ bo dọmọ: ‘Jehovah E, jaale bo gọ̀ visunnu lọ wá ogbẹ̀.’ Visunnu lọ sọ jẹ gbigbọ ji! Whenẹnu wẹ Elija ze ovi lọ bo hẹn ẹn jẹte wá bosọ dọna nawe lọ dọmọ: ‘Pọ́n, visunnu towe togbẹ̀!’ Enẹwutu wẹ onọ̀ lọ do to ayajẹ sọmọ.

Yẹwhegán Jehovah tọn titengbe devo sọ wẹ Eliṣa. Ewọ wẹ nọ gọalọna Elija. Ṣigba, e wá jọ bọ Jehovah yí Eliṣa lọsu zan nado wà azọ́njiawu lẹ. Eliṣa yì tòdaho Ṣunẹmi tọn mẹ to gbèdopo, fie nawe de do homẹdagbe hia ẹ te. To nukọn mẹ, nawe ehe wá ji visunnu de.

Afọnnu gbèdopo, to whenue visunnu lọ ko whẹ́n, e yì glemẹ nado gọalọna otọ́ etọn. To ajiji mẹ, visunnu lọ dawhá dọmọ: ‘Ota ṣie!’ Whenue yé ze e wá whégbè, visunnu lọ kú. Lehe onọ̀ etọn na ko blawu do sọ! E sọ tọ́n to afọdopolọji nado yì dín Eliṣa.

Whenuena Eliṣa wá, e ze ovi kúkú lọ yì abò mẹ. E hodẹ̀ hlan Jehovah bosọ dlẹn ede do oṣiọ lọ ji. To madẹnmẹ, agbasa visunnu lọ tọn sọ jẹ miyọ́n hùn ji bọ e sọ ṣìn whla ṣinawe. Lehe homẹ onọ̀ etọn tọn na ko hùn do sọ whenue e biọ họmẹ bo mọ visunnu etọn to ogbẹ̀!

Gbẹtọ susu lẹ ko kú na nugbo tọn. Ehe ko hẹn awubla susu wá na whẹndo po họntọn lẹ po. Mí ma tindo huhlọn nado fọ́n oṣiọ lẹ. Ṣigba Jehovah tindo huhlọn mọnkọ. To nukọn mẹ, mí na plọn lehe ewọ na hẹn gbẹtọ livi susu lẹ gọwá ogbẹ̀ do.

1 Ahọlu lẹ 17:8-24; 2 Ahọlu lẹ 4:8-37.


Kanbiọ lẹ

  • Mẹnu wẹ omẹ atọ̀n he tin to yẹdide lọ mẹ lẹ, podọ etẹwẹ jọ do visunnu pẹvi lọ go?
  • Odẹ̀ tẹwẹ Elija hò do ota visunnu lọ tọn mẹ, podọ etẹwẹ jọ bọdego?
  • Nawẹ alọgọtọ Elija tọn nọ yin?
  • Naegbọn Eliṣa do yin yiylọ wá owhé yọnnu de tọn gbè to Ṣunẹmi?
  • Etẹwẹ Eliṣa wà, podọ etẹwẹ jọ do ovi he ko kú lọ go?
  • Dile e yin didohia gbọn Elija po Eliṣa po gblamẹ do, huhlọn tẹwẹ Jehovah tindo?

Kanbiọ devo lẹ

  • Hia 1 Ahọlu lẹ 17:8-24.

    Nawẹ tonusise po yise Elija tọn po yin whiwhlepọn gbọn? (1 Ahọ. 17:9; 19:1-4, 10)

    Nawẹ yise asuṣiọsi Zalefati tọn lọ yin ayidego tọn gbọn? (1 Ahọ. 17:12-16; Luku 4:25, 26)

    Nawẹ numimọ asuṣiọsi Zalefati tọn lọ do nugbo-yinyin hogbe Jesu tọn he yin kinkàndai to Matiu 10:41, 42 mẹ lẹ tọn hia gbọn? (1 Ahọ. 17:10-12, 17, 23, 24)

  • Hia 2 Ahọlu lẹ 4:8-37.

    Etẹwẹ yọnnu Ṣunẹmi tọn lọ plọn mí gando johẹmẹ go? (2 Ahọ. 4:8; Luku 6:38; Lom. 12:13; 1 Joh. 3:17)

    Aliho tẹlẹ mẹ wẹ mí sọgan do homẹdagbe hia devizọnwatọ Jiwheyẹwhe tọn lẹ te to egbehe? (Owalọ 20:35; 28:1, 2; Gal. 6:9, 10; Heb. 6:10)