Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 67: Jehọṣafati Dejido Jehovah Go

Otàn 67: Jehọṣafati Dejido Jehovah Go

BE A yọ́n omẹ ehelẹ po nuhe wà yé te tofi po ya? Awhànfun gbé wẹ yé jei podọ mẹhe to nukọnna yé lẹ to hànji. Ṣigba hiẹ sọgan kanse dọ: ‘Naegbọn hànjitọ lọ lẹ ma hẹn ohí po owhán lẹ po nado funawhàn?’ Gbọ mí ni pọ́n.

Islaelivi lẹ to awhànfọ de jei awhàn

Jehọṣafati wẹ yin ahọlu na ahọluduta whẹndo awe Islaeli tọn lẹ. Ewọ nọgbẹ̀ to ojlẹ dopolọ mẹ hẹ ahọlu Ahabi po Jẹzebẹli po he dugán do ahọluduta whẹndo 10 agewaji tọn lọ ji. Ṣigba ahọlu dagbe de wẹ Jehọṣafati podọ otọ́ etọn Asa lọsu yin ahọlu dagbe de ga. Enẹ wẹ zọ́n bọ akọta ahọluduta whẹndo awe hùwaji tọn lẹ duvivi gbẹninọ dagbe de tọn na owhe susu.

Ṣigba todin nujijọ de wá dobuna akọta lọ. Wẹnsagun delẹ wá dọna Jehọṣafati dọmọ: ‘Awhànpa daho de ja sọn otò Moabi tọn, Ammọni tọn podọ sọn osó Seili ji nado wá funawhàn hẹ we.’ Islaelivi susu pli dopọ do Jelusalẹm nado biọ alọgọ Jehovah tọn. Yé biọ tẹmpli lọ mẹ bọ Jehọṣafati sọ hodẹ̀ to finẹ dọmọ: ‘Jehovah Jiwheyẹwhe mítọn E, míwlẹ ma yọ́n nuhe mí na wà. Mí ma tindo huhlọn depope to awhànpa daho ehe nukọn. Hiẹ dè wẹ mí lẹhlan na alọgọ.’

Jehovah sè bosọ de dopo to devi etọn lẹ mẹ nado dọna akọta lọ dọmọ: ‘Awhàn lọ ma yin mìtọn, Jiwheyẹwhe tọn wẹ. Mìwlẹ ma na funawhàn gba. Mì na nọ whii bo pọ́n lehe Jehovah na whlẹn mì do.’

Enẹwutu Jehọṣafati dọna akọta lọ to wunkẹngbe afọnnu dọmọ: ‘Mì dejido Jehovah go!’ Ewọ sọ yí hànjitọ lẹ donukọnna awhànfuntọ etọn lẹ, podọ dile yé to awhànfọ de mọ wẹ yé to ohàn pipà tọn ji hlan Jehovah do. Be a yọ́n nuhe jọ to whenuena yé sẹpọ awhànfuntẹn lọ ya? Jehovah ko hẹn awhànfuntọ kẹntọ lọ lẹ nado funawhàn hẹ yede. Podọ to whenuena Islaelivi lẹ jẹ dọ́n, awhànfuntọ kẹntọ lẹpo wẹ ko kú!

Be e ma yin nuyọnẹnnu wẹ e yin na Jehọṣafati nado dejido Jehovah go ya? Mílọsu na dohia dọ mí yin nuyọnẹntọ eyin mí nọ dejido Jehovah go.

1 Ahọlu lẹ 22:41-53; 2 Otannugbo lẹ 20:1-30.


Kanbiọ lẹ

  • Mẹnu wẹ Jehọṣafati, podọ ojlẹ tẹ mẹ wẹ e nọgbẹ̀ te?
  • Naegbọn Islaelivi lẹ do to budi, podọ etẹwẹ susu yetọn lẹ wà?
  • Gblọndo tẹwẹ Jehovah na odẹ̀ Jehọṣafati tọn?
  • Etẹwẹ Jehovah na dotẹnmẹ nado jọ jẹnukọnna awhàn lọ?
  • Etẹwẹ mí sọgan plọn sọn apajlẹ Jehọṣafati tọn mẹ?

Kanbiọ devo lẹ

  • Hia 2 Otannugbo lẹ 20:1-30.

    Nawẹ Jehọṣafati do nuhe devizọnwatọ nugbonọ Jiwheyẹwhe tọn lẹ dona wà to whenue yé pehẹ ninọmẹ budonamẹ tọn lẹ hia gbọn? (2 Otan. 20:12; Ps. 25:15; 62:1)

    To whenuena e yindọ Jehovah tindo aliho hodọdopọ tọn tangan de he e nọ yizan to nuyiwa etọn hẹ omẹ etọn lẹ mẹ, aliho tẹwẹ e nọ yizan to egbehe? (2 Otan. 20:14, 15; Mat. 24:45-47; Joh. 15:15)

    To whenuena Jiwheyẹwhe na bẹ “awhàn azán daho Jiwheyẹwhe Ganhunupotọ lọ tọn” jẹeji, nawẹ ninọmẹ mítọn na taidi Jehọṣafati tọn nkọ gbọn? (2 Otan. 20:15, 17; 32:8; Osọ. 16:14, 16)

    To apajlẹ Levinu lẹ tọn hihodo mẹ, adà tẹwẹ gbehosọnalitọ lẹ po mẹdehlan lẹ po nọ yiwà to azọ́n yẹwhehodidọ lẹdo aihọn pé tọn mẹ to egbehe? (2 Otan. 20:19; Lom. 10:13-15; 2 Tim. 4:2)