Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 66: Jẹzebẹli—Ahọsi Ylankan De

Otàn 66: Jẹzebẹli—Ahọsi Ylankan De

TO OKÚ Ahọlu Jeloboami tọn godo, ahọlu he dugán do whẹndo ao agewaji tọn Islaeli tọn ji lẹpo wẹ yin mẹylankan. Ahọlu Ahabi wẹ yin mẹhe ylan hugan to yé mẹ. Be a yọ́n nuhewutu wẹ ya? Whẹwhinwhẹ́n titengbe dopo wẹ yindọ asi etọn Jẹzebẹli yin Ahọsi ylankan de.

Jẹzebẹli ma yin Islaelivi de gba. Viyọnnu ahọlu Sidoni tọn wẹ e yin. Yẹwhe lalo Baali wẹ e nọ sẹ̀n, bosọ hẹn Ahabi po Islaelivi susu po nado sẹ̀n Baali ga. Jẹzebẹli gbẹwanna Jehovah bosọ hù yẹwhegán etọn susu. Yẹwhegán delẹ dona whlá yede do aigbaslo mẹ ma nado yin hùhù. Eyin nude jlo Jẹzebẹli, ewọ tlẹ sọgan hùmẹ nado mọ nulọ yí.

E wá jọ to gbèdopo bọ Ahọlu Ahabi tin to awubla mẹ taun. Jẹzebẹli sọ kanse e dọmọ: ‘Naegbọn a do blawu sọmọ to egbé?’

Ahabi sọ gblọn dọmọ: ‘Nuhe Naboti dọna mi lọ wutu wẹ. Yẹn jlo na họ̀ vẹngle etọn. Ṣigba, e dọna mi dọ emi ma na sà ẹ na mi gba.’

Jẹzebẹli dọna ẹn dọmọ: ‘Ma lẹn enẹ pọ́n blo, yẹn na yí i na we.’

Enẹwutu, Jẹzebẹli kanwehlan sunnu nukundeji delẹ to tòdaho he mẹ Naboti nọ nọ̀. E dọhlan yé dọmọ: ‘Mì bẹ sunnu hlònọ delẹ pli nado dọ dọ Naboti ko dọ danú do Jiwheyẹwhe po ahọlu po go. Enẹgodo, mì hẹn Naboti tọ́n sọn tòdaho lọ mẹ, bo dlan zannu do e na e ni kú.’

Tlolo he Jẹzebẹli sè dọ Naboti ko kú, e dọna Ahabi dọmọ: ‘Todin, yì yí vẹngle etọn.’ Be a ma mọdọ Jẹzebẹli dona jiya na danuwiwa mọnkọtọn ya?

Ahọsi Jẹzebẹli

Enẹwutu to ojlẹ de godo, Jehovah de dawe lọ Jehu nado sayana Jẹzebẹli. Whenuena Jẹzebẹli sè dọ Jehu ja, e sánudo nukun etọn lẹ bo jla ede do nado yọnwhanpẹ. Ṣigba, to whenuena Jehu wá bo mọ Jẹzebẹli to fleṣe nù, e dawhá ylọ sunnu he tin to owhé ahọlu tọn gbè lẹ dọmọ: ‘Mì ze e dlan odò!’ Sunnu lọ lẹ sọ wàmọ, dile a sọgan mọ do to yẹdide lọ mẹ. Yé ze e dlan odò bọ e sọ kú. Ehe wẹ opodo Ahọsi ylankan lọ Jẹzebẹli tọn.

1 Ahọlu lẹ 16:29-33; 18:1-4; 21:1-16; 2 Ahọlu lẹ 9:30-37.



Kanbiọ lẹ

  • Mẹnu wẹ Jẹzebẹli?
  • Naegbọn Ahọlu Ahabi do blawu to gbèdopo?
  • Etẹwẹ Jẹzebẹli wà nado hò vẹngle Naboti tọn yí na asu etọn Ahabi?
  • Mẹnu wẹ Jehovah dohlan nado sayana Jẹzebẹli?
  • Dile hiẹ sọgan mọ do to yẹdide lọ mẹ, etẹwẹ jọ to whenue Jehu jẹ họ̀nmẹ Jẹzebẹli tọn?

Kanbiọ devo lẹ

  • Hia 1 Ahọlu lẹ 16:29-33 po 18:3, 4 po.

    Nawẹ ninọmẹ lẹ ylan sọ to Islaeli to ojlẹ Ahọlu Ahabi tọn whenu? (1 Ahọ. 14:9)

  • Hia 1 Ahọlu lẹ 21:1-16.

    Nawẹ Naboti do adọgbigbo po nugbonọ-yinyin na Jehovah po hia gbọn? (1 Ahọ. 21:1-3; Lev. 25:23-28)

    Etẹwẹ mí plọn sọn apajlẹ Ahabi tọn mẹ gando lehe mí sọgan pehẹ flumẹjijẹ do go? (1 Ahọ. 21:4; Lom. 5:3-5)

  • Hia 2 Ahọlu lẹ 9:30-37.

    Etẹwẹ mí sọgan plọn sọn zohunhun Jehu tọn nado wà ojlo Jehovah tọn mẹ? (2 Ahọ. 9:4-10; 2 Kọl. 9:1, 2; 2 Tim. 4:2)

Plọnnu Dogọ

Jiwheyẹwhe de He Gbẹwanna Whẹdida Mawadodo

Yí nuplọnmẹwe ehe bo pọ́n nuhe a sọgan plọn sọn otàn Ahabi, Jezebẹli, Naboti po Elija po tọn mẹ.