Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 65: Ahọluduta lọ Yin Mimá

Otàn 65: Ahọluduta lọ Yin Mimá

BE HIẸ yọ́n nuhewutu dawe ehe do to awù etọn tlẹ́n domọ ya? Jehovah wẹ dọna ẹn dọ ni wàmọ. Yẹwhegán Jiwheyẹwhe tọn Ahija wẹ dawe ehe. Be hiẹ yọ́n mẹhe yẹwhegán de yin ya? Mẹhe Jiwheyẹwhe nọ dọ nuhe na wá jọ jẹnukọn de na wẹ yè nọ ylọdọ yẹwhegán.

Ahija po Jeloboami po

Jeloboami wẹ Ahija to hodọna tofi. Jeloboami yin dawe de he Sọlomọni de nado penukundo delẹ to azọ́n họgbigbá tọn etọn lẹ mẹ go. To whenue Ahija pé Jeloboami to aliji fi, Ahija wà nude he paṣamẹ. E de awù yọyọ etọn bo tlẹ́n ẹn do donu 12. E dọna Jeloboami dọmọ: ‘Yí donu 10 na dewe.’ Be hiẹ yọ́n nuhewutu Ahija do yí donu 10 na Jeloboami ya?

Ahija basi zẹẹmẹ dọ Jehovah jlo na yí ahọluduta lọ sọn Sọlomọni si. E dọ dọ Jehovah na yí whẹndo 10 na Jeloboami. Ehe zẹẹmẹdo dọ whẹndo awe gee ji wẹ visunnu Sọlomọni tọn Lehoboami na dugán do.

Whenuena Sọlomọni sè nuhe Ahija dọna Jeloboami, homẹgble e taun. E tẹnpọn nado hù Jeloboami. Ṣigba Jeloboami họnyi Egipti. To ojlẹ vude godo Sọlomọni kú. Ewọ duahọlu na owhe 40 bọ visunnu etọn Lehoboami sọ lẹzun ahọlu todin. Egipti wẹ Jeloboami sè te dọ Sọlomọni ko kú, enẹwutu wẹ e lẹkọwa Islaeli.

Lehoboami ma yin ahọlu dagbe de gba. Ewọ tlẹ sọ yinuwa po kanyinylan po hẹ gbẹtọ lẹ hugan lehe otọ́ etọn Sọlomọni wà do. Jeloboami po sunnu nukundeji devo lẹ po yì Ahọlu Lehoboami dè bo biọ to e si nado do homẹdagbe hia gbẹtọ lẹ. Ṣigba Lehoboami ma sè. Nado dọ hójọhó, e tlẹ sọ yidogọna kanyinylan etọn wẹ. Enẹwutu wẹ gbẹtọ lẹ yí Jeloboami do basi ahọlu do whẹndo 10 lọ lẹ ji, ṣigba whẹndo awe he yin Bẹnjamini po Juda po tọn wẹ nọ gandudu Lehoboami tọn glọ.

Jeloboami ma jlo dọ omẹ etọn lẹ ni nọ yì Jelusalẹm nado yì sẹ̀n Jehovah to tẹmpli mẹ gba. Enẹwutu wẹ e basi oyìnvu sika tọn awe bosọ hẹn mẹhe tin to ahọluduta whẹndo 10 tọn lọ mẹ lẹ nado nọ sẹ̀n yé. E ma dẹn bọ hlọnhuhu po danuwiwa po sọ gbayipe to aigba lọ ji.

Ahọluduta whẹndo awe tọn lọ lẹ lọsu tin to nuhahun mẹ. To nuhe ma pé owhe atọ́n sọn whenue Lehoboami lẹzun ahọlu godo, ahọlu Egipti tọn wá nado funawhàn sọta Jelusalẹm. E bẹ adọkunnu susu lẹ yì sọn tẹmpli Jehovah tọn mẹ. Enẹwutu, ojlẹ vude poun janwẹ tẹmpli lọ do gbọṣi lehe e te do to whenue e yin gbigbá.

1 Ahọlu lẹ 11:26-43; 12:1-33; 14:21-31.



Kanbiọ lẹ

  • Nawẹ dawe awe he tin to yẹdide lọ mẹ lẹ nọ yin, podọ mẹnu wẹ yé yin?
  • Etẹwẹ Ahija wà po awù he to okọ̀ na ẹn po, podọ etẹwẹ nuyiwa enẹ zẹẹmẹdo?
  • Etẹwẹ Sọlomọni tẹnpọn nado wà na Jeloboami?
  • Naegbọn gbẹtọ lẹ do yí Jeloboami do doahọlu do whẹndo ao ji?
  • Naegbọn Jeloboami do basi oyìnvu sika tọn awe, podọ etẹwẹ gbayipe to aigba lọ ji to ojlẹ vude godo?
  • Etẹwẹ jọ do ahọluduta whẹndo awe tọn lọ po tẹmpli Jehovah tọn po go to Jelusalẹm?

Kanbiọ devo lẹ

  • Hia 1 Otannugbo lẹ 11:26-43.

    Omẹ nankọ wẹ Jeloboami yin, podọ opagbe tẹwẹ Jehovah do na ẹn eyin e yìn osẹ́n Jiwheyẹwhe tọn lẹ? (1 Ahọ. 11:28, 38)

  • Hia 1 Otannugbo lẹ 12:1-33.

    Etẹwẹ mẹjitọ lẹ po mẹho agun tọn lẹ sọgan plọn sọn apajlẹ ylankan Lehoboami tọn mẹ gando aṣẹpipa ṣiṣizan go? (1 Ahọ. 12:13; Yẹwh. 7:7; 1 Pita 5:2, 3)

    Mẹnu wẹ jọja lẹ dona nọ lẹhlan na ayinamẹ dejidego lẹ to whenuena yé pannukọn nudide gbẹzan tọn sinsinyẹn lẹ? (1 Ahọ. 12:6, 7; Howh. 1:8, 9; 2 Tim. 3:16, 17; Heb. 13:7)

    Etẹwẹ sisẹ́ Jeloboami nado do nọtẹn awe ai na sinsẹ̀n-bibasi oyìnvu tọn, podọ nawẹ ehe do yise matindo sinsinyẹn to Jehovah mẹ hia gbọn? (1 Ahọ. 11:37; 12:26-28)

    Mẹnu wẹ dọ̀n omẹ ahọluduta whẹndo ao tọn lọ lẹ biọ atẹṣiṣi sọta sinsẹ̀n-bibasi nugbo mẹ? (1 Ahọ. 12:32, 33)