Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 64: Sọlomọni Gbá Tẹmpli Lọ

Otàn 64: Sọlomọni Gbá Tẹmpli Lọ

WHẸPO Davidi do kú, e yí tito he Jehovah wleawu etọn dai lẹ nado gbá tẹmpli etọn na Sọlomọni. To owhe ẹnẹtọ gandudu Sọlomọni tọn mẹ, e jẹ tẹmpli lọ gbá ji, ehe yí owhe ṣinawe-daa. Gbẹtọ fọtọ́n donu ao ao lẹ wẹ wazọ́n to tẹmpli lọ kọ̀n, podọ mọ wẹ akuẹ he e biọ nado gbá ẹ lọ sú taun do niyẹn. Ehe yinmọ na sika po fataka susu lẹ po wẹ yin yiyizan do e go.

Tẹmpli lọ tindo abò titengbe awe kẹdẹdile e te do to gòhọtúntún lọ mẹ. Ṣigba abò lọ lẹ klo whla awe hugan gòhọtúntún lọ tọn lẹ. Sọlomọni ze aki alẹnu tọn lọ do abò homẹ tọn tẹmpli lọ tọn mẹ, podọ onú devo he nọ nọ̀ gòhọtúntún lọ mẹ lẹ wẹ yin zizedo abò awetọ lọ mẹ.

Whenuena tẹmpli lọ yin tadona, yé basi hùnwhẹ daho de. Sọlomọni jẹklo to tẹmpli lọ nukọn bo hodẹ̀, dile a sọgan mọ ẹn do to yẹdide lọ mẹ. Sọlomọni dọna Jehovah dọmọ: ‘Olọn lẹpo pete ma sọgan hẹn we, lehe tẹmpli ehe whè do sọ nado hẹn we. Ṣigba, Jiwheyẹwhe ṣie E, jaale nọ dotoai hlan omẹ towe lẹ whenue yé pannukọn nọtẹn ehe nado hodẹ̀ hlan we.’

Ahọlu Sọlomọni to dẹ̀ho

Whenuena Sọlomọni dotana odẹ̀ etọn wẹ miyọ́n sọ jẹte sọn olọn mẹ wá. E fiọ avọ́sinsan kanlin tọn he yé ko basi lẹ. Podọ hinhọ́n de wá sọn Jehovah dè bo gọ́ tẹmpli lọ mẹ. Ehe dohia dọ Jehovah to todoai bosọ hùnhomẹ do tẹmpli lọ po odẹ̀ Sọlomọni tọn po go. Tẹmpli lọ mẹ wẹ gbẹtọ lẹ nọ wá basi sinsẹ̀n te todin kakati nido yin gòhọtúntún lọ mẹ.

Sọlomọni dugán po nuyọnẹn po na whenu dindẹn bọ homẹ gbẹtọ lẹ tọn sọ hùn. Ṣigba Sọlomọni dà yọnnu susu he ma nọ sẹ̀n Jehovah delẹ sọn otò devo lẹ mẹ. Be hiẹ ma mọ dopo to yé mẹ he to boṣiọ sẹ̀n ya? To godo mẹ, asi Sọlomọni tọn lẹ wá hẹn ẹn nado yì sẹ̀n yẹwhe devo lẹ ga. Be a yọ́n nuhe jọ to whenue Sọlomọni wà ehe ya? E masọ nọ do homẹdagbe hia gbẹtọ lẹ ba. E lẹzun kanylantọ, bọ gbẹtọ lẹ masọ tindo ayajẹ ba.

Ahọlu Sọlomọni to boṣiọ de sẹ̀n

Ehe hẹn Jehovah gblehomẹ do Sọlomọni go bọ e sọ dọna ẹn dọmọ: ‘Yẹn na yí ahọluduta lọ sọn asi we bo yí i na mẹdevo. Yẹn ma na wà ehe to gbẹwhenu towe gba ṣigba to gandudu visunnu towe tọn whenu. Yẹn ma na yí mẹhe tin to ahọluduta lọ glọ lẹpo to visunnu towe si.’ Gbọ mí ni pọ́n lehe enẹ jọ do.

1 Otannugbo lẹ 28:9-21; 29:1-9; 1 Ahọlu lẹ 5:1-18; 2 Otannugbo lẹ 6:12-42; 7:1-5; 1 Ahọlu lẹ 11:9-13.



Kanbiọ lẹ

  • Ojlẹ nẹmu wẹ e yí to Sọlomọni si nado fó tẹmpli Jehovah tọn gbigbá, podọ naegbọn e do biọ akuẹ susu sọmọ?
  • Abò titengbe nẹmu wẹ tin to tẹmpli lọ mẹ, podọ etẹwẹ yin zizedo abò homẹ tọn lọ mẹ?
  • Etẹwẹ Sọlomọni dọ to odẹ̀ mẹ to whenue tẹmpli lọ yin tadona?
  • Nawẹ Jehovah dohia gbọn dọ emi kẹalọyi odẹ̀ Sọlomọni tọn?
  • Etẹwẹ asi Sọlomọni tọn lẹ hẹn ẹn nado wà, podọ etẹwẹ jọ do Sọlomọni go?
  • Naegbọn Jehovah do gblehomẹ do Sọlomọni go, podọ etẹwẹ Jehovah dọna ẹn?

Kanbiọ devo lẹ

  • Hia 1 Otannugbo lẹ 28:9, 10.

    Sọgbe hẹ hogbe Davidi tọn he yin kinkàndai to 1 Otannugbo lẹ 28:9, 10 mẹ lẹ, etẹwẹ mí dona dovivẹnu nado nọ wà to gbẹzan egbesọegbesọ tọn mítọn mẹ? (Ps. 19:14; Flp. 4:8, 9)

  • Hia 2 Otannugbo lẹ 6:12-21, 32-42.

    Nawẹ Sọlomọni dohia dọ ohọ̀ he gbẹtọ gbá depope ma sọgan hẹn Jiwheyẹwhe Ganhunupotọ lọ gbọn? (2 Otan. 6:18; Owalọ 17:24, 25)

    Etẹwẹ hogbe Sọlomọni tọn he tin to 2 Otannugbo lẹ 6:32, 33 mẹ lẹ dohia gando Jehovah go? (Owalọ 10:34, 35; Gal. 2:6)

  • Hia 2 Otannugbo lẹ 7:1-5.

    Kẹdẹdile ovi Islaeli tọn lẹ yin whinwhàn nado pagigona Jehovah to whenuena yé mọ gigo etọn do, nawẹ ehe dona yinuwado mí ji to whenuena mí lẹnnupọndo dona he Jehovah nọ kọ̀n do omẹ etọn lẹ ji to egbehe gbọn? (2 Otan. 7:3; Ps. 22:22; 34:1; 96:2)

  • Hia 1 Ahọlu lẹ 11:9-13.

    Nawẹ aliho gbẹninọ tọn Sọlomọni tọn dohia dọ nujọnu wẹ e yin nado gbọṣi nugbonọ-yinyin mẹ kakajẹ opodo gbọn? (1 Ahọ. 11:4, 9; Mat. 10:22; Osọ. 2:10)

Plọnnu Dogọ

Tẹmpli He Sọlomọni Gbá

Pọ́n 14 to adà ayidego tọn etọn lẹ mẹ.