Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 63: Sọlomọni—Ahọlu Nuyọnẹntọ De

Otàn 63: Sọlomọni—Ahọlu Nuyọnẹntọ De

SỌLOMỌNI ma ko tindo owhe 20 to whenuena e duahọlu. E yiwanna Jehovah bosọ hodo ayinamẹ dagbe he otọ́ etọn Davidi na ẹn lẹ. Homẹ Jehovah tọn hùn do Sọlomọni go bọ ewọ sọ dọna ẹn to odlọ de mẹ to ozán mẹ dọmọ: ‘Sọlomọni, etẹ a jlo yẹn ni na we?’

Sọlomọni sọ gblọn dọmọ: ‘Jehovah Jiwheyẹwhe ṣie, yọpọvu pete de wẹ yẹn podọ yẹn masọ yọ́n lehe yẹn na dugán do. Enẹwutu na mi nuyọnẹn nado duahọlu do omẹ towe lẹ ji dile e jẹ do.’

Homẹ Jehovah tọn hùn do Sọlomọni go taun na nuhe e biọ wutu. E sọ dọna ẹn dọmọ: ‘Na nuyọnẹn wẹ hiẹ biọ kakati nido yin ogbẹ̀ gaa kavi adọkun lẹ, yẹn na na we nuyọnẹn susu hugan mẹdepope he ko nọgbẹ̀ pọ́n. Podọ yẹn nasọ na we nuhe hiẹ ma tlẹ biọ lẹ, adọkun po gigo po.’

To ojlẹ vude godo nawe awe delẹ wá Sọlomọni dè po nuhahun sinsinyẹn de po. Dopo to yé mẹ dọmọ: ‘Owhé dopolọ gbè wẹ yẹn po nawe ehe po nọ nọ̀. Yẹn ji visunnu de, to azán awe godo, ewọ lọsu sọ ji visunnu de. Enẹgodo, visunnu etọn kú to zánmẹ gbèdopo. Ṣigba, whenue yẹn to amlọn mẹ, e ze ovi kúkú etọn do wá diọ ṣie. Whenue yẹn fọ́n bo mọ ovi kúkú lọ, yẹn mọdọ e ma yin ṣie.’

To whenẹnu wẹ nawe awetọ dọ dọ: ‘Lalo wẹ! Ovi he to ogbẹ̀ lọ wẹ yin ṣie, kúkú lọ wẹ ewọ tọn!’ Nawe tintan lọsu sọ gblọn dọmọ: ‘Lalo! Towe wẹ ovi kúkú lọ, bọ ṣie wẹ yin dehe to ogbẹ̀ lọ!’ Mọ wẹ nawe lọ lẹ to núdọ̀n do niyẹn. Etẹwẹ Sọlomọni na wà todin?

E biọ ohí de, podọ whenuena yè yí i wá, e dọmọ: ‘Má ovi gbẹ̀te lọ do awe bo yí odaa na dopodopo yetọn.’

Mẹhe tọn ovi lọ yin nugbonugbo lọ sọ dawhá dọmọ: ‘Mì jaale bo ma hù ovi lọ blo. Mì ze e jo na ẹn!’ Ṣigba nawe awetọ lọ dọmọ: ‘Mì yí i na depope mítọn blo; mì má ẹn do awe.’

Ahọlu Sọlomọni to whẹho sinsinyẹn de didẹ

To godo mẹ, Sọlomọni dọmọ: ‘A hù ovi lọ blo! Ze e na nawe tintan lọ. Ewọ wẹ yin onọ̀ ovi lọ tọn nugbo.’ Sọlomọni yọ́n ehe na mẹhe yin onọ̀ nugbo ovi lọ tọn yiwanna ovi etọn sọmọ bọ e jlo nado ze e na nawe awetọ lọ na yé nikaa hù i. Whenuena gbẹtọ lẹ sè lehe Sọlomọni didẹ nuhahun ehe do, homẹ yetọn hùn nado tindo ahọlu nuyọnẹntọ mọnkọtọn.

To gandudu Sọlomọni tọn whenu, Jiwheyẹwhe dona akọta lọ gbọn aigba lọ hinhẹn nado de likun, ovò-sinsẹ́n, sinsẹ́n balle tọn, po núdùdù devo lẹ po tọ́n dali. Gbẹtọ lẹ nọ dó awù dagbe lẹ bo nọ nọ̀ owhé whanpẹnọ lẹ gbè. Onú dagbe susu lẹ tin na mẹlẹpo.

1 Ahọlu lẹ 3:3-28; 4:29-34.



Kanbiọ lẹ

  • Etẹwẹ Jehovah kanse Sọlomọni, podọ nawẹ e gblọn dọ?
  • Na homẹ Jehovah tọn hùn na nuhe Sọlomọni biọ wutu, etẹwẹ e dopagbe nado na ẹn?
  • Whẹho sinsinyẹn tẹwẹ nawe awe delẹ hẹnwa Sọlomọni dè?
  • Dile e yin didohia do to yẹdide lọ mẹ, nawẹ Sọlomọni didẹ nuhahun lọ gbọn?
  • Etẹwẹ yin ninọmẹ lẹ to gandudu Sọlomọni tọn glọ, podọ etẹwutu?

Kanbiọ devo lẹ

  • Hia 1 Ahọlu lẹ 3:3-28.

    Etẹwẹ sunnu he tindo azọngban to titobasinanu Jiwheyẹwhe tọn mẹ to egbehe lẹ sọgan plọn sọn hogbe ahundopo tọn Sọlomọni tọn he tin to 1 Ahọlu lẹ 3:7 mẹ? (Ps. 119:105; Howh. 3:5, 6)

    Nawẹ obiọ Sọlomọni tọn yin apajlẹ dagbe nuhe sọgbe nado yin bibiọ to odẹ̀ mẹ lẹ tọn gbọn? (1 Ahọ. 3:9, 11; Howh. 30:8, 9; 1 Joh. 5:14)

    Jidide tẹwẹ aliho he mẹ Sọlomọni didẹ whẹho he fọndote to nawe awe lọ lẹ ṣẹnṣẹn te na mí gando gandudu sọgodo tọn Sọlomọni Daho lọ, Jesu Klisti tọn go? (1 Ahọ. 3:28; Isa. 9:6, 7; 11:2-4)

  • Hia 1 Ahọlu lẹ 4:29-34.

    Nawẹ Jehovah na gblọndo obiọ he Sọlomọni basi nado sọgan tindo ahun tonusise tọn de gbọn? (1 Ahọ. 4:29)

    Eyin mí pọ́n lehe gbẹtọ lẹ dovivẹnu nado wá sè nuyọnẹn Sọlomọni tọn do, etẹwẹ dona yin walọ mítọn gando Ohó Jiwheyẹwhe tọn pinplọn go? (1 Ahọ. 4:29, 34; Joh. 17:3; 2 Tim. 3:16)