Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 62: Tukla to Owhé Davidi Tọn Gbè

Otàn 62: Tukla to Owhé Davidi Tọn Gbè

TO WHENUE Davidi jẹ gandu ji to Jelusalẹm godo, Jehovah dike bọ awhànpa etọn gbawhàn susu to kẹntọ yetọn lẹ ji. Jehovah ko dopagbe nado na aigba Kenani tọn Islaelivi lẹ. Podọ todin, Jehovah gọalọna yé nado mọ aigba he ewọ dopagbe etọn na yé lẹpo yí.

Ahọlu dagbe de wẹ Davidi yin. E yiwanna Jehovah. Enẹwutu, dopo to onú tintan he e wà to whenue e ko yí Jelusalẹm godo lẹ mẹ wẹ nado hẹn aki alẹnu tọn Jehovah tọn lọ wá finẹ. Podọ ewọ jlo nado gbá tẹmpli de he mẹ e na ze e do.

To whenue Davidi whẹ́n mẹho, e wà ylando sinsinyẹn de. Davidi yọnẹn dọ nuylankan wẹ e yin nado yí nuhe yin mẹdevo tọn. Ṣigba to whèjai dopo, whenuena e tin to aga ohọ̀ etọn tọn, e pọ́n odò hlan bo mọ yọnnu whanpẹnọ de. Yinkọ etọn wẹ Bati-ṣeba, podọ asu etọn Ulia yin dopo to awhànfuntọ Davidi tọn lẹ mẹ.

Davidi tindo ojlo to Bati-ṣeba mẹ sọmọ bọ e hẹn ẹn wá owhé etọn gbè. Asu etọn tin to awhàngbenu to whelọnu. Davidi sọ zanhẹ yọnnu lọ podọ to godo mẹ e wá mọdọ e ko mọhò. Ahun Davidi tọn gbàdo taun bọ e dowẹn hlan awhàngán Joabi nado ze Ulia do nukọn to awhàn lọ mẹ fihe ewọ na yin hùhù te. Whenuena Ulia kú godo, Davidi wlealọ hẹ Bati-ṣeba.

Homẹgble Jehovah do Davidi go taun. Enẹwutu, e do devizọnwatọ etọn Natani hlan nado yì dọhona Davidi gando ylando etọn lẹ go. Hiẹ sọgan mọ Natani to hodọna Davidi to finẹ. E wá vẹna Davidi taun dọ e ko ṣinuwa, enẹwutu wẹ Jehovah ma do hù i. Ṣigba, Jehovah dọna ẹn dọmọ: ‘Na hiẹ ko wà onú ylankan ehelẹ wutu, hiẹ na mọ tukla susu to owhé towe gbè.’ Podọ tukla Davidi tọn lẹ sù nugbo.

Natani to ayinamẹ na Davidi

Tintan whẹ́, visunnu he Bati-ṣeba ji lọ kú. Bọdo enẹ go, Ammọni viplọnji Davidi tọn zanhẹ nọviyọnnu etọn Tamali gánnugánnu. Absalọmi visunnu Davidi tọn gblehomẹ na ehe wutu sọmọ bọ e hù Ammọni. Enẹgodo, Absalọmi mọ nukundagbe gbẹtọ susu tọn bosọ yí ede do doahọlu. To godo mẹ, Davidi duto awhàn lọ ji bọ Absalọmi yin hùhù. Mọ wẹ Davidi tindo tukla susu do niyẹn.

To gblagbla enẹ mẹ, Bati-ṣeba wá ji visunnu de he nọ yin Sọlomọni. To whenue Davidi ko poyọnho bosọ to awutu jẹ, visunnu etọn Adonija sọ tẹnpọn nado yí ede do doahọlu. Enẹwutu wẹ Davidi dọna yẹwhenọ Zadọki nado kọ̀n amisisa do ota na Sọlomọni nado dohia dọ Sọlomọni wẹ na wá yin ahọlu lọ. To madẹnmẹ, Davidi kú to whenue e tindo owhe 70. E duahọlu na owhe 40, ṣigba todin, Sọlomọni wẹ lẹzun ahọlu Islaeli tọn.

2 Samuẹli 11:1-27; 12:1-18; 1 Ahọlu lẹ 1:1-48.



Kanbiọ lẹ

  • Po alọgọ Jehovah tọn po, etẹwẹ wá jọ do aigba Kenani tọn go to godo mẹ?
  • Etẹwẹ jọ to whèjai dopo to whenuena Davidi tin to aga to họ̀nmẹ etọn?
  • Naegbọn Jehovah do gblehomẹ do Davidi go sinsinyẹn?
  • To yẹdide lọ mẹ, mẹnu wẹ Jehovah dohlan Davidi dè nado dọ ylando etọn na ẹn, podọ etẹwẹ dawe ehe dọ e na jọ do Davidi go?
  • Tukla tẹlẹ wẹ Davidi tindo?
  • Mẹnu wẹ lẹzun Ahọlu Islaeli tọn bọdo Davidi go?

Kanbiọ devo lẹ

  • Hia 2 Samuẹli 11:1-27.

    Nawẹ alọnu hinhẹn ján to sinsẹ̀nzọn Jehovah tọn mẹ nọ yin hihọ́ na mí gbọn?

    Nawẹ Davidi jẹ ylando mẹ gbọn, podọ avase tẹwẹ ehe yin na devizọnwatọ Jehovah tọn lẹ to egbehe? (2 Sam. 11:2; Mat. 5:27-29; 1 Kọl. 10:12; Jak. 1:14, 15)

  • Hia 2 Samuẹli 12:1-18.

    Etẹwẹ mẹho lẹ po mẹjitọ lẹ po sọgan plọn sọn aliho he mẹ Natani dọnsẹpọ Davidi nado na ẹn ayinamẹ te mẹ? (2 Sam. 12:1-4; Howh. 12:18; Mat. 13:34)

    Naegbọn Jehovah do do lẹblanu hia Davidi? (2 Sam. 12:13; Ps. 32:5; 2 Kọl. 7:9, 10)