Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 61: Davidi Duahọlu

Otàn 61: Davidi Duahọlu

SAULI sọ tẹnpọn nado wle Davidi whladopo dogọ. E ṣinyan 3 000 to awhànfuntọ dagbe hugan etọn lẹ mẹ bo jẹ dindin in pé ji. Whenuena Davidi sè enẹ, e do amẹ́ lẹ hlan nado yì dindona fie Sauli po sunnu etọn lẹ po whèsla do to ozán lọ mẹ. Whenẹnu wẹ Davidi kanbiọ awe to sunnu etọn lẹ mẹ dọmọ: ‘Mẹnu to mì mẹ wẹ na yì osla Sauli tọn mẹ hẹ mi?’

Davidi to Ahọlu Sauli ylọ

Abiṣai sọ gblọn bo dọmọ: ‘Yẹn na yì hẹ we.’ Abiṣai yin visunnu Zeluia, nọviyọnnu Davidi tọn. Whenuena Sauli po sunnu etọn lẹ po to amlọndọ, Davidi po Abiṣai po zọ̀n dẹẹdẹ biọ osla lọ mẹ. Yé ze owhán po osin-go Sauli tọn po, he tin to taligbé na ẹn. Mẹdepope ma mọ yé kavi sè ogbè yetọn na yemẹpo tin to amlọn yìkànmẹ de mẹ wutu.

Pọ́n Davidi po Abiṣai po todin. Yé ko tọ́nyi sọn finẹ bo tin to hihọ́ glọ to aga osó de tọn. Davidi sọ dawhá hlan awhàngán awhànpa Islaeli tọn dọmọ: ‘Abneli, etẹwutu wẹ hiẹ ma do họ́ ogán towe, ahọlu lọ? Pọ́n! Fie wẹ owhán po osin-go etọn po tin te?’

Sauli fọ́n. Ewọ sọ yọ́n ogbè Davidi tọn bo kanse dọmọ: ‘Davidi, hiẹ wẹ ya?’ Be a mọ Sauli po Abneli po to odò finẹ ya?

Davidi sọ gblọn bo dọmọ: ‘Mọwẹ, klunọ ṣie ahọlu.’ Davidi sọ kanbiọ dọmọ: ‘Etẹwutu wẹ hiẹ to tintẹnpọn nado wle mi? Oylan tẹwẹ yẹn ko wà? Ahọlu E, owhán towe die. Gbọ na dopo to sunnu towe lẹ mẹ ni wá nado yí i.’

Ahọlu Sauli po Abneli po

Sauli yigbe dọ: ‘Yẹn ko waylando. Yẹn yinuwa di nulunọ.’ Enẹgodo wẹ Davidi wle ali etọn bo yì bọ Sauli sọ lẹkọ dedo owhé etọn gbè. Ṣigba Davidi lẹn to ede mẹ dọmọ: ‘Sauli na wá hù mi gbèdopo. Yẹn dona họnyi aigba Filistininu lẹ tọn ji.’ Mọ wẹ e sọ wà. Davidi penugo nado klọ Filistininu lẹ bo hẹn yé yise dọ emi tin to adà yetọn mẹ todin.

To ojlẹ vude godo, Filistininu lẹ fọ́n nado funawhàn hẹ Islaeli. To awhàn lọ whenu, yé hù Sauli po Jonatani po. Ehe hẹn awubla daho de wá na Davidi bọ e sọ ji ohàn dagbedagbe de he mẹ e dọ dọ: ‘Awubla mi susu na towe tọn wutu, Jonatani nọvisunnu ṣie. Lehe hiẹ yin mẹvivẹ na mi do sọ!’

Enẹgodo, Davidi lẹkọwa Islaeli to tòdaho Heblọni tọn mẹ. Awhàn de sọ fọ́n to sunnu he de visunnu Sauli tọn Iṣi-boṣẹti di ahọlu lẹ po mẹhe jlo dọ Davidi ni yin ahọlu lẹ po ṣẹnṣẹn. Ṣigba to godo mẹ, omẹ Davidi tọn lẹ gbawhàn. Owhe 30 wẹ Davidi tindo to whenuena yè yí i do doahọlu. Na owhe ṣinawe-daa wẹ e do duahọlu to Heblọni. Delẹ to visunnu he yin jiji na ẹn lẹ mẹ wẹ Ammọni, Absalọmi po Adonija po.

Ojlẹ lọ wá bọ Davidi po sunnu etọn lẹ po yì nado gbawhàn tòdaho whanpẹnọ de tọn he nọ yin Jelusalẹm. Joabi, visunnu devo nọviyọnnu Davidi tọn Zeluia, wẹ yin nukọntọ to awhàn lọ mẹ. Davidi suahọ Joabi gbọn yíyí i do basi awhàngán awhànpa etọn tọn dali. Todin, Davidi jẹ gandu ji do tòdaho Jelusalẹm tọn ji.

1 Samuẹli 26:1-25; 27:1-7; 31:1-6; 2 Samuẹli 1:26; 3:1-21; 5:1-10; 1 Otannugbo lẹ 11:1-9.



Kanbiọ lẹ

  • Etẹwẹ Davidi po Abiṣai po wà to whenuena Sauli to amlọndọ to fie e dosla do?
  • Kanbiọ tẹlẹ wẹ Davidi kanse Sauli?
  • To whenuena Davidi tọ́n sọn Sauli dè, fie wẹ e yì?
  • Etẹwẹ hẹn Davidi blawu tlala bo whàn ẹn nado pà ohàn dagbedagbe de?
  • Owhe nẹmu wẹ Davidi tindo to whenuena e duahọlu to Heblọni, podọ nawẹ delẹ to visunnu etọn lẹ mẹ nọ yin?
  • Fie wẹ Davidi sọ dugán te taidi ahọlu to nukọn mẹ?

Kanbiọ devo lẹ

  • Hia 1 Samuẹli 26:1-25.

    Etẹwẹ hogbe Davidi tọn he yin kinkàndai to 1 Samuẹli 26:11 mẹ lẹ dohia gando tito yẹwhehọluduta tọn go? (Ps. 37:7; Lom. 13:2)

    Eyin mí nọ dovivẹnu sinsinyẹn nado do dagbewanyi hia mẹde ṣigba bọ e ma yọ́n pinpẹn etọn, nawẹ hogbe Davidi tọn he tin to 1 Samuẹli 26:23 mẹ lẹ sọgan gọalọna mí nado hẹn pọndohlan he sọgbe go gbọn? (1 Ahọ. 8:32; Ps. 18:20)

  • Hia 2 Samuẹli 1:26.

    Nawẹ Klistiani lẹ sọgan wleawuna “owanyi sisosiso na ode awetọ” to egbehe gbọn dile Davidi po Jonatani po wà do? (1 Pita 4:8; Kọl. 3:14; 1 Joh. 4:12)

  • Hia 2 Samuẹli 5:1-10.

    Owhe nẹmu wẹ Davidi do duahọlu, podọ nawẹ ojlẹ gandudu etọn tọn yin mimá gbọn? (2 Sam. 5:4, 5)

    Etẹwẹ aṣli kiklo-yinyin Davidi tọn, podọ nawẹ ehe yinuwa taidi nuflinmẹ de na mí to egbehe gbọn? (2 Sam. 5:10; 1 Sam. 16:13; 1 Kọl. 1:31; Flp. 4:13)

Plọnnu Dogọ

Davidi Ma Nọ Dibu

Hia otàn Biblu tọn he whànmẹ ehe nado yọ́n nuhe zọ́n bọ Davidi do gboadọ sọmọ.