Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 58: Davidi po Goliati Po

Otàn 58: Davidi po Goliati Po

FILISTININU lẹ sọ lẹkọwa nado funawhàn hẹ Islaeli. Mẹdaho atọ̀n tintan Davidi tọn lẹ tin to awhànpa Sauli tọn mẹ todin. To gbèdopo, Jẹsse dọna Davidi dọmọ: ‘Yí gbado sisọ pẹẹde po blẹdi po yì na nọvisunnu towe lẹ, bo pọ́n lehe yé te do.’

Goliati

Whenuena Davidi jẹ osla awhànpa lọ tọn mẹ, e họ̀nwezun yì fie yé nọ funawhàn te lọ nado dín nọvisunnu etọn lẹ. Goliati Filistininu asuka lọ tọ́njẹgbonu nado vlẹ Islaelivi lẹ. E wà ehe to afọnnu po whèjai po na azán 40. E nọ dawhá dọmọ: ‘Mì de dopo to sunnu mìtọn lẹ mẹ nado hoavùn hẹ mi. Eyin ewọ duto avùn lọ ji bo hù mi, mí na lẹzun kanlinmọ mìtọn. Ṣigba, eyin yẹn duto e ji bo hù i, mìwlẹ na lẹzun kanlinmọ mítọn. Yẹn to tenọpọn mì dọ mì ni de mẹde he na hoavùn hẹ mi.’

Davidi kanse delẹ to awhànfuntọ lọ lẹ mẹ dọmọ: ‘Etẹwẹ dawe he hù Filistininu ehe bosọ de Islaeli sọn winyan ehe mẹ na mọyi?’

Awhànfuntọ de dọna ẹn dọmọ: ‘Sauli na na adọkunnu susu mẹlọ. E nasọ yí viyọnnu etọn na ẹn taidi asi.’

Ṣigba Islaelivi lẹpo to budi na Goliati na e klo bosọ dite taun wutu. E dite sọ mẹtlu atọ̀n, bosọ tindo awhànfuntọ devo he nọ hẹn awọ̀yinu etọn na ẹn.

Awhànfuntọ delẹ yì dọna Ahọlu Sauli dọ Davidi jlo nado hoavùn hẹ Goliati. Ṣigba, Sauli dọna Davidi dọmọ: ‘Hiẹ ma sọgan hoavùn hẹ Filistininu enẹ. Yọpọvu de wẹ hiẹ, podọ ewọ ko yin awhànfuntọ to gbẹzan etọn lẹpo mẹ.’ Davidi sọ gblọn dọmọ: ‘Yẹn hù beali de po kinnikinni de po he nọ ze lẹngbọ otọ́ ṣie tọn lẹ. Nudopolọ wẹ na jọ do Filistininu ehe lọsu go. Jehovah na gọalọna mi.’ Enẹwutu Sauli dọna ẹn dọmọ: ‘Yì, na Jehovah ni nọhẹ we.’

Davidi sọ yì otọ̀ de tó bo ṣinyan zannu he dídí atọ́n bosọ bẹ yé do saki etọn mẹ. Enẹgodo, e yí akòtopẹ́ etọn bo tọ́n nado yì pehẹ asuka lọ. To whenue Goliati mọ ẹn hlan, e paṣa ẹ tlala. Ewọ lẹndọ e na bọawu taun nado hù Davidi.

Davidi to zannu yìn

Goliati sọ dọmọ: ‘Sẹpọ mi, yẹn nasọ na agbasalan towe ohẹ̀ po kanlin lẹ po nado dù.’ Ṣigba Davidi dọmọ: ‘Hiẹ ja dè e po ohí, ogá, gọna owhán de po, ṣigba yẹn ja dè we to oyín Jehovah tọn mẹ. To egbehe wẹ Jehovah na jo we do alọ ṣie mẹ bọ yẹn nasọ hù we.’

To whenẹnu wẹ Davidi họ̀nwezun bo jlọ do Goliati ji. E yí zannu de sọn saki etọn mẹ bo ze e do akòtopẹ́ etọn mẹ bosọ yìn in po huhlọn etọn lẹpo po. Zannu lọ zlọn tlọlọ biọ tamẹ na Goliati sọn nukọn, e sọ jai bo kú! To whenue Filistininu lẹ mọdọ awhàngán yetọn ko jai, yemẹpo wẹ jẹ hinhọ̀n ji. Islaelivi lẹ sọ jẹgodona yé bosọ gbawhàn yetọn.

1 Samuẹli 17:1-54.



Kanbiọ lẹ

  • Etẹwẹ Goliati dọ to whenue e tọ́nawhàn awhànpa Islaeli tọn?
  • Nawẹ Goliati tọ́nalùn sọ, podọ opagbe tẹwẹ Ahọlu Sauli dona mẹhe na hù Goliati?
  • Etẹwẹ Davidi dọ to whenuena Sauli dọna ẹn dọ e ma sọgan hoavùn hẹ Goliati na yọpọvu de wẹ ewọ?
  • Nawẹ Davidi do jidide etọn to Jehovah mẹ hia gbọn to gblọndo etọn mẹ na Goliati?
  • Dile hiẹ sọgan mọ do to yẹdide lọ mẹ, etẹwẹ Davidi yizan nado hù Goliati, podọ etẹwẹ jọ do Filistininu lẹ go to enẹgodo?

Kanbiọ devo lẹ

  • Hia 1 Samuẹli 17:1-54.

    Etẹ ji wẹ adọgbigbo Davidi tọn sinai do, podọ nawẹ mí sọgan hodo apajlẹ adọgbigbo etọn tọn gbọn? (1 Sam. 17:37, 45; Efe. 6:10, 11)

    Naegbọn Klistiani lẹ dona dapana gbigbọ agbàwhinwhlẹn Goliati tọn nkọ to aihundida po ayidedai lẹ po mẹ? (1 Sam. 17:8; Gal. 5:26; 1 Tim. 4:8)

    Nawẹ hogbe Davidi tọn lẹ dohia dọ e tindo yise to godonọnamẹ Jiwheyẹwhe tọn mẹ gbọn? (1 Sam. 17:45-47; 2 Otan. 20:15)

    Kakati nado basi zẹẹmẹ awhàn lọ tọn taidi agbàwhinwhlẹn to awhànpa voovo awe ṣẹnṣẹn poun, nawẹ kandai ehe dohia dọ yẹwhe lalo lẹ po Jiwheyẹwhe nugbo lọ, Jehovah po ṣẹnṣẹn wẹ awhàn lọ wá aimẹ te na nugbo tọn gbọn? (1 Sam. 17:43, 46, 47)

    Nawẹ pipotọ mẹyiamisisadode lẹ tọn nọ hodo apajlẹ Davidi tọn to jidide do Jehovah go mẹ gbọn? (1 Sam. 17:37; Jel. 1:17-19; Osọ. 12:17)

Plọnnu Dogọ

PLỌN OVI TOWE LẸ

Davidi Ma Nọ Dibu

Hia otàn Biblu tọn he whànmẹ ehe nado yọ́n nuhe zọ́n bọ Davidi do gboadọ sọmọ.