Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 57: Jiwheyẹwhe De Davidi

Otàn 57: Jiwheyẹwhe De Davidi
Davidi whlẹn lẹngbọvu de

BE HIẸ mọ nuhe jọ tofi ya? Visunnu lọ ko whlẹn lẹngbọvu ehe sọn beali lọ si. Beali lọ wá bo ze lẹngbọvu lọ nado yì dù i. Ṣigba, visunnu lọ họ̀nwezun jẹgodona yé bosọ whlẹn lẹngbọvu lọ sọn onù beali lọ tọn mẹ. To whenue beali lọ ṣite pannukọn ẹn, visunnu lọ wle e bosọ hù i! To ojlẹ devo mẹ, ewọ whlẹn lẹngbọ de sọn kinnikinni de si. Be e ma yin adọgbotọ de wẹ visunnu ehe ya? Be hiẹ yọ́n mẹhe ewọ yin ya?

Jọja Davidi wẹ. E nọ nọ̀ otò Bẹtlẹhẹm tọn mẹ. Babadaho etọn wẹ Obẹdi visunnu Luti po Boazi po tọn. Be hiẹ flin yé ya? Otọ́ Davidi tọn wẹ Jẹsse. Davidi wẹ nọ penukundo lẹngbọ otọ́ etọn tọn lẹ go. Owhe ao to whenue Jehovah de Sauli nado lẹzun ahọlu godo wẹ Davidi yin jiji.

Ojlẹ lọ wá whenue Jehovah dọna Samuẹli dọmọ: ‘Yí amisisa vonọtaun de bo yì owhé Jẹsse tọn gbè to Bẹtlẹhẹm. Yẹn ko de dopo to visunnu etọn lẹ mẹ nado duahọlu.’ Whenuena Samuẹli mọ Eliabi visunnu plọnji Jẹsse tọn, e dọ to ede mẹ dọmọ: ‘Ayihaawe matin dọ mẹhe Jehovah de lọ die.’ Ṣigba, Jehovah dọna ẹn dọmọ: ‘Ma pọ́n tedidi po whanpẹ etọn po blo. Yẹn ma de e nado duahọlu gba.’

Whenẹnu wẹ Jẹsse ylọ visunnu etọn Abinadabi bo plan ẹn wá Samuẹli dè. Ṣigba Samuẹli dọmọ: ‘Lala, Jehovah ma de ewọ.’ Enẹgodo, Jẹsse sọ plan visunnu etọn Ṣamma wá. Samuẹli sọ dọmọ: ‘Lala, e ma yin ewọ wẹ Jehovah de.’ Jẹsse plan visunnu etọn voovo ṣinawe wá Samuẹli dè, ṣigba Jehovah ma de depope to yé mẹ. Samuẹli sọ kanse e dọ, ‘Be visunnu towe lẹpo die ya?’

Jẹsse gblọn dọmọ: ‘E sọ pò pẹvi pete lọ, ṣigba e ko tọ́n nado yì penukundo lẹngbọ lẹ go.’ To whenuena yè plan Davidi wá whégbè, Samuẹli mọdọ visunnu whanpẹnọ de wẹ ewọ. Jehovah sọ dọmọ: ‘Omẹ ehe wẹ, kọ̀n amisisa lọ do ota na ẹn.’ Podọ nuhe Samuẹli wà niyẹn. Ojlẹ lọ na wá whenuena Davidi na lẹzun ahọlu Islaeli tọn.

1 Samuẹli 17:34, 35; 16:1-13.



Kanbiọ lẹ

  • Nawẹ visunnu he to yẹdide lọ mẹ nọ yin, podọ nawẹ mí wagbọn do yọnẹn dọ adọgbotọ de wẹ?
  • Fie wẹ Davidi nọ, podọ nawẹ otọ́ etọn po babadaho etọn po nọ yin?
  • Naegbọn Jehovah dọna Samuẹli nado yì owhé Jẹsse tọn gbè to Bẹtlẹhẹm?
  • Etẹwẹ jọ to whenue Jẹsse hẹn visunnu etọn ṣinawe wá Samuẹli nukọn?
  • To whenue Davidi yin hinhẹnwa, etẹwẹ Jehovah dọna Samuẹli?

Kanbiọ devo lẹ

  • Hia 1 Samuẹli 17:34, 35.

    Nawẹ nujijọ ehelẹ do obá he mẹ adọgbigbo po jidide Davidi tọn do Jehovah go po sinyẹn jẹ hia gbọn? (1 Sam. 17:37)

  • Hia 1 Samuẹli 16:1-14.

    Nawẹ hogbe Jehovah tọn he tin to 1 Samuẹli 16:7 mẹ lẹ gọalọna mí nado nọ dapana mẹnukuntahihopọn po awusọhia gbonu tọn po pinpọn gbọn? (Owalọ 10:34, 35; 1 Tim. 2:4)

    Nawẹ apajlẹ Sauli tọn dohia dọ eyin Jehovah yí gbigbọ wiwe etọn sọn mẹde ji, gbigbọ ylankan kavi ojlo zogbe na ylanwiwa sọgan gọ́ otẹn he jẹvọ́ lọ mẹ gbọn? (1 Sam. 16:14; Mat. 12:43-45; Gal. 5:16)