Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 56: Sauli—Ahọlu Tintan Islaeli Tọn

Otàn 56: Sauli—Ahọlu Tintan Islaeli Tọn
Samuẹli yiamisisadode Sauli taidi ahọlu

PỌ́N, Samuẹli to amisisa kọ̀n do ota na dawe enẹ. Nuhe yè nọ saba wà na mẹde nado dohia dọ ewọ yin dide taidi ahọlu de niyẹn. Jehovah dọna Samuẹli nado kọ̀n amisisa do ota na Sauli. Amì vonọtaun he tindo owán dagbe de wẹ.

Sauli lẹndọ emi ma pegan sọmọ nado duahọlu. E dọna Samuẹli dọmọ: ‘Whẹndo Bẹnjamini tọn he yin whẹndo he whè hugan to Islaeli mẹ wẹ yẹn wá sọn. Naegbọn hiẹ do dọ dọ yẹn na lẹzun ahọlu?’ Jehovah yiwanna Sauli na ewọ ma lẹndọ emi yin mẹjọmẹ de wutu. Enẹwutu wẹ E do de e nado lẹzun ahọlu.

Ṣigba, Sauli ma yin wamọnọ kavi mẹhe whègli de gba. E wá sọn whẹndo adọkunnọ de mẹ, bo yọ́n dẹpẹ taun bosọ dite. E dite hugan mẹlẹpo to Islaeli! Sauli sọ nọ họ̀nwezun po awuyiya po, bosọ dohuhlọn taun. Homẹhun gbẹtọ lẹ dọ Jehovah de Sauli taidi ahọlu. Yemẹpo jẹ awhádo ji dọmọ: ‘ogbẹ̀ gaa ni tin hlan ahọlu!’

Kẹntọ Islaeli tọn lẹ gbẹsọ dohuhlọn taun. Yé gbẹ́ pò to tukladona Islaelivi lẹ. To whenue Sauli yin dide taidi ahọlu godo tlolo wẹ Ammọninu lẹ wá nado funawhàn hẹ yé. Ṣigba, Sauli bẹ awhànfuntọ susu pli, bosọ gbawhàn Ammọninu lẹ tọn. Ehe hẹn homẹ gbẹtọ lẹ tọn hùn dọ Sauli yin ahọlu.

Dile owhe lẹ to yìyì, Sauli deanana Islaelivi lẹ nado gbawhàn kẹntọ yetọn lẹ tọn whlasusu. Sauli sọ tindo visunnu adọgbotọ de he nọ yin Jonatani. Jonatani sọ gọalọna Islaelivi lẹ nado duto awhàn susu ji. Filistininu lẹ wẹ kẹntọ Islaelivi lẹ tọn he ylan hugan. To gbèdopo, Filistininu fọtọ́n susu lẹ wá nado funawhàn hẹ Islaelivi lẹ.

Samuẹli dọna Sauli nado nọte kakajẹ whenue emi na wá nado basi avọ́sinsan kavi nunina de hlan Jehovah. Ṣigba, Samuẹli ma yawu wá. Sauli dibu dọ Filistininu lẹ na bẹ awhàn lọ jẹeji, enẹwutu ewọ lọsu yì basi avọ́sinsan lọ. To whenue Samuẹli wá, e dọna Sauli dọ ewọ ko vẹtoli. ‘Jehovah na de mẹdevo nado duahọlu do Islaeli ji,’ wẹ Samuẹli dọ.

To enẹgodo, Sauli sọ vẹtoli devo. Samuẹli sọ dọna ẹn dọmọ: ‘E pọnte nado setonuna Jehovah hú nado yí lẹngbọ dagbe hugan do sanvọ́na ẹn. Na hiẹ ko vẹtolina Jehovah wutu, Jehovah ma nasọ kẹalọyi we taidi ahọlu Islaeli tọn ba.’

Mí sọgan mọ nuplọnmẹ dagbe de yí sọn ehe mẹ. E do lehe e yin nujọnu do sọ nado nọ setonuna Jehovah to whepoponu hia mí. E sọ dohia mí ga dọ gbẹtọ dagbe de taidi Sauli nkọ sọgan wá diọ bo lẹzun mẹylankan. Mí ma na jlo nado wá lẹzun mẹylankan gbede, kavi e ma yin mọ wẹ?

1 Samuẹli weta 9 jẹ 11; 13:5-14; 14:47-52; 15:1-35; 2 Samuẹli 1:23.



Kanbiọ lẹ

  • Etẹ wà wẹ Samuẹli te to yẹdide lọ mẹ, podọ etẹwutu?
  • Naegbọn Jehovah do yiwanna Sauli, podọ omẹ nankọ wẹ e yin?
  • Nawẹ visunnu Sauli tọn nọ yin, podọ etẹwẹ visunnu lọ wà?
  • Naegbọn Sauli do basi avọ́sinsan de kakati nado nọtepọn Samuẹli nado wá basi i?
  • Etẹwẹ mí sọgan plọn sọn kandai he gando Sauli go mẹ?

Kanbiọ devo lẹ

  • Hia 1 Samuẹli 9:15-21 po 10:17-27 po.

    Nawẹ jlẹkajininọ Sauli tọn gọalọnaẹn nado dapana nuyiwa sọmawhe tọn to whenuena mẹdelẹ dọho gandego po mẹmasi po gbọn? (1 Sam. 9:21; 10:21, 22, 27; Howh. 17:27)

  • Hia 1 Samuẹli 13:5-14.

    Ylando tẹwẹ Sauli wà to Gilgali? (1 Sam. 10:8; 13:8, 9, 13)

  • Hia 1 Samuẹli 15:1-35.

    Ylando sinsinyẹn tẹwẹ Sauli wà to whẹho Agagi, ahọlu Amalẹki tọn mẹ? (1 Sam. 15:2, 3, 8, 9, 22)

    Nawẹ Sauli tẹnpọn nado suwhẹna nuyiwa etọn bo de whẹgbledomẹ lọ sọn ede ji gbọn? (1 Sam. 15:24)

    Avase tẹwẹ mí dona nọ setonuna to whenue mí mọ ayinamẹ yí to egbehe? (1 Sam. 15:19-21; Ps. 141:5; Howh. 9:8, 9; 11:2)