Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 55: Visunnu Pẹvi de Sẹ̀n Jiwheyẹwhe

Otàn 55: Visunnu Pẹvi de Sẹ̀n Jiwheyẹwhe

BE VISUNNU pẹvi ehe ma yọnwhanpẹ ya? Yinkọ etọn wẹ Samuẹli. Podọ dawe he ze alọ do ota na Samuẹli wẹ Eli, yẹwhenọ daho Islaeli tọn. Ẹlkana otọ́ Samuẹli tọn po Hanna onọ̀ etọn po wẹ omẹ enẹlẹ he plan Samuẹli wá na Eli.

Samuẹli yì yẹwhenọ daho Eli dè

Owhe ẹnẹ kavi atọ́n poun wẹ Samuẹli tindo to whenẹnu. Ṣigba, ewọ na nọ gòhọtúntún Jehovah tọn mẹ hẹ Eli po yẹwhenọ devo lẹ po. Naegbọn Ẹlkana po Hanna po do ze yọpọvu mọnkọtọn di Samuẹli jo nado yì sẹ̀n Jehovah to gòhọtúntún lọ mẹ? Gbọ mí ni pọ́n nuhewutu wẹ.

Owhe vude lẹ jẹnukọnna ehe, Hanna ko nọ awubla mẹ taun. Nuhe zọ́n wẹ yindọ e ma sọgan jivi, podọ ewọ jlo taun nado ji dopo tata. Enẹwutu, to gbèdopo he Hanna wá gòhọtúntún Jehovah tọn mẹ, e hodẹ̀ dọmọ: ‘Jehovah E, ma wọn mi blo! Eyin a na mi visunnu de, yẹn dopagbe dọ yẹn na ze e jo na e nido sẹ̀n we to gbẹzan etọn lẹpo mẹ.’

Jehovah sè odẹ̀ Hanna tọn, bọ to osun delẹ godo e ji Samuẹli. Hanna yiwanna visunnu pẹvi etọn, bo jẹ nuplọn ẹn ji gando Jehovah go to whenuena e gbẹ́ pò to ovu. E dọna asu etọn dọmọ: ‘Eyin yẹn deanọna Samuẹli tlolo, yẹn na ze e yì gòhọtúntún lọ mẹ na e nido nọ sẹ̀n Jehovah to finẹ.’

Nuhe Hanna po Ẹlkana po to wiwà to yẹdide lọ mẹ niyẹn. Na Samuẹli ko yin pinplọn ganji gbọn mẹjitọ etọn lẹ dali wutu, homẹ etọn hùn nado sẹ̀n Jehovah to finẹ to gòhọ Jehovah tọn mẹ. To whemẹwhemẹ, Hanna po Ẹlkana po nọ wá gòhọ titengbe ehe mẹ nado basi sinsẹ̀n podọ nado dla visunnu pẹvi yetọn pọ́n. Hanna nọ tọ̀ awù yọyọ de wá na Samuẹli to owhe dopodopo mẹ.

Dile owhe lẹ to yìyì, Samuẹli to nukọnzindo to sinsẹ̀nzọn Jehovah tọn mẹ to gòhọtúntún lọ mẹ, podọ Jehovah po gbẹtọ lẹ po yiwanna ẹn. Ṣigba Họfini po Finehasi po he yin visunnu Eli yẹwhenọ daho lọ tọn lẹ ma to dagbe wà. Yé nọ wà nuylankan lẹ, bosọ nọ hẹn mẹdevo lẹ lọsu nado vẹtolina Jehovah. Eli dona ko yí azọngban yẹwhenọ tọn sọn yé si, ṣigba e ma wàmọ.

Jọja Samuẹli ma dike na nuylankan he to jijọ to gòhọtúntún lọ mẹ lẹ depope ni hẹn ẹn nado doalọtena Jehovah sinsẹ̀n. Na omẹ vude poun wẹ yiwanna Jehovah nugbonugbo wutu, e ko dẹn taun bọ Jehovah dọhona gbẹtọ de. Ṣigba, to whenue Samuẹli ko whẹ́n pẹẹde dogọ, nuhe jọ die:

Samuẹli to amlọndọ to gòhọtúntún lọ mẹ bọ ogbè de fọ́n ẹn. E gblọn dọmọ: ‘N’tofi.’ E sọ fọnṣite bo họ̀nwezun yì Eli dè bo dọmọ: ‘Hiẹ to yiylọ mi, yẹn die.’

Ṣigba Eli gblọn dọmọ: ‘Yẹn ma ylọ we gba; yì mlọnai.’ Samuẹli sọ gọyì mlọnai.

Enẹgodo, e sọ sè ogbè lọ whla awetọ dọmọ: ‘Samuẹli!’ Samuẹli sọ fọ́n bo họ̀nwezun yì Eli dè. ‘Hiẹ to yiylọ mi, yẹn die,’ wẹ e sọ dọ. Ṣigba Eli gblọn dọmọ: ‘Yẹn ma ylọ we, visunnu ṣie. Yì mlọnai.’ Enẹwutu Samuẹli lẹkọyi mlọnai.

Ogbè lọ sọ dọ whla atọ̀ntọ dọ, ‘Samuẹli!’ Samuẹli sọ họ̀nwezun yì Eli dè bo dọmọ: ‘Yẹn die, hiẹ na ko to yiylọ mi todin.’ Eli lọsu wá yọnẹn todin dọ Jehovah wẹ to yiylọ ẹ. Enẹwutu e dọna Samuẹli dọmọ: ‘Sọ lẹkọyi mlọnai, podọ eyin ogbè lọ sọ ylọ we devo, dọna ẹn dọmọ: “To hodọ, Jehovah, na devi towe to sisè.”’

Nuhe Samuẹli dọ niyẹn to whenue Jehovah sọ vọ́ ẹ ylọ. To whelọnu lo, Jehovah dọna Samuẹli dọ emi na sayana Eli po visunnu etọn lẹ po. To nukọn mẹ, Họfini po Finehasi po wá kú to awhàn he yé fùn hẹ Filistininu lẹ mẹ, podọ to whenue Eli sè nujijọ lọ, e họ́ jai hlan godo, okọ̀ etọn wẹ́n bọ e sọ kú. Mọwẹ ohó Jehovah tọn mọ hẹndi do niyẹn.

Samuẹli whẹ́n mẹho bo lẹzun whẹdatọ godo tọn to Islaeli. To whenue e poyọnho, gbẹtọ lẹ dọna ẹn dọmọ: ‘De ahọlu de he na dugán do mí ji.’ Samuẹli ma jlo na basi enẹ gba, na Jehovah wẹ yin ahọlu yetọn nugbo lọ. Ṣigba Jehovah dọna ẹn dọ ni sè nuhe dọ gbẹtọ lẹ te.

1 Samuẹli 1:1-28; 2:11-36; 3:1-18; 4:16-18; 8:4-9.



Kanbiọ lẹ

  • Nawẹ visunnu pẹvi he tin to yẹdide lọ mẹ nọ yin, podọ mẹnu wẹ mẹhe pò lẹ?
  • Odẹ̀ tẹwẹ Hanna hò to whenue e wá gòhọ Jehovah tọn mẹ to gbèdopo, podọ nawẹ Jehovah na ẹn gblọndo gbọn?
  • Owhe nẹmu wẹ Samuẹli tindo to whenue e yin hinhẹn yì gòhọ Jehovah tọn mẹ nado sẹ̀n, podọ etẹwẹ onọ̀ etọn nọ wà na ẹn to whemẹwhemẹ?
  • Nawẹ visunnu Eli tọn lẹ nọ yin, podọ omẹ nankọ wẹ yé?
  • Nawẹ Jehovah ylọ Samuẹli gbọn, podọ owẹ̀n tẹwẹ E do na ẹn?
  • Etẹwẹ Samuẹli wá lẹzun to whenuena e whẹ́n, podọ etẹwẹ jọ to whenue e poyọnho?

Kanbiọ devo lẹ

  • Hia 1 Samuẹli 1:1-28.

    Apajlẹ dagbe tẹwẹ Ẹlkana zedai na tatọ́ whẹndo tọn lẹ na nuhe dù nukọntọ-yinyin to sinsẹ̀n-bibasi nugbo mẹ? (1 Sam. 1:3, 21; Mat. 6:33; Flp. 1:10)

    Etẹwẹ mí sọgan plọn sọn apajlẹ Hanna tọn mẹ to whenue mí to ahidi hẹ nuhahun sinsinyẹn de? (1 Sam. 1:10, 11; Ps. 55:22; Lom. 12:12)

  • Hia 1 Samuẹli 2:11-36.

    Nawẹ Eli gbògbéna visunnu etọn lẹ hú Jehovah gbọn, podọ nawẹ ehe yin avase de na mí gbọn? (1 Sam. 2:22-24, 27, 29; Deut. 21:18-21; Mat. 10:36, 37)

  • Hia 1 Samuẹli 4:16-18.

    Owẹ̀n nugbajẹmẹji tọn ẹnẹ-to-pọmẹ tẹwẹ wá sọn awhàngbenu, podọ nawẹ ehe yinuwado Eli ji gbọn?

  • Hia 1 Samuẹli 8:4-9.

    Nawẹ Islaeli hẹn homẹgblena Jehovah sinsinyẹn gbọn, podọ nawẹ mí sọgan yí nugbonọ-yinyin do nọgodona Ahọluduta etọn to egbehe gbọn? (1 Sam. 8:5, 7; Joh. 17:16; Jak. 4:4)

Plọnnu Dogọ

Samuẹli Zindonukọn Nado to Nuhe Sọgbe Wà

Eyin mẹdevo lẹ tlẹ to nuylankan wà, nawẹ a sọgan hodo apajlẹ Samuẹli tọn bo nọ wà nuhe sọgbe gbọn?

Samuẹli ‘to Whinwhẹ́n to Jehovah Nukọn’

Naegbọn ovu whenu Samuẹli tọn yin vonọtaun? Etẹwẹ gọalọna ẹn nado wleawuna yise he lodo to gòhọtúntún mẹ?