Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 54: Sunnu Huhlọnnọ Hugan Lọ

Otàn 54: Sunnu Huhlọnnọ Hugan Lọ

BE HIẸ yọ́n yinkọ sunnu huhlọnnọ hugan lọ he ko nọgbẹ̀ pọ́n tọn ya? Whẹdatọ de wẹ he nọ yin Samsọni. Jehovah wẹ na Samsọni huhlọn he e tindo lọ. Whẹpo Samsọni do yin jiji, Jehovah dọna onọ̀ etọn dọmọ: ‘To madẹnmẹ hiẹ na ji visunnu de. Ewọ na yin nukọntọ nado whlẹn Islaeli sọn alọ Filistininu lẹ tọn mẹ.’

Samsọni to avùnho hẹ kinnikinni de

Mẹylankan lẹ wẹ Filistininu lẹ yin bo nọ nọ̀ Kenani. Yé tindo sunnu awhànfuntọ susu, podọ yé nọ sayana Islaelivi lẹ taun. To gbèdopo, whenue Samsọni jei fihe Filistininu lẹ nọ nọ̀, kinnikinni daho he to gbigbó de wá pé e. Ṣigba Samsọni hù kinnikinni lọ po alọ tata po. E sọ hù Filistininu ylankan kanweko lẹ.

To nukọn mẹ, Samsọni wá yiwanna yọnnu de he nọ yin Dẹlila. Nukọntọ Filistininu lẹ tọn dopagbe na Dẹlila dọ dopodopo yetọn na na ẹn fataka-kuẹ 1 100 eyin e dọ nuhe nọ na huhlọn Samsọni sọmọ na yé. Dẹlila jlo akuẹ enẹ lẹpo. Ewọ ma yin họntọn nugbo de na Samsọni kavi na omẹ Jiwheyẹwhe tọn lẹ gba. Enẹwutu, e nọ to kinkanbiọ Samsọni madoalọte nado dọ nuhe zọ́n bọ ewọ do tindo huhlọn sọmọ na ẹn.

Dẹlila po Samsọni po

To godo mẹ, Dẹlila hẹn Samsọni nado dọ aṣli huhlọn etọn tọn na ẹn. E dọna ẹn dọmọ: ‘Yè ma ko pà oda na mi pọ́n, sọn whenue gbọ́n yè ko ji mi wẹ Jiwheyẹwhe ko de mi nado yin devizọnwatọ vonọtaun de he nọ yin yiylọdọ Nazilinu. Eyin yè pà oda ṣie, yẹn ma nasọ tindo huhlọn ba.’

To whenuena Dẹlila sè ehe, e hẹn Samsọni nado damlọn do kligonu etọn lẹ ji. Enẹgodo, e ylọ dawe de biọ whégbè nado wá pà oda na ẹn. To whenuena Samsọni fọ́n, e masọ tindo huhlọn ba. To whelọnu, Filistininu lẹ biọ whégbè bo wle e sọyi. Yé de nukun etọn awe lẹ sẹ̀ bọ ewọ sọ lẹzun kanlinmọ yetọn.

Samsọni to dòtin lẹ họliai

To gbèdopo he Filistininu lẹ basi hùnwhẹ daho de nado sẹ̀n yẹwhe yetọn Dagọni, yé de Samsọni tọ́n sọn gànpamẹ nado ṣàn ẹn ko. To whenẹnu, oda Samsọni tọn ko sọ wú. Samsọni sọ dọna visunnu he hẹn alọ etọn go lọ dọmọ: ‘Dike alọ ṣie ni hẹn dòtin he hẹn ohọ̀ lọ dote lẹ go.’ Enẹgodo Samsọni hodẹ̀ hlan Jehovah nado na ẹn huhlọn, podọ e sọ hẹn dòtin lọ lẹ go. E dawhá dọmọ: ‘Gbọ yẹn ni kú po Filistininu lẹ po.’ Filistininu 3 000 wẹ tin to hùnwhẹ lọ tẹnmẹ, podọ whenuena Samsọni dẹ́ ede do dòtin lọ lẹ ji, ohọ̀ lọ họ́ jai bo hù gbẹtọ ylankan ehe lẹpo sudo.

Whẹdatọ weta 13 jẹ 16.



Kanbiọ lẹ

  • Nawẹ sunnu he tindo huhlọn hugan to aigba ji lọ nọ yin, podọ mẹnu wẹ na ẹn huhlọn lọ?
  • Dile hiẹ sọgan mọ do to yẹdide lọ mẹ, etẹwẹ Samsọni wà na kinnikinni daho de to gbèdopo?
  • Aṣli tẹwẹ Samsọni to didọna Dẹlila to yẹdide lọ mẹ, podọ nawẹ ehe zọ́n bọ alọ Filistininu lẹ tọn jẹ e go gbọn?
  • Nawẹ Samsọni hẹn okú wá na kẹntọ Filistininu 3 000 to gbeegbe e kú gbọn?

Kanbiọ devo lẹ

  • Hia Whẹdatọ 13:1-14.

    Nawẹ Manoa po asi etọn po wleawuna apajlẹ dagbe de na mẹjitọ lẹ to ovi yetọn lẹ go pinpọn whẹ́n mẹ gbọn? (Whẹ. 13:8; Ps. 127:3; Efe. 6:4)

  • Hia Whẹdatọ 14:5-9 po 15:9-16 po.

    Etẹwẹ kandai lọ gando lehe Samsọni hù kinnikinni de do bo wẹ́n okàn yọyọ he yè yí do blá ẹ lẹ po lehe e yí aglànkahú kẹtẹkẹtẹ de tọn do hù sunnu 1 000 do po go dohia gando nuyiwa gbigbọ wiwe Jehovah tọn go?

    Nawẹ gbigbọ wiwe nọ gọalọna mí gbọn to egbehe? (Whẹ. 14:6; 15:14; Zek. 4:6; Owalọ 4:31)

  • Hia Whẹdatọ 16:18-31.

    Nawẹ ogbẹ́ ylankan yinuwado Samsọni ji gbọn, podọ etẹwẹ mí sọgan plọn sọn ehe mẹ? (Whẹ. 16:18, 19; 1 Kọl. 15:33)