Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 53: Opagbe Jẹfta Tọn

Otàn 53: Opagbe Jẹfta Tọn
Viyọnnu Jẹfta tọn

BE HIẸ ko dopagbe de pọ́n bo wá mọ to godo mẹ dọ e sinyẹn nado hẹndi ya? Dawe he to yẹdide ehe mẹ wàmọ, podọ enẹ wẹ hẹn ẹn blawu sọmọ. Whẹdatọ adọgbotọ Islaeli tọn de wẹ he nọ yin Jẹfta.

Jẹfta nọgbẹ̀ to ojlẹ he mẹ Islaelivi lẹ masọ to Jehovah sẹ̀n te ba. Yé sọ jẹ nuhe ylan wà ji whladopo dogọ. Enẹwutu, Jehovah dike bọ Ammọninu lẹ sayana yé. Ehe hẹn Islaelivi lẹ nado dawhá ylọ Jehovah dọmọ: ‘Míwlẹ ko waylando do we. Jaale bo whlẹn mí!’

Jẹfta po sunnu etọn lẹ po

Onú ylankan he Islaelivi lẹ ko wà lẹ vẹna yé. Yé dohia dọ e vẹna yé gbọn sinsẹ̀n-bibasi Jehovah tọn vivọ́ bẹ dali. Whladopo dogọ, Jehovah sọ gọalọna yé.

Jẹfta wẹ Islaelivi lẹ de nado funawhàn sọta Ammọninu ylankan lọ lẹ. Jẹfta jlo taun dọ Jehovah ni gọalọna emi to awhàn lọ mẹ. Enẹwutu, e dopà na Jehovah dọmọ: ‘Eyin hiẹ gọalọna mi bọ yẹn gbawhàn Ammọninu lẹ tọn, omẹ tintan he na tọ́n sọn owhé ṣie gbè nado pé mi to whenuena yẹn lẹkọ sọn awhàngbenu, wẹ yẹn na na we.’

Jehovah dotoaina opagbe Jẹfta tọn bosọ gọalọna ẹn nado duto awhàn lọ ji. To whenue Jẹfta lẹkọ ja whégbè, be a yọ́n omẹ tintan he wá pé e ya? Viyọnnu etọn wẹ, yèdọ ovi dopo gee he e tindo. Jẹfta dawhá dọmọ: ‘Ojé, viyọnnu ṣie! Awubla tẹ die hiẹ hẹnwana mi. Ṣigba yẹn ko dopagbe na Jehovah, bo ka dona hẹn ẹn di.’

To whenue viyọnnu Jẹfta tọn wá sè opagbe he otọ́ etọn do lọ, ewọ lọsu blawu to tintan whenu. Na ehe zẹẹmẹdo dọ ewọ na jo otọ́ etọn po họntọn etọn lẹ po do. Podọ e na zan pipotọ gbẹzan etọn tọn lẹpo nado sẹ̀n Jehovah to gòhọtúntún mẹ to Ṣilo. Viyọnnu lọ sọ dọna otọ́ etọn dọmọ: ‘Eyin hiẹ ko dopà na Jehovah janwẹ, hiẹ dona hẹn ẹn di.’

Enẹwutu viyọnnu Jẹfta tọn yì Ṣilo, bosọ zan pipotọ gbẹzan etọn tọn nado sẹ̀n Jehovah to gòhọtúntún etọn mẹ. To whemẹwhemẹ, viyọnnu Islaeli tọn lẹ nọ yì dla ẹ pọ́n to finẹ bo nọ jaya dopọ hẹ ẹ na azán ẹnẹ. Gbẹtọ lẹ yiwanna viyọnnu Jẹfta tọn na ewọ yin devizọnwatọ Jehovah tọn dagbe de wutu.

Whẹdatọ 10:6-18; 11:1-40.



Kanbiọ lẹ

  • Mẹnu wẹ Jẹfta, podọ ojlẹ tẹ mẹ wẹ e nọgbẹ̀ te?
  • Opagbe tẹwẹ Jẹfta do na Jehovah?
  • Naegbọn Jẹfta do blawu to whenuena e lẹkọyi whégbè to awhàngbigba do Ammọninu lẹ ji godo?
  • Etẹwẹ viyọnnu Jẹfta tọn dọ to whenuena e sè opagbe he otọ́ etọn do?
  • Naegbọn gbẹtọ lẹ do yiwanna viyọnnu Jẹfta tọn?

Kanbiọ devo lẹ

  • Hia Whẹdatọ 10:6-18.

    Avase tẹwẹ mí dona setonuna gando kandai nugbonọ-mayin Islaeli tọn na Jehovah go? (Whẹ. 10:6, 15, 16; Lom. 15:4; Osọ. 2:10)

  • Hia Whẹdatọ 11:1-11, 29-40.

    Nawẹ mí wagbọn do yọnẹn dọ viyọnnu Jẹfta tọn zizejo taidi “avọ́nunina mimẹ̀ de” ma zẹẹmẹdo dọ e yí i do sanvọ́ to miyọ́n mẹ? (Whẹ. 11:31; Lev. 16:24; Deut. 18:10, 12)

    Aliho tẹ mẹ wẹ Jẹfta yí viyọnnu etọn do sanvọ́ te?

    Etẹwẹ mí sọgan plọn sọn nuyiwa Jẹfta tọn gando opagbe he e do na Jehovah go mẹ? (Whẹ. 11:35, 39; Yẹwh. 5:4, 5; Mat. 16:24)

    Nawẹ viyọnnu Jẹfta tọn yin apajlẹ dagbe de na jọja Klistiani lẹ na nuhe dù afọdidona sinsẹ̀nzọn whenu-gigọ́ tọn gbọn? (Whẹ. 11:36; Mat. 6:33; Flp. 3:8)