Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 52: Gideoni po Sunnu 300 Etọn lẹ Po

Otàn 52: Gideoni po Sunnu 300 Etọn lẹ Po

BE HIẸ mọ nuhe to jijọ tofi ya? Sunnu ehe lẹpo wẹ yin awhànfuntọ Islaeli tọn. Osin nù wẹ mẹhe fẹ yìdo lẹ te. Whẹdatọ Gideoni wẹ dawe he to ote to apá na yé lọ. E to lehe yé to osin lọ nù do pọ́n.

Pọ́n aliho voovo he mẹ dawe ehelẹ to osin lọ nù te ganji. Mẹdelẹ ze onù yetọn do osin lọ mẹ tlọlọ. Ṣigba mẹdopo ba osin lọ wá aga po alọ etọn po, na e nido sọgan to nuhe to jijọ lẹdo e lẹ pọ́n. Onú titengbe wẹ ehe yin, na Jehovah ko dọna Gideoni dọ sunnu he tin to aṣeji to whenue yé to osin nù lẹ kẹdẹ wẹ e na de. Jiwheyẹwhe dọ dọ mẹhe pò lẹ dona lẹkọyi whégbè. Gbọ mí ni pọ́n nuhewutu wẹ.

Islaelivi lẹ sọ tin to tukla mẹ taun. Nuhe zọ́n lọ wẹ yindọ yé ma setonuna Jehovah. Midianinu lẹ tindo huhlọn hugan yé bosọ nọ sayana yé. Enẹwutu, Islaelivi lẹ dawhá hlan Jehovah na alọgọ, podọ Jehovah sọ dotoaina awhágbe yetọn.

Jehovah dọna Gideoni nado wleawuna awhànpa de, podọ Gideoni bẹ awhànfuntọ 32 000 pli. Ṣigba awhànfuntọ 135 000 wẹ jlo na funawhàn hẹ Islaeli. Ṣogan Jehovah dọna Gideoni dọmọ: ‘Sunnu he a bẹpli lẹ ko sù gbau.’ Naegbọn Jehovah do dọmọ?

Na eyin Islaeli duto awhàn lo ji, yé sọgan lẹndọ po huhlọn yetọn titi po wẹ yé do gbawhàn lọ. Yé sọ sọgan lẹndọ yé ma tindo nuhudo alọgọ Jehovah tọn nado gbawhàn. Enẹwutu Jehovah dọna Gideoni dọmọ: ‘Dọna sunnu he to budi lẹpo nado lẹkọyi whégbè.’ To whenue Gideoni wà ehe, awhànfuntọ 22 000 wẹ lẹkọyi whégbè. Sunnu 10 000 poun wẹ wá pò nado yì funawhàn hẹ awhànfuntọ 135 000 enẹ lẹpo.

Gideoni to sunnu etọn lẹ tẹnpọn

Ṣigba, Jehovah dọmọ: ‘Sunnu he a bẹpli lọ lẹ gbẹsọ sù janwẹ.’ Enẹwutu e dọna Gideoni nado dike na sunnu lọ lẹ ni yì nùsin to tọ̀sisa ehe mẹ, bọ whenẹnu e na lẹkọna mẹhe ze onù do osin lọ mẹ nado nù lẹpo. Jehovah dopagbe dọmọ: ‘Hiẹ po sunnu 300 he tin to aṣeji lẹ po na duto awhàn lọ ji.’

Ojlẹ he mẹ yé na funawhàn te lọ wá. Gideoni má sunnu 300 etọn lẹ do atọ̀n. E sọ ze opẹ̀n, po ozẹn he mẹ miyọ́ngbán tin te de po na sunnu dopodopo. To zánhomẹ, yemẹpo lẹdo osla awhànfuntọ kẹntọ lọ lẹ tọn. Enẹgodo, yemẹpo kún opẹ̀n yetọn, bo gbà ozẹn yetọn lẹ bosọ dawhá to ojlẹ dopolọ mẹ dọmọ: ‘Ohí Jehovah tọn po Gideoni tọn po!’ To whenue awhànfuntọ kẹntọ lọ lẹ fọ́n sọn amlọn mẹ, yé biọ bẹwlu mẹ bosọ dibu. Yemẹpo jẹ hinhọ̀n ji, bọ Islaelivi lẹ sọ duto awhàn lọ ji.

Whẹdatọ weta 6 jẹ 8.



Kanbiọ lẹ

  • Nawẹ Islaelivi lẹ biọ nuhahun susu mẹ gbọn, podọ etẹwutu?
  • Naegbọn Jehovah do dọna Gideoni dọ mẹhe tin to awhànpa etọn mẹ lẹ ko sù hugan?
  • Omẹ nẹmu wẹ pò to whenuena Gideoni dọna mẹhe to budi lẹ nado lẹkọyi whé?
  • To yẹdide lọ yiyizan mẹ, basi zẹẹmẹ lehe Jehovah de sọha sunnu he tin to awhànpa Gideoni tọn mẹ lẹ tọn pò jẹ 300 gbọn.
  • Nawẹ Gideoni basi titona sunnu 300 etọn lẹ gbọn, podọ nawẹ Islaeli gbawhàn gbọn?

Kanbiọ devo lẹ

  • Hia Whẹdatọ 6:36-40.

    Nawẹ Gideoni tẹnpọn nado mọdona nuhe ojlo Jehovah tọn yin gbọn?

    Nawẹ mí nọ dindona nuhe ojlo Jehovah tọn yin gbọn to egbehe? (Howh. 2:3-6; Mat. 7:7-11; 2 Tim. 3:16, 17)

  • Hia Whẹdatọ 7:1-25.

    Etẹwẹ mí sọgan plọn sọn apajlẹ omẹ 300 he nọ aṣeji lẹ tọn mẹ to vogbingbọn mẹ na mẹhe ma nọ aṣeji lẹ? (Whẹ. 7:3, 6; Lom. 13:11, 12; Efe. 5:15-17)

    Kẹdẹdile sunnu 300 lọ lẹ plọnnu sọn Gideoni pinpọn mẹ do, nawẹ mí nọ plọnnu sọn apajlẹ Gideoni Daho lọ, yèdọ Jesu Klisti tọn mẹ gbọn? (Whẹ. 7:17; Mat. 11:29, 30; 28:19, 20; 1 Pita 2:21)

    Nawẹ Whẹdatọ 7:21 gọalọna mí nado tindo pekọ to sinsẹ̀nzọn mítọn mẹ mahopọnna azọ́ndenamẹ mítọn to titobasinanu Jehovah tọn mẹ gbọn? (1 Kọl. 4:2; 12:14-18; Jak. 4:10)

  • Hia Whẹdatọ 8:1-3.

    Eyin mí dona didẹ gbemanọpọ delẹ hẹ mẹmẹsunnu kavi mẹmẹyọnnu de, etẹwẹ mí sọgan plọn sọn aliho he mẹ Gideoni didẹ gbemanọpọ de te hẹ Eflaiminu lẹ mẹ? (Howh. 15:1; Mat. 5:23, 24; Luku 9:48)