Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 50: Yọnnu Adọgbotọ Awe

Otàn 50: Yọnnu Adọgbotọ Awe

TO WHENUENA Islaelivi lẹ biọ tukla mẹ wẹ yé nọ dawhá ylọ Jehovah. Jehovah sọ nọ siọ yé gbọn nukọntọ adọgbotọ delẹ dide nado gọalọna yé dali. Nukọntọ enẹlẹ wẹ Biblu ylọdọ whẹdatọ lẹ. Jọṣua wẹ yin whẹdatọ tintan podọ delẹ to mẹhe bọdego lẹ mẹ wẹ Otiniẹli, Ẹhudi, po Ṣamgali po. Ṣigba, awe to whẹdatọ he gọalọna Islaeli lẹ mẹ yin yọnnu he yinkọ yetọn nọ yin Debola po Jaeli po.

Debola to hodọna Balaki

Yẹwhegán yọnnu de wẹ Debola yin. Jehovah nọ dọhona ẹn gando sọgodo go bọ ewọ sọ nọ dogbè nuhe Jehovah dọna ẹn tọn na akọta lọ. Debola sọ yin whẹdatọ de ga. Ewọ nọ sinai to détin de glọ to lẹdo osó-waji tòdaho lọ tọn mẹ bọ gbẹtọ lẹ nọ wá e dè nado mọ alọgọ na nuhahun yetọn lẹ.

Jabini wẹ yin ahọlu Kenani tọn to whenẹnu. Awhànkẹkẹ 900 wẹ e tindo. Awhànpa Jabini tọn dohuhlọn sọmọ bọ, Islaelivi susu ko yin hinhẹn po huhlọn po nado lẹzun afanumẹ etọn lẹ. Mẹhe yin awhàngán to awhànpa Jabini tọn mẹ nọ yin Sisela.

To gbèdopo, Debola dowẹn hlan whẹdatọ Balaki bo dọna ẹn dọmọ: ‘Nuhe Jehovah dọ die: “Yí sunnu 10 000 bo plan yé jẹ Osó Taboli ji. Finẹ wẹ yẹn na plan Sisela wá dè we te. Yẹn na gọalọna we nado duto ewọ po awhànpa etọn po ji.”’

Balaki gblọnna Debola dọmọ: ‘Yẹn na yì eyin hiẹ yigbe nado yì hẹ mi.’ Debola yigbe nado hodo Balaki nugbo, ṣigba e dọna ẹn dọ: ‘Hiẹ ma na mọ gigo awhàn lọ tọn yí gba, na alọ yọnnu tọn mẹ wẹ Jehovah na jo Sisela do.’ Podọ nuhe jọ lọ pẹpẹ niyẹn.

Balaki jẹte sọn Osó Taboli ji nado yì pé awhànfuntọ Sisela tọn lẹ. To ajiji mẹ, Jehovah hẹn singigọ de wá bọ susu awhànfuntọ kẹntọ lọ lẹ tọn kútọ. Ṣigba Sisela jẹte sọn awhànkẹkẹ etọn ji bo họnyi.

Balaki, Jaeli po Sisela po

Sisela wá gòhọ Jaeli tọn kọ̀n to ojlẹ vude godo. E dọna ẹn dọ ni biọ họmẹ, bosọ na ẹn yìnnọsìn vude. Amlọn jẹ Sisela sà ji, e ma dẹn bọ e sọ damlọn yìkànmẹ. Enẹgodo, Jaeli yí ogàn tlọ́ntlọ́n gòhọ etọn tọn de bo whè do ota dawe ylankan ehe tọn mẹ. To nukọn mẹ, whenuena Balaki wá, e do oṣiọ Sisela tọn hia ẹ! E họnwun todin dọ nuhe Debola dọ mọ hẹndi nugbo.

To godo mẹ, Ahọlu Jabini lọsu yin hùhù bọ Islaelivi lẹ sọ mọ agbọ́ na ojlẹ de.

Whẹdatọ 2:14-22; 4:1-24; 5:1-31.



Kanbiọ lẹ

  • Mẹnu wẹ whẹdatọ lẹ yin, podọ etẹwẹ yin yinkọ delẹ tọn to yé mẹ?
  • Lẹblanulọkẹyi vonọtaun tẹwẹ Debola tindo, podọ etẹwẹ ehe bẹhẹn?
  • Whenuena Ahọlu Jabini po awhàngán etọn, Sisela po dobuna Islaeli, owẹ̀n he wá sọn Jehovah dè tẹwẹ Debola do na Whẹdatọ Balaki, podọ mẹnu tọn wẹ e dọ gigo lọ na yin?
  • Nawẹ Jaeli do ede hia nado yin yọnnu adọgbotọ de gbọn?
  • Etẹwẹ jọ to okú Ahọlu Jabini tọn godo?

Kanbiọ devo lẹ

  • Hia Whẹdatọ 2:14-22.

    Nawẹ Islaelivi lẹ hẹn homẹgble Jehovah tọn wá yede ji gbọn, podọ etẹwẹ mí sọgan plọn sọn ehe mẹ? (Whẹ. 2:20; Howh. 3:1, 2; Ezek. 18:21-23)

  • Hia Whẹdatọ 4:1-24.

    Etẹlẹ wẹ yọnnu Klistiani egbezangbe tọn lẹ sọgan plọn sọn apajlẹ yise gọna adọgbigbo Debola po Jaeli po tọn mẹ? (Whẹ. 4:4, 8, 9, 14, 21, 22; Howh. 31:30; 1 Kọl. 16:13)

  • Hia Whẹdatọ 5:1-31.

    Nawẹ ohàn awhàngbigba tọn he Balaki po Debola po ji sọgan taidi odẹ̀ de na awhàn Amagẹdọni tọn he ja lọ gbọn? (Whẹ. 5:3, 31; 1 Otan. 16:8-10; Osọ. 7:9, 10; 16:16; 19:19-21)