Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 49: Owhè Nọte Guun

Otàn 49: Owhè Nọte Guun

PỌ́N Jọṣua. Nuhe dọ e te wẹ yindọ, ‘Owhè, nọte guun!’ Owhè lọ sọ nọte domọ nugbo. E nọte to tẹndo dopolọ mẹ to ṣẹnṣẹn agahomẹ tọn na azán dopo blebu. Jehovah wẹ dike bọ ehe jọ domọ! Ṣigba, gbọ mí ni pọ́n nuhewutu Jọṣua do jlo dọ owhè ni hùn domọ.

Owhè

To whenuena ahọlu ylankan atọ́n aigba Kenani tọn lẹ wleawu nado funawhàn hẹ Gebiọninu lẹ, yé do dawe de hlan nado biọ alọgọ sọn Jọṣua dè. E dọmọ: ‘Jaale bo yawu wá mí dè. Whlẹn mí, na ahọlu he tin to osó-waji to tòdaho lọ mẹ lẹ ko fọ́n nado funawhàn hẹ devi towe lẹ.’

Jọṣua po awhànfuntọ etọn lẹpo po sọ yì to afọdopolọji. Yé zingbejizọnlin awhàn tọn to ozán lọ blebu mẹ. Whenuena yé jẹ Gebiọni, awhànfuntọ ahọlu atọ́n ehelẹ tọn dibu bosọ jẹ hinhọ̀n ji. Jehovah sọ hẹn kẹnsu dahodaho delẹ nado ja sọn agahomẹ, bọ awhànfuntọ he kú gbọn kẹnsu enẹlẹ dali sù hugan dehe awhànfuntọ Jọṣua tọn lẹ hù.

Jọṣua

Ṣigba, Jọṣua mọdọ owhè na yihọ to madẹnmẹ din. E mọdọ zinvlu na dó bọ susu awhànfuntọ ahọlu atọ́n enẹlẹ tọn na họnyi. Enẹ wẹ zọ́n bọ Jọṣua hodẹ̀ hlan Jehovah bo dọmọ: ‘Owhè, nọte guun!’ Podọ, whenue owhè lọ nọte, Islaelivi lẹ penugo nado duto awhàn lọ ji mlẹnmlẹn.

Ahọlu ylankan he gbẹwanna omẹ Jiwheyẹwhe tọn lẹ gbẹ́ sù to Kenani. Owhe ṣidopo wẹ e biọ to Jọṣua po awhànpa etọn po si nado gbawhàn ahọlu 31 he tin to aigba lọ ji lẹ tọn. Whenuena yé ko wà ehe pó godo, Jọṣua tẹnpọn nado má aigba Kenani tọn na whẹndo he ma ko mọ aigba lọ yí lẹ.

Owhe susu lẹ juwayi bọ Jọṣua wá kú to godo mẹ to whenue e tindo owhe 110. To ojlẹ he mẹ ewọ po họntọn etọn lẹ po gbẹ́ pò togbẹ̀, akọta lọ setonuna Jehovah. Ṣigba, whenuena dawe tonusetọ ehelẹ kú godo, akọta lọ jẹ onú ylankan lẹ wà ji bosọ biọ tukla mẹ. Whenẹnu wẹ yé tindo nuhudo alọgọ Jiwheyẹwhe tọn taun.

Jọṣua 10:6-15; 12:7-24; 14:1-5; Whẹdatọ 2:8-13.



Kanbiọ lẹ

  • Etẹ dọ wẹ Jọṣua te to yẹdide lọ mẹ, podọ etẹwutu?
  • Nawẹ Jehovah gọalọna Jọṣua po awhànfuntọ etọn lẹ po gbọn?
  • Ahọlu kẹntọ nẹmu wẹ jai to Jọṣua nukọn, podọ ojlẹ nẹmu wẹ ehe yí?
  • Naegbọn Jọṣua do má aigba Kenani tọn?
  • Owhe nẹmu wẹ Jọṣua tindo to whenue e kú, podọ etẹwẹ jọ do Islaelivi lẹ go to enẹgodo?

Kanbiọ devo lẹ

  • Hia Jọṣua 10:6-15.

    To yinyọnẹn mẹ dọ Jehovah hẹn owhè po osun po dote na Islaelivi lẹ, jidide tẹwẹ mí dona tindo to egbehe? (Jọṣ. 10:8, 10, 12, 13; Ps. 18:3; Howh. 18:10)

  • Hia Jọṣua 12:7-24.

    Mẹnu na taun tọn wẹ gbawhàn ahọlu 31 tọn to Kenani, podọ naegbọn ehe do yin nujọnu na mí to egbehe? (Jọṣ. 12:7; 24:11-13; Deut. 31:8; Luku 21:9, 25-28)

  • Hia Jọṣua 14:1-5.

    Nawẹ aigba lọ yin mimá to whẹndo Islaelivi lẹ tọn ṣẹnṣẹn gbọn, podọ etẹwẹ ehe dohia gando lehe nulẹ na yin mimá do to Paladisi mẹ go? (Jọṣ. 14:2; Isa. 65:21; Ezek. 47:21-23; 1 Kọl. 14:33)

  • Hia Whẹdatọ 2:8-13.

    Taidi Jọṣua to Islaeli, mẹnu lẹ wẹ nọ hoavùn sọta atẹṣiṣi to egbehe? (Whẹ. 2:8, 10, 11; Mat. 24:45-47; 2 Tẹs. 2:3-6; Titu 1:7-9; Osọ. 1:1; 2:1, 2)