Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 48: Gebiọninu lẹ Yinuwa po Nuyọnẹn Po

Otàn 48: Gebiọninu lẹ Yinuwa po Nuyọnẹn Po

SUSU tòdaho he tin to Kenani lẹ tọn ko wleawu nado funawhàn hẹ Islaeli. Yé lẹndọ emi sọgan duto e ji. Ṣigba mẹhe nọ nọ̀ tòdaho Gebiọni tọn mẹ he ma dẹn do fie Islaelivi lẹ te todin lẹ ma lẹnmọ gba. Yé yise dọ Jiwheyẹwhe na gọalọna Islaelivi lẹ, podọ enẹ wẹ zọ́n bọ yé ma jlo na funawhàn hẹ yé. Enẹwutu, be a yọ́n nuhe Gebiọninu lẹ wà ya?

Yé de nado yì Islaelivi lẹ dè nado yinuwa taidi mẹhe nọ nọ̀ fidindẹn nkọ. Delẹ to sunnu yetọn lẹ mẹ sọ ze awù vúnvún lẹ po afọpa gbigble lẹ po dó. Yé blá apò po akla húhú delẹ po do kẹtẹkẹtẹ yetọn lẹ ji. Yé sọ yì Jọṣua dè bo dọna ẹn dọmọ: ‘Fie míwlẹ wá sọn dẹn taun, na mí ko sè onú voovo lẹ gando Jiwheyẹwhe huhlọnnọ towe he yin Jehovah go wutu. Mí sè nuhe ewọ wà na mì to Egipti lẹpo. Enẹwutu wẹ nukọntọ mítọn lẹ dọna mí dọ mí ni yí núdùdù nado zingbejizọnlin wá dè we nado dọna we dọmọ: “Devi towe wẹ míwlẹ. Dopagbe na mí dọ a ma na funawhàn hẹ míwlẹ gba.” Hiẹ na mọdọ awù mítọn lẹ ko vún dokọna mí podọ akla mítọn lẹ ko hú bo fùnwhà na gbejizọnlin lọ dite wutu.’

Jọṣua po nukọntọ he pò lẹ po yí Gebiọninu lẹ sè. Enẹwutu wẹ yé dopagbe na yé ma nado funawhàn hẹ yé. Ṣigba azán atọ̀n to enẹgodo, yé wá sè dọ fihe Gebiọninu lẹ nọ nọ̀ ma dẹn do yé depope.

‘Etẹwutu mì do dọna mí dọ fidindẹn wẹ mì wá sọn?’ Wẹ Jọṣua kanse yé.

Gebiọninu lẹ sọ gblọn dọmọ: ‘Mí wàmọ na mí ko sè dọ Jehovah Jiwheyẹwhe mìtọn dopagbe aigba Kenani tọn blebu na mì. Enẹ wẹ zọ́n bọ mí dibu dọ mìwlẹ na wá hù mí.’ Ṣigba Islaelivi lẹ hẹn opagbe yetọn di bo ma hù Gebiọninu lẹ. Islaelivi lẹ gbọ bo yí yé do basi devi yetọn lẹ.

Homẹgble ahọlu Jelusalẹm tọn taun na Gebiọninu lẹ ko dín jijọho hẹ Islaelivi lẹ wutu. Enẹwutu wẹ e dowẹn hlan ahọlu ẹnẹ devo lẹ dọmọ: ‘Mì wá gọalọna mi nado funawhàn hẹ Gebiọni.’ Ahọlu atọ́n lọ lẹ sọ wàmọ nugbo. To ahọlu atọ́n he sọ́ awhànnú ehelẹ nukọn, be Gebiọninu lẹ na lẹndọ yé yí nuyọnẹn zan to whenue yé yì dín jijọho hẹ Islaeli wẹ ya? Mí na mọ.

Jọṣua 9:1-27; 10:1-5.

Jọṣua po Gebiọninu lẹ po


Kanbiọ lẹ

  • Aliho tẹ mẹ wẹ Gebiọninu lẹ gbọnvo na Kenaninu he nọ nọ̀ tòdaho he lẹdo yé lẹ mẹ te?
  • Dile e yin didohia to yẹdide lọ mẹ do, etẹwẹ Gebiọninu lẹ wà, podọ etẹwutu?
  • Opagbe tẹwẹ Jọṣua po nukọntọ Islaeli tọn lẹ po do na Gebiọninu lẹ, ṣigba etẹwẹ yé wá mọ to azán atọ̀n godo?
  • Etẹwẹ jọ to whenue ahọlu tòdaho devo lẹ tọn sè dọ Gebiọninu lẹ ko dín jijọho hẹ Islaeli?

Kanbiọ devo lẹ

  • Hia Jọṣua 9:1-27.

    Dile e yindọ Jehovah ko degbena akọta Islaeli tọn “nado hù tòmẹnu aigba lọ tọn lẹpo sẹ̀,” jẹhẹnu tẹlẹ wẹ Gebiọninu lẹ hinhẹn dogbẹ̀ dohia? (Jọṣ. 9:22, 24; Mat. 9:13; Owalọ 10:34, 35; 2 Pita 3:9)

    Gbọn nuyiwa sọgbe hẹ alẹnu etọn hẹ Gebiọninu lẹ dali, nawẹ Jọṣua ze apajlẹ dagbe dai na Klistiani lẹ to egbehe gbọn? (Jọṣ. 9:18, 19; Mat. 5:37; Efe. 4:25)

  • Hia Jọṣua 10:1-5.

    Nawẹ gbẹtọ susugege lọ nọ hodo apajlẹ Gebiọninu lẹ tọn to egbehe gbọn, bo gbọnmọ dali lẹzun nuyànwẹnna etẹ tọn lẹ? (Jọṣ. 10:4; Zek. 8:23; Mat. 25:35-40; Osọ. 12:17)