Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 47: Ajotọ de to Islaeli

Otàn 47: Ajotọ de to Islaeli
Akani to nuhe e fìn lẹ ze whlá

PỌ́N nuhe dawe ehe to zizewhla do gòhọ etọn mẹ! Awugbó dagbedagbe de po sika po gọna fataka delẹ. Tòdaho Jẹliko tọn mẹ wẹ e bẹ yé sọn. Ṣigba, fie wẹ nuhe yin mimọ to Jẹliko lẹ dona yì? Be a ka flin ya?

Yé dona ko yin vivasudo, bọ sika po fataka lọ po dona yì gòhọtúntún Jehovah tọn mẹ. Ṣigba, omẹ ehelẹ ma setonuna Jiwheyẹwhe. Yé ko jẹajo do Jiwheyẹwhe. Dawe enẹ lọ nọ yin Akani, podọ mẹhe tin po e po lẹ yin apadewhe whẹndo etọn tọn. Gbọ mì ni pọ́n nuhe jọ lọ.

Whenuena Akani ko fìn onú ehelẹ godo wẹ Jọṣua do sunnu delẹ hlan nado yì funawhàn hẹ tòdaho Ai tọn. Ṣigba, yé ma duto awhàn lọ ji. Mẹdelẹ yin hùhù, bọ mẹhe pò lẹ họ̀n lẹkọ. E vẹna Jọṣua taun. E họ́ jẹ aigba bo hodẹ̀ hlan Jehovah bo dọmọ: ‘Etẹwutu a do dike bọ ehe jọ do mí go?’

Jehovah sọ gblọn dọmọ: ‘Fọ́n ṣite! Islaeli ko waylando. Yé ko yí delẹ to nuhe dona yin vivasudo kavi yin bibẹ do gòhọtúntún Jehovah tọn mẹ lẹ mẹ. Yé fìn awugbó dagbedagbe de bo ze e whlá do nuglọ. Eyin mì ma và mẹhe fìnnú lọ po nuhe e fìn lọ lẹ po sudo, yẹn ma na dona mì.’ Jehovah dọ dọ emi na do dawe ylankan lọ hia Jọṣua.

Jọṣua sọ bẹ mẹlẹpo pli dopọ, bọ Jehovah de dawe ylankan lọ Akani gbà. Akani sọ dọmọ: ‘Yẹn ko waylando. Yẹn mọ awugbó dagbedagbe de po sika po gọna fataka delẹ. Yé yọ́n to nukun ṣie mẹ sọmọ bọ yẹn bẹ yé. Mì yì gòhọ ṣie mẹ, mì na mọ fie yé yin whiwhla do.’

To whenue onú ehelẹ yin mimọ bosọ yin hinhẹnwa Jọṣua dè, e dọna Akani dọmọ: ‘Etẹwutu wẹ hiẹ dọ̀n mí biọ tukla mẹ? Todin, Jehovah na hẹn tukla wá hiẹ lọsu ji.’ Whenẹnu wẹ mẹlẹpo jẹ zannu dlan do Akani po whẹndo etọn po ji kaka bọ yemẹpo kú. Be enẹ ma dohia dọ mí ma dona fìnnú gbede ya?

To enẹgodo, Islaeli sọ tọ́nyi nado hoavùn hẹ Ai whladopo dogọ. To ojlẹ ehe mẹ Jehovah gọalọna omẹ etọn lẹ bọ yé sọ duto awhàn lọ ji.

Jọṣua 7:1-26; 8:1-29.



Kanbiọ lẹ

  • Mẹnu wẹ dawe lọ he to adọkunnu he yin bibẹ sọn Jẹliko delẹ ze whlá to yẹdide lọ mẹ, podọ mẹnu wẹ yin mẹhe to alọgọna ẹn lẹ?
  • Naegbọn nuyiwa Akani po whẹndo etọn po tọn ylan sọmọ?
  • Etẹwẹ Jehovah dọ to whenue Jọṣua kàn nuhewutu Islaelivi lẹ do ṣíawhàn to Ai sè?
  • Etẹwẹ jọ do Akani po whẹndo etọn po go to whenue yé yin hinhẹnwa Jọṣua nukọn?
  • Onú titengbe tẹwẹ mí plọn sọn owhẹ̀ he yin didá na Akani lọ mẹ?

Kanbiọ devo lẹ

  • Hia Jọṣua 7:1-26.

    Etẹwẹ odẹ̀ Jọṣua tọn lẹ dohia gando haṣinṣan etọn hẹ Mẹdatọ lọ go? (Jọṣ. 7:7-9; Ps. 119:145; 1 Joh. 5:14)

    Etẹwẹ apajlẹ Akani tọn dohia, podọ nawẹ ehe yin avase de na mí gbọn? (Jọṣ. 7:11, 14, 15; Howh. 15:3; 1 Tim. 5:24; Heb. 4:13)

  • Hia Jọṣua 8:1-29.

    Azọngban tẹwẹ dopodopo mítọn tindo to agun Klistiani tọn mẹ to egbehe? (Jọṣ. 7:13; Lev. 5:1; Howh. 28:13)