Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 46: Adó Jẹliko Tọn Lẹ

Otàn 46: Adó Jẹliko Tọn Lẹ

ETẸWẸ zọ́n bọ adó Jẹliko tọn ehelẹ do to hihọ́? E taidi dọ bọmbu daho de wẹ jẹ yé ji nkọ. Ṣigba to ojlẹ enẹlẹ mẹ bọmbu lẹ ma ko tin; podọ osò lẹ lọsu ma tlẹ tin. Azọ́njiawu Jehovah tọn devo wẹ ehe sọ yin ga! Gbọ mí ni pọ́n lehe e jọ do.

Adó Jẹliko tọn lẹ to hihọ́

Jehovah dọna Jọṣua dọmọ: ‘Hiẹ po awhànfuntọ towe lẹ po na deawhànfọ lẹdo tòdaho lọ pé. Mì na nọ deawhànfọ lẹdo e whladopo to gbèdopo na azán ṣidopo. Mì hẹn aki alẹnu tọn lọ. Yẹwhenọ ṣinawe na to nukọn bo to opẹ̀n yetọn lẹ kún.

‘To azán ṣinawetọ gbè, mì na deawhànfọ lẹdo tòdaho lọ whla ṣinawe. Enẹgodo, mì na kún opẹ̀n mìtọn lẹ bọ yé na do ogbè he tata de bọ mẹlẹpo nasọ dabobo awhàn tọn. Podọ adó lọ lẹ nasọ họ́ to afọdopolọji.’

Jọṣua po akọta lọ po wà nuhe Jehovah dọ. Whenuena yé to awhànfọ de, mẹlẹpo wẹ nabọẹ. Mẹdepope ma dọho. Nuhe yè to sisè to whenẹnu ma hugan nudidọ opẹ̀n lẹ tọn po afọgbè awhànfuntọ lẹ tọn po. Obu na ko jẹ kẹntọ Jiwheyẹwhe tọn he tin to Jẹliko lẹ ji. Be a mọ okàn vẹẹ he yin sìnsìn do fleṣe go enẹ ya? Fleṣe mẹnu tọn wẹ enẹ? Lahabi ko wà nuhe amẹ́ awe lọ lẹ biọ to e si nado wà. Whẹndo etọn blebu to ohọ̀ lọ mẹ po e po bo to nulẹ pọ́n.

Jọṣua

To godo mẹ, to azán ṣinawetọ gbè, whenue yé ko deawhànfọ lẹdo tòdaho lọ whla ṣinawe, bọ opẹ̀n lẹ ko dọnú, awhànfuntọ lẹ dabobo, bọ adó lẹ sọ họ́. Enẹgodo, Jọṣua dọmọ: ‘Mì hù mẹhe tin to tòdaho lọ mẹ lẹpo bosọ fiọ ẹ. Mì fiọ onú lẹpo. Fataka, sika, ogànvẹẹ, po gànyuu po kẹdẹ wẹ mí ni whlá, bosọ yí yé do núzinzan gòhọ Jiwheyẹwhe tọn lẹ mẹ.’

Jọṣua sọ dọna amẹ́ awe lọ lẹ dọmọ: ‘Mì yì owhé Lahabi tọn gbè, bo de ewọ po whẹndo etọn po tọ́njẹgbonu.’ Lahabi po whẹndo etọn po yin whinwhlẹngán dile amẹ́ awe lọ lẹ dopagbe etọn na ẹn do.

Jọṣua 6:1-25.



Kanbiọ lẹ

  • Etẹwẹ Jehovah dọna awhànfuntọ lẹ po yẹwhenọ lẹ po nado wà na azán ṣidopo?
  • Etẹwẹ yé dona wà to azán ṣinawetọ gbè?
  • Dile yin didohia do to yẹdide lọ mẹ, etẹwẹ to jijọ do adó Jẹliko tọn lẹ go?
  • Naegbọn okàn vẹẹ de do yin sìnsìn do fleṣe go?
  • Etẹwẹ Jọṣua dọna awhànfuntọ lẹ nado wà na tòdaho lọ po mẹhe nọ nọ̀ e mẹ lẹ po, ṣigba etẹwẹ dogbọn fataka, sika, gànvẹẹ, po gànyuu po dali?
  • Etẹwẹ amẹ́ awe lọ lẹ yin didọna nado wà?

Kanbiọ devo lẹ

  • Hia Jọṣua 6:1-25.

    Nawẹ awhànfọ he Islaelivi lẹ de lẹdo Jẹliko to azán ṣinawetọ gbè taidi azọ́n yẹwhehodidọ tọn he Kunnudetọ Jehovah tọn lẹ to wiwà to azán godo tọn ehelẹ mẹ gbọn? (Jọṣ. 6:15, 16; Isa. 60:22; Mat. 24:14; 1 Kọl. 9:16)

    Nawẹ dọdai he tin to Jọṣua 6:26 mẹ mọ hẹndi to nudi owhe 500 delẹ godo gbọn, podọ etẹwẹ ehe plọn mí gando ohó Jehovah tọn go? (1 Ahọ. 16:34; Isa. 55:11)

Plọnnu Dogọ

Lahabi Hodo Anademẹ Lẹ

Whẹndo dopo yin whinwhlẹngán to whenue adó Jẹliko tọn lẹ họliai.