Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 45: Yé Dasá Tọ̀sisa Jọdani

Otàn 45: Yé Dasá Tọ̀sisa Jọdani

PỌ́N! Islaelivi lẹ to tọ̀sisa Jọdani dasá! Ṣigba fie wẹ osin lọ te? Nukunwhiwhe vude jẹnukọnna nujijọ ehe, tọ̀sisa lọ gọfla na jikun ja taun to ojlẹ owhe lọ tọn ehe mẹ wutu. Ṣigba osin lọ lẹpo ko yì todin! Podọ aigba he ji Islaelivi lẹ to zọnlinzin te ko hú dile e jọ do to Ohù Vẹẹ didasa whenu! Fie wẹ osin lọ lẹpo yì? Gbọ mí ni pọ́n.

Islaelivi lẹ to Tọ̀sisa Jọdani dasá

To whenue ojlẹ sọ na Islaelivi lẹ nado dasá Tọ̀sisa Jọdani, Jehovah biọ to Jọṣua si nado dọna akọta lọ dọmọ: ‘Yẹwhenọ lẹ ni ze aki alẹnu tọn lọ bo jẹnukọn. Eyin afọ yetọn lẹ gbẹ́ biọ Tọ̀sisa Jọdani mẹ, sisà osin lọ tọn lẹ na doalọte.’

Enẹwutu, yẹwhenọ lẹ ze aki alẹnu tọn lọ bo jẹnukọnna akọta lọ. Whenuena yé jẹ Jọdani, yẹwhenọ lẹ ze afọ do osin lọ mẹ nugbo. Osin lọ siso taun bosọ to sisà po zingidi po. Ṣigba to whenue afọ yẹwhenọ lẹ tọn jẹ osin lọ mẹ tlolo, e jẹ tenọ ji! Onú jiawu de wẹ ehe! Jehovah ko hò osin lọ plido apadopo. To ojlẹ kleun de godo, osin masọ tin to fie tọ̀sisa lọ te ba!

Yẹwhenọ he ze aki alẹnu tọn lọ lẹ yì tọ̀sisa he hú lọ ṣẹnṣẹn tlọlọ. Be a mọ yé to yẹdide lọ mẹ ya? Dile yé nọte to finẹ, Islaelivi lẹpo zinzọnlin dasá Tọ̀sisa Jọdani lọ gbọn aigba húhú ji!

To whenue yemẹpo dasá tọ̀sisa lọ godo, Jehovah biọ to Jọṣua si nado dọna sunnu huhlọnnọ 12 dọmọ: ‘Mì yì fie yẹwhenọ he hẹn aki alẹnu tọn lọ lẹ nọte do to tọ̀sisa lọ mẹ. Mì ṣinyan zannu 12, bosọ tò yé dopọ do fihe mì na nọ to ozán ehe mẹ. Podọ, to whenue ovi mìtọn lẹ na kàn nuhe zannu ehelẹ zẹẹmẹdo biọ mì to sọgodo, mì na dọna yé dọ sisà osin lọ tọn doalọte to whenue aki alẹnu tọn Jehovah tọn lọ dasá Jọdani. Zannu lọ lẹ na nọ flin mì azọ́njiawu ehe!’ Jọṣua lọsu sọ bẹ zannu 12 plido fie yẹwhenọ lẹ nọte do to tọ̀sisa lọ ṣẹnṣẹn.

Jọṣua

To godo mẹ, Jọṣua dọna yẹwhenọ he ze aki alẹnu tọn lọ lẹ dọmọ: ‘Mì tọ́n sọn Jọdani mẹ.’ To whenue yé tọ́n jẹage tlolo, osin tọ̀sisa lọ tọn lẹ sọ jẹ sisà ji.

Jọṣua 3:1-17; 4:1-18.



Kanbiọ lẹ

  • Azọ́njiawu tẹwẹ Jehovah wà na Islaelivi lẹ nido sọgan dasá Tọ̀sisa Jọdani?
  • Azọ́n yise tọn tẹwẹ Islaelivi lẹ dona wà nado sọgan dasá Tọ̀sisa Jọdani?
  • Naegbọn Jehovah dọna Jọṣua nado ṣinyan zannu 12 sọn tọ̀sisa lọ mẹ?
  • Etẹwẹ jọ to whenue yẹwhenọ lẹ tọ́n jẹage sọn Jọdani lọ mẹ tlolo?

Kanbiọ devo lẹ

  • Hia Jọṣua 3:1-17.

    Dile e yin didohia do to kandai ehe mẹ, etẹwẹ mí dona wà nado mọ alọgọ po dona Jehovah tọn po? (Jọṣ. 3:13, 15; Howh. 3:5; Jak. 2:22, 26)

    Etẹwẹ jọ to whenue Islaelivi lẹ dasá Tọ̀sisa Jọdani jẹ Aigba Pagbe tọn ji godo, podọ nawẹ ehe pagigona oyín Jehovah tọn gbọn? (Jọṣ. 3:15; 4:18; Ps. 66:5-7)

  • Hia Jọṣua 4:1-18.

    Etẹwẹ yin lẹndai zannu 12 he yin bibẹ sọn Jọdani mẹ bo yin tito do Gilgali lẹ tọn? (Jọṣ. 4:4-7)