Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 44: Lahabi Whlá Amẹ́ Lẹ

Otàn 44: Lahabi Whlá Amẹ́ Lẹ

DAWE ehelẹ to owù mẹ. Yé dona họ̀n, e ma yinmọ yè na hù yé. Amẹ́ lẹ wẹ yé yin sọn Islaelivi lẹ mẹ, podọ Lahabi wẹ nawe he to alọgọna yé lọ nọ yin. Owhé he gbè Lahabi nọ nọ̀ ehe yin gbigbá do adó tòdaho Jẹliko tọn ji. Gbọ mí ni dindona nuhewutu dawe ehelẹ do to owù mẹ.

Islaelivi lẹ ko wleawu nado dasá Tọ̀sisa Jọdani bo jẹ aigba Kenani tọn ji. Ṣigba jẹnukọnna enẹ, Jọṣua do amẹ́ awe hlan. Jọṣua sọ dọna yé dọmọ: ‘Mì yì bo yì fìn aigba lọ po tòdaho Jẹliko tọn lọ po pọ́n.’

Lahabi po amẹ́ Islaelivi awe po

Whenue amẹ́ lẹ biọ Jẹliko, yé yì owhé Lahabi tọn gbè. Ṣigba mẹde ko yì fìn dọna ahọlu Jẹliko tọn dọmọ: ‘Islaelivi awe biọ otò lọ mẹ to zánmẹ nado fìn in pọ́n.’ To whenuena ahọlu sè ehe, e do sunnu delẹ hlan Lahabi bọ yé dọna ẹn dọmọ: ‘De dawe he to owhé towe gbè lẹ tọ́n!’ Ṣigba Lahabi ko whlá amẹ́ lọ lẹ do ozà ohọ̀ etọn tọn ji. Lahabi sọ dọmọ: ‘Nugbo wẹ dọ dawe delẹ wá dè e, ṣigba yẹn ma yọ́n fie yé wá sọn gba. Yé sọ tọ́nyi to whenue zinvlu jẹ dido ji, whẹpo yè do sú họngbo tòdaho lọ tọn lẹ. Eyin mì yawu din, mì sọgan yàn yé wle!’ Podọ sunnu lọ lẹ sọ ze ali lọ dedo nugbo.

To whenue yé yì godo, Lahabi họ̀nwezun yì ozà ohọ̀ etọn tọn ji. E dọna amẹ́ lọ lẹ dọmọ: ‘Yẹn yọnẹn dọ Jehovah na na mì aigba ehe. Mí ko sè aliho he mẹ ewọ má Ohù Vẹẹ lọ do awe do to whenue mì tọ́n sọn Egipti podọ lehe mì hù ahọlu Sihọni po Ogi tọn po do. Yẹn ko wà dagbe na mì, enẹwutu mì jaale bo dopà dọ mìlọsu na wà dagbe na mi. Mì na whlẹn otọ́ ṣie, onọ̀ ṣie, nọvisunnu ṣie lẹ, po nọviyọnnu ṣie lẹ po.’

Amẹ́ lẹ dopagbe dọ emi na wàmọ, ṣigba Lahabi lọsu dona yí nude wà. Yé dọna Lahabi dọmọ: ‘Yí okàn vẹẹ ehe bo sìn in do fleṣe towe go, bosọ bẹ hẹnnumẹ towe lẹpo pli do owhé towe gbè. Eyin mí wá nado yí Jẹliko, mí na mọ okàn ehe to fleṣe towe go bo ma na hù mẹdepope to owhé towe gbè.’ Whenuena amẹ́ lọ lẹ lẹkọyi Jọṣua dè, yé dogbè nuhe jọ lẹpo tọn na ẹn.

Jọṣua 2:1-24; Heblu lẹ 11:31.



Kanbiọ lẹ

  • Fie wẹ Lahabi nọ nọ̀?
  • Mẹnu wẹ dawe awe he tin to yẹdide lọ mẹ lẹ, podọ etẹwutu wẹ yé do tin to Jẹliko?
  • Etẹwẹ Ahọlu Jẹliko tọn degbena Lahabi nado wà, podọ etẹwẹ yin gblọndo etọn?
  • Nawẹ Lahabi gọalọna dawe awe lọ lẹ gbọn, podọ etẹwẹ e biọ sọn yé si?
  • Opagbe tẹwẹ amẹ́ awe lọ lẹ do na Lahabi?

Kanbiọ devo lẹ

  • Hia Jọṣua 2:1-24.

    Nawẹ opagbe Jehovah tọn he yin kinkàndai to Eksọdusi 23:28 mẹ mọ hẹndi gbọn to whenue Islaelivi lẹ tọ́nawhàn Jẹliko? (Jọṣ. 2:9-11)

  • Hia Heblu lẹ 11:31.

    Nawẹ apajlẹ Lahabi tọn zinnudo lehe yise yin nujọnu do ji gbọn? (Lom. 1:17; Heb. 10:39; Jak. 2:25)

Plọnnu Dogọ

Lahabi Tindo Yise to Jehovah Mẹ

Plọnnu gando lehe Lahabi po hẹnnumẹ etọn lẹ po mọ whlẹngán to whenue Jẹliko yin vivasudo do go.