Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 43: Jọṣua Lẹzun Nukọntọ

Otàn 43: Jọṣua Lẹzun Nukọntọ

MOSE jlo na yì Kenani po Islaelivi lẹ po. Nuhe zọ́n niyẹn bọ e dọna Jehovah dọ: ‘Jehovah E, jaale bo dike ma dasá Tọ̀sisa Jọdani nado mọ aigba dagbe enẹ lọ.’ Ṣigba Jehovah gblọn dọmọ: ‘Danido! Masọ lẹkọwa ohó enẹ ji ba blo!’ Be hiẹ yọ́n nuhewutu Jehovah do dọ mọ ya?

Nuhe jọ to whenue Mose linú osé lọ wẹ zọ́n. Flindọ, ewọ po Aalọn po ma pagigona Jehovah to whenẹnu. Yé ma dọna akọta lọ dọ Jehovah wẹ na yé osin sọn osé lọ mẹ. Enẹwutu wẹ Jehovah dọ dọ yé ma na biọ Kenani mẹ.

Enẹwutu, osun vude to okú Aalọn tọn godo, Jehovah dọna Mose dọmọ: ‘Yí Jọṣua bo hẹn ẹn nọte to Eleazali yẹwhenọ lọ po akọta lọ po nukọn, bo dọna yemẹpo dọ Jọṣua wẹ yin nukọntọ yọyọ lọ.’ Eyin dọ a pọ́n yẹdide lọ, a na mọdọ Mose wà nuhe Jehovah dọ lọ pẹpẹ.

Mose to Jọṣua dohia di nukọntọ

Enẹgodo, Jehovah dọna Jọṣua dọmọ: ‘Yin huhlọnnọ, bo ma dibu blo. Na hiẹ wẹ na plan Islaelivi lẹ yì aigba Kenani tọn he yẹn dopagbe etọn na yé lọ ji, podọ yẹn na tin hẹ we.’

To nukọn mẹ, Jehovah sọ dọna Mose nado hẹ́ aga Osó Nebo tọn to aigba Moabi tọn ji. Mose sọgan mọ Tọ̀sisa Jọdani godo hlan sọn finẹ bosọ mọ aigba dagbedagbe Kenani tọn lọ hlan. Jehovah dọmọ: ‘Aigba he yẹn dopagbe etọn na ovi Ablaham, Isaki po Jakọbu po tọn lẹ lọ niyẹn. Yẹn ko na we dotẹnmẹ nado mọ ẹn ṣigba afọ towe ma na jẹ finẹ.’

Aga Osó Nebo tọn lọ ji wẹ Mose kú do. Owhe 120 wẹ e tindo. E gbẹ́ tindo huhlọn bosọ nọ mọnú ganji to whenẹnu. Akọta lọ blawu taun bosọ viavi na okú Mose tọn wutu. Ṣigba, homẹ yetọn hùn nado mọ nukọntọ yọyọ devo he yin Jọṣua.

Osọha lẹ 27:12-23; Deutelonomi 3:23-29; 31:1-8, 14-23; 32:45-52; 34:1-12.



Kanbiọ lẹ

  • To yẹdide lọ mẹ, mẹnu wẹ yin dawe awe he nọte hẹ Mose lọ lẹ?
  • Etẹwẹ Jehovah dọna Jọṣua?
  • Naegbọn Mose do hẹ́ aga Osó Nebo tọn, podọ etẹwẹ Jehovah dọna ẹn?
  • Owhe nẹmu wẹ Mose tindo to whenuena e kú?
  • Naegbọn gbẹtọ lọ lẹ do blawu, ṣigba whẹwhinwhẹ́n tẹwẹ yé tindo nado jaya?

Kanbiọ devo lẹ

  • Hia Osọha lẹ 27:12-23.

    Azọngban titengbe tẹwẹ Jọṣua mọyi sọn Jehovah dè, podọ nawẹ Jehovah nọ penukundo omẹ Etọn lẹ go to egbehe gbọn? (Sọh. 27:15-19; Owalọ 20:28; Heb. 13:7)

  • Hia Deutelonomi 3:23-29.

    Naegbọn Jehovah ma do na dotẹnmẹ Mose po Aalọn po nado yì aigba pagbe tọn lọ ji, podọ etẹwẹ mí sọgan plọn sọn ehe mẹ? (Deut. 3:25-27; Sọh. 20:12, 13)

  • Hia Deutelonomi 31:1-8, 14-23.

    Nawẹ hogbe godo tọn he Mose yizan na Islaelivi lẹ dohia dọ e yí whiwhẹ do kẹalọyi mẹplọnlọ Jehovah tọn gbọn? (Deut. 31:6-8, 23)

  • Hia Deutelonomi 32:45-52.

    Nawẹ Ohó Jiwheyẹwhe tọn dona yinuwado gbẹzan mítọn ji gbọn? (Deut. 32:47; Lev. 18:5; Heb. 4:12)

  • Hia Deutelonomi 34:1-12.

    Dile etlẹ yindọ Mose ma mọ Jehovah nukun-sọ-nukun to paa mẹ, etẹwẹ Deutelonomi 34:10 dohia gando haṣinṣan etọn hẹ Jehovah go? (Eks. 33:11, 20; Sọh. 12:8)