Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 42: Kẹtẹkẹtẹ de Dọho

Otàn 42: Kẹtẹkẹtẹ de Dọho

BE HIẸ ko sè bọ kẹtẹkẹtẹ de dọho pọ́n ya? Lala, hiẹ ma sè pọ́n na kanlin lẹ ma nọ dọho wutu. Ṣigba, Biblu dọna mí dọ kẹtẹkẹtẹ de dọho pọ́n. Gbọ mí ni pọ́n lehe e jọ do.

Angẹli de

Islaelivi lẹ ko dibla jẹ aigba Kenani tọn ji. Balaki, he yin ahọlu Moabi tọn to budina yé. Enẹwutu wẹ e dowẹn hlan dawe bibitọ de he nọ yin Balaami nado yì hodẹ̀do Islaelivi lẹ. Balaki dopagbe dọ emi na yí akuẹ susu na Balaami, enẹwutu wẹ Balaami do hẹ́ kẹtẹkẹtẹ etọn ji bosọ dedo Balaki dè.

Jehovah ma jlo dọ Balaami ni hodẹ̀do omẹ Etọn lẹ. Nuhe zọ́n niyẹn bọ e do angẹli he hẹn ohí gaa de hlan nado nọte to aliji na Balaami. Balaami ma sọgan mọ angẹli lọ ṣigba kẹtẹkẹtẹ etọn mọ ẹn. Kẹtẹkẹtẹ lọ tẹnpọn nado họ̀nna angẹli lọ bọ e glo, bọ e gbọ bo mlọnai do ali lọ ji. Balaami gblehomẹ taun, podọ e jẹ opò lì kẹtẹkẹtẹ lọ ji.

Enẹwutu, Jehovah na dotẹnmẹ Balaami nado sè hodidọ kẹtẹkẹtẹ etọn tọn. Kẹtẹkẹtẹ lọ kanse dọmọ: ‘Etẹwẹ yẹn wà na we bọ a do to hihò mi?’

Balaami to kẹtẹkẹtẹ ji

Balaami dọmọ: ‘Hiẹ ko yinuwa hẹ mi po mẹmasi po. Eyin ohí to asi e wẹ, yẹn na ko hù we!’

Kẹtẹkẹtẹ lọ kanse dọmọ: ‘Be yẹn ko wàmọ na we pọ́n wẹ ya?’

Balaami gblọn dọ, ‘Lala.’

Whenẹnu wẹ Jehovah dike bọ Balaami mọ angẹli lọ ṣite to aliho ji po ohí po to alọmẹ. Angẹli lọ dọmọ: ‘Etẹwutu hiẹ do hò kẹtẹkẹtẹ towe? Yẹn wá nado súali na we, na a nikaa yì hodẹ̀do Islaeli. Eyin kẹtẹkẹtẹ towe ma ko họ̀nna mi, yẹn na ko hù we, ṣigba yẹn ma na gbleawuna kẹtẹkẹtẹ towe.’

Balaami dọmọ: ‘Yẹn ko waylando. Yẹn ma yọnẹn dai dọ hiẹ wẹ nọte to ali lọ ji.’ Angẹli lọ jo Balaami do nado yì podọ Balaami sọ yì mọ Balaki nugbo. E gbẹ́ tẹnpọn nado hodẹ̀do Islaeli janwẹ, ṣigba Jehovah hẹn ẹn nado dona Islaeli whla atọ̀n.

Osọha lẹ 21:21-35; 22:1-40; 23:1-30; 24:1-25.



Kanbiọ lẹ

  • Mẹnu wẹ yin Balaki, podọ naegbọn e dowẹn hlan Balaami?
  • Naegbọn kẹtẹkẹtẹ Balaami tọn do mlọnai to aliji?
  • Etẹwẹ Balaami sè sọn onù kẹtẹkẹtẹ etọn tọn mẹ?
  • Etẹwẹ angẹli de dọna Balaami?
  • Etẹwẹ jọ to whenue Balaami tẹnpọn nado hodẹ̀do Islaeli?

Kanbiọ devo lẹ

  • Hia Osọha lẹ 21:21-35.

    Naegbọn Islaeli do gbawhàn Ahọlu Sihọni Amolinu lẹ tọn po Ahọlu Ogi Baṣani tọn po? (Sọh. 21:21, 23, 33, 34)

  • Hia Osọha lẹ 22:1-40.

    Etẹwẹ whàn Balaami nado tẹnpọn nado hodẹ̀do Islaeli, podọ etẹwẹ mí sọgan plọn sọn ehe mẹ? (Sọh. 22:16, 17; Howh. 6:16, 18; 2 Pita 2:15; Juda 11)

  • Hia Osọha lẹ 23:1-30.

    Dile etlẹ yindọ Balaami dọho taidi sinsẹ̀n-basitọ Jehovah tọn de, nawẹ nuyiwa etọn lẹ do nudevo pete hia gbọn? (Sọh. 23:3, 11-14; 1 Sam. 15:22)

  • Hia Osọha lẹ 24:1-25.

    Nawẹ kandai Biblu tọn ehe hẹn yise mítọn lodo gando hẹndi lẹndai Jehovah tọn lẹ tọn go gbọn? (Sọh. 24:10; Isa. 54:17)