Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 41: Odàn Gànvẹẹ Tọn Lọ

Otàn 41: Odàn Gànvẹẹ Tọn Lọ
Mose po odàn gànvẹẹ tọn lọ po

BE ODÀN jọ odàn de wẹ yin nuhe hásá do atin go ehe ya? Lala. Odàn he yè yí gànvẹẹ do basi de wẹ. Jehovah wẹ dọna Mose nado ze e plá do atin lọ go na gbẹtọ lẹ nido nọ pọ́n ẹn nado nọgbẹ̀. Ṣigba, odàn jọ odàn lẹ wẹ tin to aigba. Yé ko hàndú gbẹtọ lẹ bosọ doazọ̀n yé. Be a yọ́n nuhewutu wẹ ya?

Na Islaelivi lẹ ko dọho agọ̀ do Jiwheyẹwhe po Mose po go wutu wẹ. Yé to hùnhlún dọmọ: ‘Etẹwutu a do plan mí sọn Egipti nado wá kú to zungbo ehe mẹ? Núdùdù ma tin mọ osin masọ tin. Mọ mí masọ sọgan fọ́n bo to manna ehe dù.’

Ṣogan, núdùdù dagbe wẹ manna lọ. Gbọn azọ́njiawu dali wẹ Jehovah nọ na núdùdù lọ yé. Podọ gbọn azọ́njiawu dali wẹ e sọ do na yé osin. Ṣigba, gbẹtọ lẹ ma dopẹ́ na aliho he mẹ Jiwheyẹwhe to nukunpedo yé go te. Nuhe zọ́n niyẹn bọ Jehovah do do odàn adínọ lẹ hlan nado sayana Islaelivi lẹ. Odàn lọ lẹ dù yé, bọ susu yetọn sọ kú.

Odàn lẹ hàndú Islaelivi lẹ

To godo mẹ, gbẹtọ lẹ wá Mose dè bo dọmọ: ‘Mí ko waylando, na mí ko dọho agọ̀ do Jehovah po hiẹ po go. Todin, hodẹ̀ hlan Jehovah na ni de odàn ehelẹ sẹ̀.’

Mose sọ hodẹ̀ do ota gbẹtọ lẹ tọn mẹ nugbo. Jehovah sọ dọna Mose nado basi odàn gànvẹẹ tọn ehe. E dọna ẹn nado ze e plá do atin de go, podọ mẹdepope he odàn dù ni ze nukun etọn daga bo pọ́n odàn gànvẹẹ tọn lọ. Mose wà nuhe Jiwheyẹwhe dọna ẹn lọ pẹpẹ. Podọ mẹdepope he odàn dù nọ pọ́n odàn gànvẹẹ tọn lọ nugbo bosọ nọ gọ̀ jẹgangan.

Mí dona plọn nude sọn ehe mẹ. To aliho de mẹ, mímẹpo wẹ taidi Islaelivi he odàn dù enẹlẹ. To egbehe, a na mọdọ gbẹtọ lẹ nọ poyọnho, bo nọ jẹazọ̀n bosọ nọ kú. Nuhe zọ́n wẹ yindọ Adam po Evi po he yin sunnu tintan po yọnnu tintan po lẹ́ sọn Jehovah dè bọ mímẹpo ka wẹ yin ovi yetọn lẹ. Ṣigba, Jehovah ko basi tito devo na mí nido sọgan nọgbẹ̀ kakadoi.

Jehovah do Ovi etọn, Jesu Klisti hlan aigba ji. Jesu yin whiwhè do atin go, na mẹsusu lẹndọ ewọ yin mẹylankan wutu. Ṣigba, na mí nido mọ whlẹngán wutu wẹ zọ́n bọ Jehovah do Jesu hlan. Eyin mí nọ pọ́n ẹn hlan bo nọ hodo e, mí sọgan mọ ogbẹ̀ madopodo. To nukọn mẹ, mí na plọnnu dogọ gando ehe go.

Osọha lẹ 21:4-9; Johanu 3:14, 15.



Kanbiọ lẹ

  • Etẹwẹ hásá do atin go to yẹdide lọ mẹ, podọ naegbọn Jehovah do dọna Mose nado ze e do finẹ?
  • Nawẹ gbẹtọ lẹ yin mayọndagbenọ na nuhe Jiwheyẹwhe wà na yé lẹpo gbọn?
  • Etẹwẹ gbẹtọ lẹ biọ to Mose si nado wà to whenue Jehovah do odàn adínọ lẹ hlan nado sayana yé?
  • Naegbọn Jehovah dọna Mose nado basi odàn gànvẹẹ tọn de?
  • Etẹwẹ mí sọgan plọn sọn otàn ehe mẹ?

Kanbiọ devo lẹ

  • Hia Osọha lẹ 21:4-9.

    Avase tẹwẹ mí mọyi sọn nuhlundọ Islaelivi lẹ tọn mẹ gando awuwledainanu Jehovah tọn lẹ go? (Sọh. 21:5, 6; Lom. 2:4)

    Nawẹ Islaelivi lẹ yí odàn gànvẹẹ tọn lọ zan to owhe kanweko lẹ godo gbọn, podọ afọdide tẹwẹ Ahọlu Hẹzekia ze? (Sọh. 21:9; 2 Ahọ. 18:1-4)

  • Hia Johanu 3:14, 15.

    Nawẹ odàn gànvẹẹ tọn lọ zizedo atin go yin dohia lehe Jesu Klisti yin zizedo yatin ji tọn gbọn? (Gal. 3:13; 1 Pita 2:24)