Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 40: Mose Linú Osé Lọ

Otàn 40: Mose Linú Osé Lọ

OWHE lẹ to yìyì debọdo-dego—owhe 10, owhe 20, owhe 30, owhe 39! Ganṣo Islaelivi lẹ gbẹ́ pò to zungbo mẹ. Ṣigba to owhe ehe lẹpo gblamẹ Jehovah gbẹ́ pò to nukunpedo omẹ etọn lẹ go. Manna wẹ e na yé taidi núdùdù. E nọ na hinhọ́n yé to okle po dòtin aslọ tọn po podọ to zánmẹ po dòtin miyọ́n tọn po. Podọ to owhe ehe lẹpo gblamẹ, avọ̀ yetọn lẹ ma vún mọ afọ yetọn lẹ masọ jí.

Din wẹ mí wá osun tintan owhe 40tọ tọn sọn whenue yé ko tọ́n sọn Egipti. Islaelivi lẹ ko sọ dosla lẹdo Kadẹṣi whladopo dogọ. Finẹ wẹ yé tin te to whenue amẹ́ 12 lẹ yin didohlan nado yì fìn aigba Kenani tọn pọ́n nudi owhe 40 die. Kadẹṣi finẹ wẹ nọviyọnnu Mose tọn Miliami kú te. Podọ dile mí na mọ do, onú ylankan devo sọ jọ to filọ.

Gbẹtọ lẹ ma mọ osin depope. Yé sọ dowhẹgbe hẹ Mose dọmọ: ‘E na ko pọnte eyin mí ko kú do dọ́n. Etẹwutu a do hẹn mí sọn Egipti wá ofi ylankan he nudepope ma sọgan wú te ehe? Nudepope ma tin taidi okún, ovòtin, ovẹntin-sinsẹ́n kavi pomeglanate. Osin he gbẹtọ sọgan nù depope ma tin.’

Mose to nuli osó lọ

Whenuena Mose po Aalọn po yì gòhọtúntún lọ mẹ bo hodẹ̀, Jehovah dọna Mose dọmọ: ‘Pli gbẹtọ lọ lẹ dopọ. Enẹgodo, dọhona osé enẹ to nukọn yemẹpo tọn. Osin he na pé yemẹpo po kanlin yetọn lẹpo po na tọ́n sọn e mẹ.’

Mose sọ pli gbẹtọ lẹ nugbo, bo dọna yé dọmọ: ‘Mì dotoai, mì mẹhe ma dejido Jiwheyẹwhe go ehelẹ! Be yẹn po Aalọn po ni hẹn osin tọ́n sọn osé ehe mẹ na mì wẹ?’ Enẹgodo wẹ Mose yí opò etọn bo linú osé lọ whla awe bọ osin susugege sọ tọ́njẹgbonu sọn osé lọ mẹ. Kanlin lẹ po gbẹtọ lẹpo po nùsin bọ e pé yé.

Ṣigba, Jehovah gblehomẹ do Mose po Aalọn po go. Be hiẹ yọ́n nuhewutu wẹ? Na Mose po Aalọn po dọ dọ yewlẹ wẹ to osin na detọ́n sọn osé lọ mẹ wutu. Ṣigba, nado dọ hójọhó Jehovah wẹ de osin lọ tọ́n. Podọ na Mose po Aalọn po ma do nugbo ehe hia wutu, Jehovah dọ dọ emi na wọhẹ yé. ‘Mìwlẹ ma na plan omẹ ṣie lẹ biọ Kenani,’ wẹ e dọ.

E masọ dẹn bọ Islaelivi lẹ tọ́n sọn Kadẹṣi. Ojlẹ vude to enẹgodo, yé wá jẹ Osó Holi kọ̀n. To aga osó ehe tọn ji wẹ Aalọn kú do. Owhe 123 mẹvi wẹ e yin to whenue e kú. E vẹna Islaelivi lẹ taun bọ yemẹpo sọ ví Aalọn na azán 30. Visunnu Aalọn tọn Eleazali sọ lẹzun yẹwhenọ daho akọta Islaeli tọn do otẹn otọ́ etọn tọn mẹ.

Osọha lẹ 20:1-13, 22-29; Deutelonomi 29:5; Nẹhemia 9:21.



Kanbiọ lẹ

  • Nawẹ Jehovah penukundo Islaelivi lẹ go gbọn to zungbo mẹ?
  • Whẹgbè tẹwẹ Islaelivi lẹ do to whenue yé dosla do Kadẹṣi?
  • Nawẹ Jehovah na osin gbẹtọ lẹ po kanlin yetọn lẹ po gbọn?
  • To yẹdide lọ mẹ, mẹnu wẹ dawe he to alọdlẹndo ede lọ, podọ naegbọn e do to mọwà?
  • Naegbọn Jehovah gblehomẹ do Mose po Aalọn po go, podọ nawẹ Jehovah wọhẹ yé gbọn?
  • Etẹwẹ jọ to Osó Holi kọ̀n, podọ mẹnu wẹ lẹzun yẹwhenọ daho Islaeli tọn?

Kanbiọ devo lẹ

  • Hia Osọha lẹ 20:1-13, 22-29 po Deutelonomi 29:5 po.

    Etẹwẹ mí plọn sọn aliho he mẹ Jehovah penukundo Islaelivi lẹ go te to zungbo mẹ? (Deut. 29:5; Mat. 6:31; Heb. 13:5; Jak. 1:17)

    Nukun tẹwẹ Jehovah yí do pọ́n awugbopo Mose po Aalọn po tọn nado klan oyín etọn do wiwe to Islaeli nukọn? (Sọh. 20:12; 1 Kọl. 10:12; Osọ. 4:11)

    Etẹwẹ mí sọgan plọn sọn aliho he mẹ Mose yinuwa te mẹ to whenue Jehovah domẹplọnlọ e go? (Sọh. 12:3; 20:12, 27, 28; Deut. 32:4; Heb. 12:7-11)