Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 39: Opò Aalọn Tọn De Vounvoun lẹ Tọ́n

Otàn 39: Opò Aalọn Tọn De Vounvoun lẹ Tọ́n

PỌ́N vounvoun po sinsẹ́n almọndi tọn bibia he tọ́n to opò ehe ji lẹ po. Opò Aalọn tọn wẹ. Vounvoun ehelẹ po sinsẹ́n bibia lọ lẹ po wú do opò Aalọn tọn ji to zánto dopo mẹ! Gbọ mí ni pọ́n nuhewutu wẹ.

Mose to opò he de vounvoun tọ́n lọ ze na Aalọn

Islaelivi lẹ ko to dindanpe to zungbo mẹ din na ojlẹ de. Delẹ to gbẹtọ lọ lẹ mẹ ma lẹndọ Mose dona yin nukọntọ bọ Aalọn na yin yẹwhenọ daho. Kola yin dopo to mẹhe to mọ lẹn lẹ mẹ gọna Datani, Abilami po nukọntọ 250 devo lẹ po. Omẹ ehe lẹpo wá Mose dè bo dọmọ: ‘Etẹwutu hiẹ do ze dewe daga do mí mẹhe pò lẹ ji?’

Mose sọ dọna Kola po gbẹdohẹmẹtọ etọn lẹ po dọmọ: ‘Mì hẹn agbán nuwhẹ́nwan tọn bo yí miyọ́n po nuwhẹ́nkun po do e mẹ bo ze wá to osọ afọnnu. Mì bo wá gòhọtúntún Jehovah tọn kọ̀n. Mí na mọ mẹhe Jehovah na de.’

To wunkẹngbe, Kola po gbẹdohẹmẹtọ 250 etọn lẹ po wá gòhọtúntún lọ kọ̀n nugbo. Mẹsusu devo lẹ sọ hodo yé wá nado nọgodona yé. Jehovah gblehomẹ taun. Mose dọmọ: ‘Mì nọla na gòhọ mẹylankan ehelẹ tọn. Mì doalọ onú yetọn depope go blo.’ Gbẹtọ lọ lẹ sọ setonu bo họ̀n sọn gòhọ Kola, Datani po Abilami po tọn mẹ.

Enẹgodo, Mose dọmọ: ‘Gbọn ehe dali wẹ mìwlẹ na yọ́n mẹhe Jehovah ko de. Aigba na kẹnù bo ze mẹylankan ehelẹ mì.’

Whenuena Mose dọho fó tlolo wẹ aigba kẹnù etọn. Gòhọ Kola tọn gọna nutindo etọn lẹ to pọmẹ hẹ Datani po Abilami po gọna mẹhe tin topọ hẹ yé lẹpo wẹ aigba lọ ze mì. Whenuena mẹhe pò lẹ sè avigbè mẹhe to odò mẹ biọ lẹ tọn, yé dawhá dọmọ: ‘Mì họ̀n! Na aigba nikaa ze mílọsu mì!’

Kola po gbẹdohẹmẹtọ 250 etọn lẹ po gbẹ́ pò to gòhọtúntún lọ kọ̀n. Jehovah sọ do miyọ́n hlan bọ e fiọ yemẹpo. Enẹgodo, Jehovah dọna visunnu Aalọn tọn Eleazali nado ze agbán nuwhẹ́nwan tọn mẹhe kú lọ lẹ tọn bo yí yé do basi nùsu pẹvi de na agbà lọ. Nùsu he e basi do agbà lọ nù ehe yin avase de na Islaelivi lẹ dọ depope to yé mẹ ma dona yinuwa taidi yẹwhenọ na Jehovah, gbọnvona Aalọn po visunnu etọn lẹ po.

Ṣigba Jehovah jlo na hẹn ẹn họnwun ganji dọ Aalọn po visunnu etọn lẹ po wẹ emi ko de nado yin yẹwhenọ lẹ. Enẹwutu wẹ e dọna Mose dọmọ: ‘Gbọ nukọntọ dopodopo to whẹndo Islaeli tọn lẹ mẹ ni ze opò etọn wá. Aalọn lọsu ni bo hẹn opò etọn wá taidi nukọntọ whẹndo Levi tọn. Enẹgodo, ze opò dopodopo do gòhọtúntún lọ mẹ do nukọn aki alẹnu lọ tọn. Opò mẹhe tọn na de vounvoun lẹ tọ́n wẹ yẹn ko de taidi yẹwhenọ.’

Whenuena Mose yì to wunkẹngbe, opò Aalọn tọn ji wẹ vounvoun po almọndi bibia lẹ po wú do. Be a mọ nuhewutu Jehovah do hẹn opò Aalọn tọn nado de vounvoun lẹ tọ́n todin ya?

Osọha lẹ 16:1-49; 17:1-11; 26:10.



Kanbiọ lẹ

  • Mẹnu lẹ wẹ ṣiatẹ sọta aṣẹpipa Mose po Aalọn po tọn, podọ etẹwẹ yé dọna Mose?
  • Etẹwẹ Mose dọna Kola po gbẹdohẹmẹtọ etọn 250 lẹ po nado wà?
  • Etẹwẹ Mose dọna gbẹtọ lẹ, podọ etẹwẹ jọ to hodidọ etọn godo tlolo?
  • Etẹwẹ jọ do Kola po gbẹdohẹmẹtọ etọn 250 lẹ po go?
  • Etẹwẹ Eleazali, visunnu Aalọn tọn, yí agbán nuwhẹ́nwan tọn mẹhe kú lọ lẹ tọn do wà, podọ etẹwutu?
  • Naegbọn Jehovah do dike bọ opò Aalọn tọn de vounvoun lẹ tọ́n? (Pọ́n yẹdide.)

Kanbiọ devo lẹ

  • Hia Osọha lẹ 16:1-49.

    Etẹwẹ Kola po gbẹdohẹmẹtọ etọn lẹ po wà, podọ etẹwutu ehe do yin nuyiwa atẹṣiṣi tọn sọta Jehovah? (Sọh. 16:9, 10, 18; Lev. 10:1, 2; Howh. 11:2)

    Pọndohlan agọ̀ tẹwẹ Kola po ‘ogán 250 sọn agun lọ mẹ’ po wleawuna? (Sọh. 16:1-3; Howh. 15:33; Isa. 49:7)

  • Hia Osọha lẹ 17:1-11 po 26:10 po.

    Etẹwẹ vounvoun he opò Aalọn tọn detọ́n lẹ dohia, podọ naegbọn Jehovah do degbè dọ ni yin sisẹdo do aki lọ mẹ? (Sọh. 17:5, 8, 10)

    Onú titengbe tẹwẹ mí sọgan plọn sọn ohia opò Aalọn tọn mẹ? (Sọh. 17:10; Owalọ 20:28; Flp. 2:14; Heb. 13:17)

Plọnnu Dogọ

Yẹdide Aalọn He to Biblu mẹ Tọn

Naegbọn Jiwheyẹwhe ma dike bọ Aalọn yì aigba opagbe tọn lọ ji?