Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 38: Amẹ́ 12 Lẹ

Otàn 38: Amẹ́ 12 Lẹ
Amẹ́ Islaelivi lẹ hẹn atin-sinsẹ́n

PỌ́N atin-sinsẹ́n he omẹ ehelẹ hẹn. Pọ́n lehe ohín etọn klo do. Sunnu awe plipli wẹ hẹn opò he ji e te do abọ́ ji. Sọ pọ́n ovò-sinsẹ́n po pomeglanate lọ lẹ po. Fie wẹ yé mọ atin-sinsẹ́n dagbedagbe ehelẹ te? Aigba Kenani tọn ji wẹ. Flindọ Ablaham, Isaki po Jakọbu po nọ Kenani pọ́n. Ṣigba, Jakọbu po whẹndo etọn po sẹtẹn yì Egipti na huvẹ he fọ́n to Kenani wutu. Nudi owhe 216 to ehegodo wẹ Mose plan Islaelivi lẹ lẹkọ jei Kenani todin. Fihe yé jẹ to zungbo lọ mẹ todin nọ yin yiylọdọ Kadẹṣi.

Mẹylankan lẹ wẹ nọ nọ̀ aigba Kenani tọn ji. Enẹwutu wẹ Mose do amẹ́ 12 hlan bo dọna yé dọmọ: ‘Mì yì pọ́n eyin mẹhe nọ nọ̀ finẹ lẹ sù bosọ dohuhlọn. Mì pọ́n eyin aigba lọ yọ́n na jinukun lẹ. Podọ mì sọ tẹnpọn nado hẹn delẹ to atin-sinsẹ́n etọn lẹ mẹ wá.’

Whenuena amẹ́ lọ lẹ lẹkọwa Kadẹṣi, yé dọna Mose dọmọ: ‘Otò lọ yọ́n taun.’ Podọ yé sọ do delẹ to atin-sinsẹ́n etọn lẹ mẹ hia Mose nado dohia dọ nugbo wẹ nuhe dọ yé te. Ṣigba 10 to amẹ́ lọ lẹ mẹ dọmọ: ‘Mẹhe nọ nọ̀ finẹ lẹ klo bosọ dohuhlọn taun. Mímẹpo wẹ na yin hùhù eyin mí tẹnpọn nado yí aigba lọ.’

Obu jẹ Islaelivi lẹ ji whenuena yé sè ehe. ‘E na ko pọnte na mí nado kú do Egipti kavi etlẹ yin do zungbo ehe mẹ,’ wẹ yé dọ. ‘Mí na yin hùhù to awhàngbenu podọ asi mítọn lẹ po ovi mítọn lẹ po na yin bibẹ yì. Mì gbọ mí ni de nukọntọ yọyọ devo do Mose tẹnmẹ, bo lẹkọyi Egipti!’

Ṣigba awe to amẹ́ lọ lẹ mẹ dejido Jehovah go bosọ tẹnpọn nado whiwhẹ gbẹtọ lọ lẹ. Yinkọ yetọn wẹ Jọṣua po Kalẹbu po. Yé dọmọ: ‘Mì dibu blo. Jehovah tin po mí po. Mí na yí aigba lọ po awubibọ po.’ Ṣigba gbẹtọ lọ lẹ ma dotoai. Yé tlẹ jlo na hù Jọṣua po Kalẹbu po.

Ehe hẹn homẹgble Jehovah taun bọ e sọ dọna Mose dọmọ: ‘Depope to omẹ enẹlẹ mẹ bẹsọn owhe 20 sọyi ma na jẹ aigba Kenani tọn ji. Yé ko mọ azọ́njiawu he yẹn basi to Egipti podọ to zungbo mẹ, ṣogan yé ma dejido go e. Enẹwutu wẹ yé na dánpe to zungbo lọ mẹ na owhe 40 kakajẹ whenue omẹ godo tọn na kú. Jọṣua po Kalẹbu po kẹdẹ wẹ na jẹ aigba Kenani tọn lọ ji.’

Osọha lẹ 13:1-33; 14:1-38.



Kanbiọ lẹ

  • Nawẹ a mọ ohín atin-sinsẹ́n he tin to yẹdide lọ mẹ tọn do, podọ fie wẹ e wá sọn?
  • Naegbọn Mose do amẹ́ 12 hlan aigba Kenani tọn ji?
  • Etẹwẹ amẹ́ ao dọ to whenue yé lẹkọwa Mose dè?
  • Nawẹ amẹ́ awe do jidide hia to Jehovah mẹ gbọn, podọ nawẹ yé nọ yin?
  • Naegbọn Jehovah gblehomẹ, podọ etẹwẹ e dọna Mose?

Kanbiọ devo lẹ

  • Hia Osọha lẹ 13:1-33.

    Mẹnu lẹ wẹ yin dide nado yì bẹ̀ aigba lọ pọ́n, podọ dotẹnmẹ hundote daho tẹwẹ yé tindo? (Sọh. 13:2, 3, 18-20)

    Naegbọn pọndohlan Jọṣua po Kalẹbu tọn po do gbọnvo na amẹ́ he pò lẹ tọn, podọ etẹwẹ mí plọn sọn ehe mẹ? (Sọh. 13:28-30; Mat. 17:20; 2 Kọl. 5:7)

  • Hia Osọha lẹ 14:1-38.

    Avase tẹwẹ mí dona setonuna ma nado nọ hlunnudọ do afọzedaitọ Jehovah tọn he tin to aigba ji lẹ go? (Sọh. 14:2, 3, 27; Mat. 25:40, 45; 1 Kọl. 10:10)

    Nawẹ Osọha lẹ 14:24 dohia dọ Jehovah nọ tindo ojlo nujọnu tọn to devizọnwatọ etọn dopodopo mẹ gbọn? (1 Ahọ. 19:18; Howh. 15:3)