Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 37: Gòhọ Sinsẹ̀n-Bibasi Tọn De

Otàn 37: Gòhọ Sinsẹ̀n-Bibasi Tọn De

BE A yọ́n nuhe ohọ̀ ehe tin na ya? Gòhọ vonọtaun na sinsẹ̀n-bibasi Jehovah tọn wẹ. E sọ nọ yin yiylọdọ gòhọtúntún. Gbẹtọ lẹ fó ohọ̀ ehe gbigbá to owhe dopo godo to whenuena yé lẹkọ sọn Egipti. Be a yọ́n mẹhe biọ dọ ohọ̀ ehe ni yin gbigbá ya?

Gòhọtúntún lọ

Jehovah wẹ. To whenue Mose tin to Osó Sinai ji, Jehovah dọ lehe e na gbá ohọ̀ lọ do na ẹn. E dọ dọ yé ni gbá ẹ to aliho de mẹ na e nido sọgan wá yin túntún do voovo po awubibọ po. Gbọnmọ dali, adà etọn lẹ sọgan yin zizeyì fidevo bo yin tito dopọ. Enẹ zọ́n bọ, eyin Islaelivi lẹ sẹtẹn sọn fide-jẹ-fide to zungbo mẹ, yé nọ to yìyì po gòhọ lọ po.

Eyin hiẹ pọ́n abò pẹvi he to vivọnu gòhọ lọ tọn mẹ hlan, a na mọ apotin de. Ehe wẹ nọ yin yiylọdọ aki alẹnu tọn lọ. E tindo angẹli kavi kelubimi awe he yè yí sika do basi lẹ, dopo to adusi mẹ awetọ to amiyọn mẹ. Jiwheyẹwhe sọ vọ́ Gbedide Ao lẹ wlan do zannu plẹ́bẹ́ awe devo lẹ ji na Mose ko gbà tintan lẹ wutu. Podọ zannu ehelẹ yin whiwhla do aki alẹnu tọn lọ mẹ. Mọdopolọ, ozẹ́n pẹvi he mẹ manna tin te de to aki lọ mẹ ga. Be hiẹ flin nuhe yin manna ya?

Nọvisunnu Mose tọn, Aalọn, wẹ Jehovah de nado yin yẹwhenọ daho. Ewọ wẹ nọ nọnukọnna gbẹtọ lẹ nado sẹ̀n Jehovah. Ovi etọn lẹ yin yẹwhenọ ga.

Todin, pọ́n abò daho gòhọ lọ tọn mẹ hlan. Whla awe wẹ e yí do klohugan abò pẹvi lọ. Be a mọ apotin lọ po azọ̀ he to tintọ́n sọn e mẹ po ya? Enẹ wẹ agbà he ji yẹwhenọ lẹ nọ mẹ̀n onú voovo delẹ he nọ yin yiylọdọ nuwhẹ́nkun te. Enẹgodo, hiẹ na mọ zògbántin de he tindo miyọ́ngbán ṣinawe. Tafo wẹ yin onú atọ̀ntọ he to abò lọ mẹ. Akla 12 nọ tin to tafo lọ ji.

Sinhẹnnú daho he osin gọ́ e mẹ de, tin to lẹdo gòhọtúntún lọ tọn mẹ. Yẹwhenọ lẹ nọ yí i zan nado klọ́ alọ po afọ po. Agbà daho de sọ tin to nọtẹn enẹ lọ ga. Finẹ wẹ kanlin lẹ nọ yin mimẹ̀ te taidi avọ́sinsan de na Jehovah. Gòhọ sinsẹ̀n-bibasi tọn lọ tin to osla Islaelivi lẹ tọn ṣẹnṣẹn, bọ Islaelivi lẹ nọ nọ̀ gòhọ yetọn titi lẹ mẹ lẹdo e.

Eksọdusi 25:8-40; 26:1-37; 27:1-8; 28:1; 30:1-10, 17-21; 34:1, 2; Heblu lẹ 9:1-5.



Kanbiọ lẹ

  • Nawẹ ohọ̀ he tin to yẹdide lọ mẹ nọ yin yiylọdọ, podọ etẹwẹ e nọ yin yiyizan na?
  • Naegbọn Jehovah do dọna Mose nado basi gòhọ lọ to aliho de mẹ na e nido sọgan wá yin túntún do voovo po awubibọ po?
  • Apotin tẹwẹ tin to abò pẹvi he to vivọnu gòhọ lọ tọn mẹ, podọ etẹwẹ tin to apotin lọ mẹ?
  • Mẹnu wẹ Jehovah de nado yin yẹwhenọ daho, podọ etẹwẹ yẹwhenọ daho nọ wà?
  • Slẹ onú atọ̀n he tin to abò daho gòhọ lọ tọn mẹ lẹ.
  • Onú awe tẹlẹ wẹ tin to lẹdo gòhọtúntún lọ tọn mẹ, podọ etẹwẹ yé nọ yin yiyizan na?

Kanbiọ devo lẹ

  • Hia Eksọdusi 25:8-40; 26:1-37; 27:1-8; po 28:1 po.

    Etẹwẹ kelubimi he tin to “aki kunnuhó lọ tọn” ji lẹ nọtena? (Eks. 25:20, 22; Sọh. 7:89; 2 Ahọ. 19:15)

  • Hia Eksọdusi 30:1-10, 17-21; 34:1, 2; po Heblu lẹ 9:1-5 po.

    Naegbọn Jehovah do zinnudo wiwejininọ to agbasa-liho ji na yẹwhenọ he nọ wazọ́n to gòhọtúntún mẹ lẹ, podọ nawẹ ehe dona yinuwado mí ji to egbehe gbọn? (Eks. 30:18-21; 40:30, 31; Heb. 10:22)

    To wekanhlanmẹ apọsteli Paulu tọn hlan Heblu lẹ mẹ, nawẹ e dohia gbọn dọ gòhọtúntún po Osẹ́n alẹnu lọ tọn po masọ yọ́n-na-yizan ba? (Heb. 9:1, 9; 10:1)