Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 36: Oyìnvu Sika Tọn Lọ

Otàn 36: Oyìnvu Sika Tọn Lọ

OJE! Etẹ wà wẹ Islaelivi lẹ te todin? Yé to sinsẹ̀n basi hlan oyìnvu de! Etẹwutu yé do to mọwà?

To whenuena Mose to dindẹn to osó lọ ji, gbẹtọ lọ lẹ dọmọ: ‘Mí ma yọ́n nuhe jọ do Mose go. Enẹwutu mì gbọ mí ni basi yẹwhe de he na plan mí sọn aigba ehe ji.’

Mose ze zannu plẹ́bẹ́ awe lọ lẹ dlan kọmẹ

Mẹdaho Mose tọn, Aalọn, dọmọ: ‘Eyọn. Mì de tómẹnu sika tọn mìtọn lẹ bo bẹ yé wá na mi.’ To whenuena yé wàmọ, Aalọn yọ́ tómẹnu lọ lẹ dopọ bo yí i do basi oyìnvu sika tọn de. Gbẹtọ lọ lẹ sọ dọmọ: ‘Ehe wẹ Jiwheyẹwhe mítọn he plan mí tọ́n sọn Egipti!’ Enẹgodo, Islaelivi lẹ basi hùnwhẹ daho de, bo basi sinsẹ̀n hlan oyìnvu sika tọn lọ.

To whenuena Jehovah mọ ehe, e gblehomẹ tlala. Enẹwutu e dọna Mose dọmọ: ‘Yawu jẹte. Gbẹtọ lẹ to nuylankan daho de wà. Yé ko wọnji osẹ́n ṣie lẹ go bo to didẹ́ do odò na oyìnvu sika tọn de.’

Gbẹtọ lẹ to oyìnvu sika tọn de sẹ̀n

Mose yawu jẹte sọn osó lọ ji. To whenuena e sẹpọ odò, nuhe e mọ die. Gbẹtọ lẹ to hànji bo to wedú lẹdo oyìnvu sika tọn lọ! Mose gblehomẹ sọmọ bọ e ze zannu plẹ́bẹ́ awe he ji osẹ́n te lọ lẹ dlan, bọ yé gbà hányán. Enẹgodo e yọ́ oyìnvu sika tọn lọ bo lì i pọ́dọ́pọ́dọ́.

Nuhe gbẹtọ lọ lẹ wà ylan taun. Enẹwutu Mose dọna delẹ to sunnu lẹ mẹ nado ze ohí yetọn lẹ. Mose dọmọ: ‘Mẹylankan he sẹ̀n oyìnvu sika tọn lọ lẹ dona kú.’ Podọ sunnu lọ lẹ hù gbẹtọ 3 000! Be ehe ma plọn mí dọ mí dona họ́ míde nado nọ sẹ̀n Jehovah kẹdẹ, kakati nido yin yẹwhe lalo lẹ ya?

Eksọdusi 32:1-35.



Kanbiọ lẹ

  • Etẹ wà wẹ gbẹtọ lẹ te to yẹdide lọ mẹ, podọ etẹwutu?
  • Naegbọn Jehovah do gblehomẹ, podọ etẹwẹ Mose wà to whenue e mọ nuhe wà gbẹtọ lẹ te?
  • Etẹwẹ Mose dọna sunnu delẹ nado wà?
  • Etẹwẹ mí dona plọn sọn otàn ehe mẹ?

Kanbiọ devo lẹ

  • Hia Eksọdusi 32:1-35.

    Nawẹ kandai ehe do nukun he Jehovah nọ yí do pọ́n sinsẹ̀n lalo kinkọndopọ hẹ sinsẹ̀n-bibasi nugbo hia gbọn? (Eks. 32:4-6, 10; 1 Kọl. 10:7, 11)

    Etẹ go wẹ Klistiani lẹ dona payi to nudide yetọn gando ayidedai lẹ taidi hànjiji po wedudu po go mẹ? (Eks. 32:18, 19; Efe. 5:15, 16; 1 Joh. 2:15-17)

    Nawẹ whẹndo Levi tọn ze apajlẹ dagbe de dai na mí na nuhe dù titẹdo dodowiwa go gbọn? (Eks. 32:25-28; Ps. 18:25)