Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 34: Núdùdù Yọyọ De

Otàn 34: Núdùdù Yọyọ De

BE HIẸ yọ́n nuhe gbẹtọ lẹ to ṣinṣinyan to kọmẹ to yẹdide ehe mẹ ya? Núdùdù wẹ. E taidi linfin bo wé ṣéṣé.

Islaelivi lẹ to manna ṣinyan

Nudi osun dopo poun wẹ ko juwayi sọn whenue gbọ́n Islaelivi lẹ tọ́n sọn Egipti. Yé tin to zungbo mẹ. Núdùdù ma sù to finẹ, enẹwutu Islaelivi lẹ jẹ hùnhlún ji dọmọ: ‘E na ko pọnte dọ Jehovah ni hù mí do Egipti. E whè gbau nuhe jlo mí lẹpo wẹ mí nọ mọ dù to dọ́n.’

Enẹwutu Jehovah dọmọ: ‘Yẹn na na mì núdùdù sọn agahomẹ taidi jikun.’ Podọ nuhe Jehovah wà lọ pẹpẹ niyẹn. To whenuena owùn kẹn bọ Islaelivi lẹ mọ onú wewe he ja do aigba ehe, yé kanse yenọzo dọmọ: ‘Etẹ die?’

Mose dọmọ: ‘Núdùdù he Jehovah na mì nado dù die.’ Gbẹtọ lẹ ylọ núdùdù ehe dọ MANNA. E nọ vivi taidi akla he yè yí owín do basi.

Mose dọna gbẹtọ lẹ dọmọ: ‘Dehe mẹdopodopo sọgan dù wẹ e ni bẹpli.’ Podọ mọ wẹ yé nọ basi do to afọnnu lẹpo. Eyin owhè jẹ sinsinyẹn ji, manna he pò to kọmẹ nọ yọ́.

Mose sọ dọmọ: ‘Mẹdepope ma dona bẹ manna sẹdo kakajẹ aihọngbè gba.’ Ṣigba mẹdelẹ ma setonu. Be a yọ́n nuhe jọ ya? Manna he yé bẹpli jẹ wunkẹngbe lẹ jìwé bo jẹ wánlùn ji!

Ṣigba azán dopo tin to osẹ gblamẹ he ji Jehovah dọna gbẹtọ lẹ dọ yé ni nọ bẹ manna lọ pli whla awe hugan lehe yé nọ wà do. Azán ṣidopotọ wẹ. Jehovah dọna yé dọ yé ni nọ pò manna lọ dai jẹ wunkẹngbe, na emi ma na nọ hẹn manna nado ja to azán ṣinawetọ gbè. Eyin yé pò manna dai jẹ azán ṣinawetọ gbè, e ma nọ jìwé bo masọ nọ lunwán! Azọ́njiawu devo wẹ ehe lọsu yin!

To owhe he Islaelivi lẹ yizan to zungbo mẹ lẹpo gblamẹ, manna wẹ yin núdùdù he Jehovah na yé.

Eksọdusi 16:1-36; Osọha lẹ 11:7-9; Jọṣua 5:10-12.



Kanbiọ lẹ

  • To yẹdide lọ mẹ, etẹwẹ gbẹtọ lẹ to ṣinṣinyan sọn aigba, podọ nawẹ e nọ yin yiylọdọ?
  • Anademẹ tẹwẹ Mose na gbẹtọ lẹ gando manna ṣinṣinyan go?
  • Etẹwẹ Jehovah dọna gbẹtọ lẹ nado nọ wà to azán ṣidopotọ gbè, podọ etẹwutu?
  • Azọ́njiawu tẹwẹ Jehovah nọ wà to whenuena manna yin zizedai jẹ azán ṣinawetọ gbè?
  • Nawẹ Jehovah yí manna do na núdùdù gbẹtọ lẹ dẹnsọ?

Kanbiọ devo lẹ

  • Hia Eksọdusi 16:1-36 po Osọha lẹ 11:7-9 po.

    Etẹwẹ Eksọdusi 16:8 dohia na nuhe dù sisi nina mẹhe yin dide to agun Klistiani tọn mẹ lẹ? (Heb. 13:17)

    To zungbo mẹ, nawẹ Islaelivi lẹ nọ yin nuflin egbesọegbesọ dọ yé dona ganjẹ Jehovah go gbọn? (Eks. 16:14-16, 35; Deut. 8:2, 3)

    Zẹẹmẹ yẹhiadonu tọn tẹwẹ Jesu basi gando manna go, podọ nawẹ mí mọaleyi sọn “akla sọn olọn mẹ” ehe mẹ gbọn? (Joh. 6:31-35, 40)

  • Hia Jọṣua 5:10-12.

    Owhe nẹmu wẹ Islaelivi lẹ do dù manna, whlepọn tẹwẹ ehe zedonukọnna yé, podọ etẹwẹ mí sọgan plọn sọn kandai ehe mẹ? (Eks. 16:35; Sọh. 11:4-6; 1 Kọl. 10:10, 11)