Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 33: Yé Dasá Ohù Vẹẹ Lọ

Otàn 33: Yé Dasá Ohù Vẹẹ Lọ

PỌ́N nuhe to jijọ tofi! Mose wẹ mẹhe dlẹn opò etọn do Ohù Vẹẹ lọ ji. Mẹhe yin whinwhlẹngán po e po to adà awetọ ohù lọ tọn ji lẹ wẹ Islaelivi lẹ. Ṣigba mẹhe to tọ̀kú lọ lẹ wẹ Falo po awhànpa etọn blebu po. Gbọ mí ni pọ́n lehe nulọ jọ do.

Awhànpa Egipti tọn to sisiọ

Dile mí ko plọn do, Falo dọna Islaelivi lẹ nado yì sọn Egipti to whenuena Jiwheyẹwhe hẹn azọ̀nylankan 10tọ wá Egiptinu lẹ ji godo. Islaelivi sunnu diblayi 600 000 wẹ yì sọn otò lọ mẹ, gọna yọnnu lẹ po ovi lẹ po. Humọ, mẹsusu devo he ko yise to Jehovah mẹ lẹ hodo Islaelivi lẹ yì. Yemẹpo wẹ bẹ lẹngbọ, gbọgbọẹ po oyìn yetọn lẹ po yì.

Whẹpo Islaelivi lẹ do yì, yé biọ avọ̀ gọna núzinzan sika po fataka po tọn lẹ to Egiptinu lẹ si. Azọ̀nylankan godo tọn lọ ko hẹn obu daho de wá Egiptinu lẹ ji. Enẹwutu nuhe Islaelivi lẹ biọ lẹpo wẹ yé na yé.

To azán vude godo, Islaelivi lẹ wá Ohù Vẹẹ lọ kọ̀n. Yé gbọjẹ to finẹ. To ojlẹ enẹ mẹ, e jẹ vivẹ na Falo po omẹ etọn lẹ po ji dọ yé ko jo Islaelivi lẹ do nado yì. Yé dọmọ: ‘Mí ko na dotẹnmẹ afanumẹ mítọn lẹ nado yì!’

Enẹwutu Falo diọlinlẹn whladopo dogọ. E degbè nado wleawuna awhànkẹkẹ po awhànfuntọ etọn lẹ po to niyaniya mẹ. E sọ jẹgodona Islaelivi lẹ po awhànkẹkẹ vonọtaun 600 po, gọna awhànkẹkẹ Egipti tọn devo lẹ.

To whenuena Islaelivi lẹ mọ Falo po awhànpa etọn lẹ po to godo na yé, obu daho jẹ yé ji. Fie yé sọgan họ̀n gbọn de ma tin. Ohù Vẹẹ to nukọn na yé bọ Egiptinu lẹ ja to godo na yé. Ṣigba Jehovah yí aslọ de do omẹ etọn lẹ po Egiptinu lẹ po ṣẹnṣẹn. Gbọnmọ dali, Egiptinu lẹ ma sọgan mọ Islaelivi lẹ nado wle yé.

Whenẹnu wẹ Jehovah dọna Mose nado dlẹn opò etọn do Ohù Vẹẹ lọ ji. To whenuena e wàmọ, Jehovah hẹn jẹhọn sinsinyẹn whèzẹtẹn tọn de nado yìn. Osin ohù lọ tọn lẹ má do awe bo nọte to adusi po amiyọn po mẹ di adó de.

Islaelivi lẹ jẹ zọnlinzin ji gbọn aigba-kló ji to ohù lọ ṣẹnṣẹn. E yí ganhiho susu to gbẹtọ livi susu lọ lẹ po kanlin yetọn lẹ po si nado gbọn ohù lọ ṣẹnṣẹn awuyẹyẹ-afọyẹyẹ kakajẹ adà awetọ ji. To godo mẹ, Egiptinu lẹ wá penugo nado mọ Islaelivi lẹ whladopo dogọ. Afanumẹ yetọn lẹ to hinhọ̀n yì! Enẹwutu yé dómọna yé biọ ohù lọ mẹ po zingidi po.

To whenuena yé wàmọ, Jiwheyẹwhe de kẹkẹfọ yetọn lẹ sẹ̀. Obu jẹ Egiptinu lẹ ji bọ yé jẹ awhádo ji dọmọ: ‘Jehovah to avùnho na Islaelivi lẹ sọta mí. Mì gbọ mí ni họnyi sọn fi!’ Ṣigba whenu ko fẹ́.

Ojlẹ enẹ mẹ Jehovah dọna Mose nado dlẹn opò etọn do Ohù Vẹẹ lọ ji, dile a sọgan mọ do to yẹdide lọ mẹ. Podọ to whenuena Mose wàmọ, adò osin tọn lọ lẹ jẹ hihọ́ ji bo ṣinyọ́n Egiptinu lẹ po awhànkẹkẹ yetọn lẹ po ji. Awhànfuntọ lọ lẹpo ko hodo Islaelivi lẹ biọ ohù lọ mẹ. Podọ dopo to Egiptinu lẹ mẹ ma luntọ́n!

Lehe homẹ omẹ Jiwheyẹwhe tọn lẹpo tọn hùn nado yin whinwhlẹngán do sọ! Sunnu lẹ jihàn pẹdido tọn de hlan Jehovah dọmọ: ‘Jehovah ko gbawhàn gigo tọn de. E ko takitina osọ́ lẹ po hihẹtọ yetọn lẹ po do ohù mẹ.’ Nọviyọnnu Mose tọn Miliami ze akọ̀hún etọn bọ yọnnu lẹpo hodo e po akọ̀hún yetọn lẹ po. Podọ dile yé to wedú po ayajẹ po, yé jihàn dopolọ he sunnu lẹ to jiji dọmọ: ‘Jehovah ko gbawhàn gigo tọn de. E ko takitina osọ́ lẹ po hihẹtọ yetọn lẹ po do ohù mẹ.’

Eksọdusi weta 12 jẹ 15.



Kanbiọ lẹ

  • Islaelivi sunnu nẹmu wẹ yì sọn Egipti, to pọmẹ hẹ yọnnu lẹ po ovi lẹ po, podọ mẹnu lẹ wẹ hodo yé?
  • Etẹwẹ yin numọtolanmẹ Falo tọn to whenuena e jo Islaelivi lẹ do nado yì godo, podọ etẹwẹ e wà?
  • Etẹwẹ Jehovah wà na alọ Egiptinu lẹ tọn nikaa jẹ omẹ etọn lẹ go?
  • Etẹwẹ jọ to whenuena Mose dlẹn opò etọn do Ohù Vẹẹ lọ ji, podọ etẹwẹ Islaelivi lẹ wà?
  • Etẹwẹ jọ to whenuena Egiptinu lẹ dómọna Islaelivi lẹ biọ ohù lọ mẹ?
  • Nawẹ Islaelivi lẹ do ayajẹ yetọn hia bo dopẹna Jehovah na whlẹngán yetọn wutu gbọn?

Kanbiọ devo lẹ

  • Hia Eksọdusi 12:33-36.

    Nawẹ Jehovah hẹn ẹn diun dọ omẹ etọn lẹ mọ ahọsumẹ yí na owhe he yé do yin afanumẹ to Egipti lẹpo gbọn? (Eks. 3:21, 22; 12:35, 36)

  • Hia Eksọdusi 14:1-31.

    Nawẹ hogbe Mose tọn he yin kinkàndai to Eksọdusi 14:13, 14 mẹ lẹ nọ yinuwado omẹ Jehovah tọn egbezangbe tọn lẹ ji gbọn dile yé to nukundo awhàn Amagẹdọni tọn? (2 Otan. 20:17; Ps. 91:8)

  • Hia Eksọdusi 15:1-8, 20, 21.

    Naegbọn devizọnwatọ Jehovah tọn lẹ dona nọ jihàn pipà tọn hlan ẹn? (Eks. 15:1, 2; Ps. 105:2, 3; Osọ. 15:3, 4)

    Apajlẹ tẹwẹ Miliami po yọnnu he tin po e po to Ohù Vẹẹ lọ kọ̀n lẹ po zedai na yọnnu Klistiani lẹ to egbehe na nuhe dù gigopipana Jehovah? (Eks. 15:20, 21; Ps. 68:11)