Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 32: Azọ̀nylankan Ao Lẹ

Otàn 32: Azọ̀nylankan Ao Lẹ

PỌ́N yẹdide ehelẹ. Dopodopo yetọn do azọ̀nylankan he Jehovah hẹnwa Egipti ji lẹ hia. To yẹdide tintan mẹ, a sọgan mọ Aalọn to opò etọn lì Tọ̀sisa Nile mẹ. Whenuena e wàmọ, osin he tin to tọ̀sisa lọ mẹ lẹzun ohùn. Whèvi lẹ kú bọ tọ̀sisa lọ jẹ wánlùn ji.

Azọ̀nylankan he hò Egiptinu lẹ

Bọdo enẹ go, Jehovah hẹn bese lẹ tọ́njẹgbonu sọn Tọ̀sisa Nile mẹ. Bese lọ lẹ gọ́ filẹpo—yèdọ to adò po panu lẹ po mẹ podọ to adọ́zan gbẹtọ lẹ tọn ji—fide ma pò. To whenuena bese lọ lẹ kú, Egiptinu lẹ bẹ yé pli gọnu-gọnu, bọ filẹpo to wánlùn.

Enẹgodo, Aalọn lì opò etọn kọmẹ bọ kọ́gudu lẹzun wánvú flinflin he nọ zlọn bo nọ dùmẹ lẹ. Wánvú flinflin ehelẹ wẹ azọ̀nylankan atọ̀ntọ he yin hinhẹnwa aigba Egipti tọn ji.

Azọ̀nylankan he pò lẹ gbleawuna Egiptinu lẹ kẹdẹ bo ma wà nude na Islaelivi lẹ. Azọ̀nylankan ẹnẹtọ lọ wẹ supọ̀ dahodaho lẹ he to wiwọ̀ biọ owhé Egiptinu lẹpo tọn gbè. Kanlin lẹ wẹ jiya azọ̀nylankan atọ́ntọ lọ tọn. Susu oyìn, lẹngbọ po gbọgbọẹ Egiptinu lẹ tọn po wẹ kú.

Bọdo enẹ go, Mose po Aalọn po ba afín bo húnhún do jẹhọn mẹ. Ehe hẹn nútitẹ̀ dahodaho lẹ wá gbẹtọ lẹ po kanlin lẹ po go. Azọ̀nylankan ṣidopotọ niyẹn.

Enẹgodo Mose dlẹn alọ etọn hlan agahomẹ bọ Jehovah hẹn hẹviosò po kẹnjikun po wá. Kẹnjikun ylankan mọnkọtọn ma ko ja to Egipti pọ́n.

Azọ̀nylankan ṣinatọ̀ntọ wẹ owẹ̀n susugege he wọ̀ biọ otò lọ mẹ lẹ. Mẹde ma ko mọ owẹ̀n susu sọmọ pọ́n jẹnukọnna ojlẹ enẹ podọ to enẹgodo. Nuhe kẹnjikun lọ ma hẹngble lẹpo wẹ yé dù.

Zinvlu wẹ yin azọ̀nylankan ṣinẹnẹtọ lọ. Zinvlu gọ́ngọ́n ṣinyọ́n aigba lọ ji na azán atọ̀n, ṣigba hinhọ́n tin na Islaelivi lẹ to fihe yé nọ nọ̀.

To godo mẹ, Jiwheyẹwhe dọna omẹ etọn lẹ nado mimí ohùn gbọgbọẹvu kavi lẹngbọvu de tọn do dòtin họntonu yetọn lẹ tọn go. Enẹgodo angẹli Jiwheyẹwhe tọn jugbọn aigba Egipti tọn ji. Eyin angẹli lọ mọ ohùn to owhé de go, e ma nọ hù mẹdepope to finẹ. Ṣigba to fidepope he angẹli Jiwheyẹwhe tọn ma mọ ohùn to dòtin họntonu lẹ tọn go te, e nọ hù viplọnji gbẹtọ po kanlin lẹ po tọn. Ehe wẹ yin azọ̀nylankan aotọ lọ.

To azọ̀nylankan aotọ ehe godo, Falo dọna Islaelivi lẹ nado yì. Omẹ Jiwheyẹwhe tọn lẹpo ko wleawu nado yì, podọ to ozán enẹ dopolọ mẹ, yé bẹ gbejizọnlin yetọn jẹeji nado yì sọn Egipti.

Eksọdusi weta 7 jẹ 12.



Kanbiọ lẹ

  • Yí yẹdide he tin tofi lẹ zan nado basi zẹẹmẹ azọ̀nylankan atọ̀n tintan he Jehovah hẹnwa Egipti ji lẹ tọn.
  • Vogbingbọn tẹwẹ tin to azọ̀nylankan atọ̀n tintan lẹ po dehe pò lẹ po ṣẹnṣẹn?
  • Etẹwẹ yin azọ̀nylankan ẹnẹtọ, atọ́ntọ, po ṣidopotọ po?
  • Basi zẹẹmẹ azọ̀nylankan ṣinawetọ, ṣinatọ̀ntọ, po ṣinẹnẹtọ po tọn.
  • Etẹwẹ Jehovah dọna Islaelivi lẹ nado wà jẹnukọnna azọ̀nylankan aotọ lọ?
  • Etẹwẹ yin azọ̀nylankan aotọ lọ, podọ etẹwẹ jọ to ehe godo?

Kanbiọ devo lẹ

  • Hia Eksọdusi 7:19-8:23.

    Dile etlẹ yindọ nujlẹtọ Egipti tọn lẹ penugo nado vọ́ azọ̀nylankan awe he jẹnukọn lẹ nkọ basi, etẹwẹ yé to dandannu glọ nado yigbena to azọ̀nylankan atọ̀ntọ lọ godo? (Eks. 8:18, 19; Mat. 12:24-28)

    Nawẹ azọ̀nylankan ẹnẹtọ do nugopipe Jehovah tọn nado basi-hihọ́na omẹ etọn lẹ hia gbọn, podọ nawẹ ehe yinyọnẹn nọ yinuwado omẹ Jiwheyẹwhe tọn lẹ ji dile yé to nukọnpọnhlan “nukunbibia daho” he yin didọdai lọ gbọn? (Eks. 8:22, 23; Osọ. 7:13, 14; 2 Otan. 16:9)

  • Hia Eksọdusi 8:24; 9:3, 6, 10, 11, 14, 16, 23-25; po 10:13-15, 21-23 po.

    Pipli awe tẹlẹ wẹ Azọ̀nylankan Ao lọ lẹ dehia, podọ nawẹ ehe nọ yinuwado nukun he mí do nọ pọ́n pipli enẹlẹ hlan to egbehe ji gbọn? (Eks. 8:10, 18, 19; 9:14)

    Nawẹ Eksọdusi 9:16 gọalọna mí nado mọnukunnujẹ nuhewutu Jehovah jotẹnna Satani nado gbọṣi aimẹ kakajẹ din mẹ gbọn? (Lom. 9:21, 22)

  • Hia Eksọdusi 12:21-32.

    Nawẹ Juwayi lọ hẹn whlẹngán yọnbasi na mẹsusu gbọn, podọ ohia etẹ tọn wẹ hùnwhẹ Juwayi tọn yin? (Eks. 12:21-23; Joh. 1:29; Lom. 5:18, 19, 21; 1 Kọl. 5:7)

Plọnnu Dogọ

TITO NUPINPLỌN TỌN NA SINSẸ̀N-BIBASI WHẸNDO TỌN

Jiwheyẹwhe Do Mose Hlan Egipti

Mose po Aalọn do adọgbigbo hia to whenue yé yì dọhona Falo huhlọnnọ lọ. Yí nuplọnmẹwe ehelẹ bo dọhodo yé ji to pọmẹ hẹ whẹndo towe.