Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 31: Mose po Aalọn po Yì Falo Dè

Otàn 31: Mose po Aalọn po Yì Falo Dè

WHENUENA Mose lẹkọyi Egipti, e dọ azọ́njiawu lọ lẹpo na mẹdaho etọn Aalọn. Podọ to whenuena Mose po Aalọn po do azọ́njiawu ehelẹ hia Islaelivi lẹ, yemẹpo yise dọ Jehovah tin po yé po.

Enẹgodo Mose po Aalọn po yì Falo dè. Yé dọna ẹn dọ: ‘Jehovah, Jiwheyẹwhe Islaeli tọn dọmọ, “Gbọ omẹ ṣie lẹ ni yì na azán atọ̀n, na yé nido basi sinsẹ̀n hlan mi to zungbo mẹ.”’ Ṣigba Falo gblọn dọmọ: ‘Yẹn ma tindo yise to Jehovah mẹ. Podọ yẹn ma na dike Islaeli ni yì.’

Falo gblehomẹ, na Islaelivi lẹ jlo na yí gbọjẹ sọn azọ́n kọ̀n nado sẹ̀n Jehovah wutu. Enẹwutu e hẹn yé po huhlọn po nado wazọ́n susu dogọ. Islaelivi lẹ gblewhẹdo Mose na nuyiwahẹmẹ agọ̀ he yé to pipehẹ, bọ ehe hẹn awubla wá na Mose. Ṣigba Jehovah dọna ẹn dọ ni ma hanú blo. Jehovah dọmọ: ‘Yẹn na hẹn Falo nado dike omẹ ṣie lẹ ni yì.’

Mose po Aalọn po to Falo nukọn

Mose po Aalọn po sọ lẹkọyi Falo dè whladopo dogọ. To ojlẹ ehe mẹ, yé wà azọ́njiawu de. Aalọn ze opò etọn dlan kọmẹ bọ e lẹzun odàn daho de. Sunnu nuyọnẹntọ Falo tọn lẹ lọsu ze opò yetọn lẹ dlan kọmẹ bọ popolẹpo lẹzun odàn. Ṣigba, pọ́n! Odàn Aalọn tọn to odàn nuyọnẹntọ lọ lẹ tọn ze mì. Etomọṣo Falo ma dike Islaelivi lẹ ni yì gba.

Todin ojlẹ lọ sọ̀ na Jehovah nado plọn nude Falo. Be a yọ́n lehe e wàmọ gbọn ya? E hẹn azọ̀nylankan kavi nugbajẹmẹji 10 wá Egipti ji.

To susu azọ̀nylankan lọ lẹ tọn godo, Falo nọ domẹhlan Mose bo nọ dọna ẹn dọmọ: ‘Doalọtena azọ̀nylankan lọ, yẹn nasọ dike Islaeli ni yì.’ Ṣigba eyin azọ̀nylankan lọ doalọte, Falo nọ diọlinlẹn. E ma nọ dike gbẹtọ lọ lẹ ni yì. Ṣigba to godo mẹ, to azọ̀nylankan 10tọ godo, Falo degbena Islaelivi lẹ nado yì.

Be a yọ́n dopodopo azọ̀nylankan 10 lọ lẹ tọn ya? Gbọ mí ni plọnnu gando yé go.

Eksọdusi 4:27-31; 5:1-23; 6:1-13, 26-30; 7:1-13.



Kanbiọ lẹ

  • Nuyiwadomẹji tẹwẹ azọ́njiawu he Mose po Aalọn po wà lẹ tindo do Islaelivi lẹ ji?
  • Etẹwẹ Mose po Aalọn po dọna Falo, podọ etẹwẹ yin gblọndo Falo tọn?
  • Dile yẹdide lọ dohia do, etẹwẹ jọ to whenuena Aalọn ze opò etọn dlan kọmẹ?
  • Aliho tẹ mẹ wẹ Jehovah plọnnu Falo te, podọ nawẹ ewọ yinuwa gbọn?
  • Etẹwẹ jọ to azọ̀nylankan aotọ lọ godo?

Kanbiọ devo lẹ

  • Hia Eksọdusi 4:27-31 po 5:1-23 po.

    Etẹ dọ wẹ Falo te to whenuena e dọ dọ: “Yẹn ma yọ́n [Jehovah]”? (Eks. 5:2; 1 Sam. 2:12; Lom. 1:21)

  • Hia Eksọdusi 6:1-13, 26-30.

    Linlẹn tẹ mẹ wẹ Jehovah ma hẹn ede zun yinyọnẹn na Ablaham, Isaki, po Jakobu po te? (Eks. 3:13, 14; 6:3; Gẹn. 12:8)

    Etẹwẹ yin numọtolanmẹ mítọn nado yọnẹn dọ Jehovah gbẹsọ yí Mose zan dile Mose tlẹ mọdọ emi ma pegan na azọ́n he yin didena emi lọ? (Eks. 6:12, 30; Luku 21:13-15)

  • Hia Eksọdusi 7:1-13.

    Apajlẹ tẹwẹ Mose po Aalọn po zedai na devizọnwatọ Jiwheyẹwhe tọn egbehe tọn lẹ gbọn whẹdida Jehovah tọn lilá na Falo po adọgbigbo po dali? (Eks. 7:2, 3, 6; Owalọ 4:29-31)

    Nawẹ Jehovah dohia dọ ewọ tindo huhlọn hú yẹwhe Egipti tọn lẹ gbọn? (Eks. 7:12; 1 Otan. 29:12)

Plọnnu Dogọ

Jiwheyẹwhe Do Mose Hlan Egipti

Naegbọn Falo ma wà nuhe Mose po Aalọn po dọna ẹn? Kọdetọn ylankan tẹlẹ wẹ ehe hẹnwa?