Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 30: Ogbé He to Miyọ́n Ji Lọ

Otàn 30: Ogbé He to Miyọ́n Ji Lọ

MOSE zinzọnlin kaka wá osó Holẹbi tọn kọ̀n nado mọ ogbé na lẹngbọ etọn lẹ. To finẹ, e mọ bọ ogbé de to miyọ́n ji ṣogan bo ma fiọ!

Mose to ogbé he to miyọ́n ji lọ kọ̀n

Mose dọna ede dọ: ‘Nupaṣamẹ tẹ die. Yẹn na sẹpọ ẹ dogọ nado pọ́n ẹn ganji.’ To whenuena e wàmọ, ogbè de dọhona ẹn sọn ogbé lọ mẹ dọmọ: ‘A sọ dọnsẹpọ humọ blo. De afọpa towe lẹ, na aigba wiwe de ji wẹ hiẹ nọte do.’ Jiwheyẹwhe wẹ to hodọ gbọn angẹli de gblamẹ, enẹwutu Mose ṣinyọnnudo nukunmẹ etọn.

Jiwheyẹwhe sọ dọmọ: ‘Yẹn ko mọ oyà he omẹ ṣie lẹ to jiji to Egipti. Enẹwutu yẹn jlo na tún yé dote, podọ hiẹ wẹ yẹn na dohlan nado plan omẹ ṣie lẹ sọn Egipti.’ Jehovah jlo na hẹn omẹ etọn lẹ wá aigba whanpẹnọ Kenani tọn ji.

Ṣigba Mose dọmọ: ‘N’ma pé nude go. Nawẹ yẹn sọgan wà ehe gbọn? Ṣigba eyin n’tlẹ yigbe bo yì bọ Islaelivi lẹ wá kanse mi dọ “Mẹnu wẹ do we hlan?” Etẹwẹ yẹn na dọ?’

Jiwheyẹwhe gblọn dọmọ: ‘Nuhe hiẹ na dọ die: “JEHOVAH Jiwheyẹwhe Ablaham tọn, Jiwheyẹwhe Isaki tọn po Jiwheyẹwhe Jakọbu tọn po wẹ do mi hlan mì dè.”’ Jehovah sọ yidogọ dọmọ: ‘Ehe wẹ oyín ṣie kakadoi.’

Mose dọmọ: ‘Ṣigba, eyin yé ma yí mi sè to whenuena yẹn dọna yé dọ hiẹ wẹ do mi hlan lo?’

Jiwheyẹwhe kanse e dọmọ: ‘Etẹwẹ to alọ towe mẹ?’

Mose gblọn dọmọ: ‘Opò wẹ.’

Jiwheyẹwhe dọmọ: ‘Ze e dlan kọmẹ.’ Podọ to whenuena Mose wàmọ, opò lọ lẹzun odàn. Jehovah sọ do azọ́njiawu devo hia Mose. E dọna ẹn dọmọ: ‘Ze alọ towe do tewu towe mẹ.’ Mose wàmọ, podọ to whenuena e de alọ etọn tọ́n, e wé di osin-agó! E taidi dọ azọ̀n ylankan he nọ yin yiylọdọ pòzọ̀n wẹ wle alọ lọ nkọtọn. Enẹgodo, Jehovah na huhlọn Mose nado wà azọ́njiawu atọ̀ntọ. To godo mẹ, Jehovah dọmọ: ‘Eyin hiẹ wà azọ́njiawu ehelẹ, Islaelivi lẹ na yise dọ yẹn wẹ do we hlan.’

Todin Mose lẹkọyi whé bo dọna Jẹtlo dọmọ: ‘Jaale, gbọ yẹn ni lẹkọyi hẹnnumẹ ṣie lẹ dè to Egipti nado pọ́n lehe yé te do.’ Enẹwutu Jẹtlo dọ e yì whedenu na Mose, bọ Mose bẹ gbejizọnlin jẹeji nado lẹkọyi Egipti.

Eksọdusi 3:1-22; 4:1-20.



Kanbiọ lẹ

  • Nawẹ osó he tin to yẹdide lọ mẹ nọ yin yiylọdọ?
  • Nupaṣamẹ tẹwẹ Mose mọ to whenuena e plan lẹngbọ etọn lẹ yì osó lọ kọ̀n?
  • Etẹwẹ ogbè de dọ sọn ogbé he to miyọ́n ji lọ mẹ, podọ ogbè mẹnu tọn wẹ?
  • Etẹwẹ Mose gblọn to whenuena Jiwheyẹwhe dọna ẹn dọ e na plan omẹ emitọn lẹ tọ́n sọn Egipti?
  • Etẹwẹ Jiwheyẹwhe dọna Mose nado dọ eyin Islaelivi lẹ kàn mẹhe do e hlan sè?
  • Nawẹ Mose na penugo nado dohia dọ Jiwheyẹwhe wẹ do e hlan gbọn?

Kanbiọ devo lẹ

  • Hia Eksọdusi 3:1-22.

    Nawẹ numimọ Mose tọn na mí jide dọ, Jehovah na nọgodona mí eyin mí tlẹ lẹndọ mí ma pegan na azọngban de he yin didena mí to agun mẹ gbọn? (Eks. 3:11, 13; 2 Kọl. 3:5, 6)

  • Hia Eksọdusi 4:1-20.

    Etẹwẹ diọ to walọ Mose tọn mẹ to owhe 40 he e yizan to Midiani lẹ whenu, podọ etẹwẹ mẹhe jlo na tindo lẹblanulọkẹyi to agun mẹ lẹ sọgan plọn sọn ehe mẹ? (Eks. 2:11, 12; 4:10, 13; Mika 6:8; 1 Tim. 3:1, 6, 10)

    Eyin Jehovah tlẹ domẹplọnlọ mí go gbọn titobasinanu etọn gblamẹ, jide tẹwẹ mí sọgan mọyi sọn apajlẹ Mose tọn mẹ? (Eks. 4:12-14; Ps. 103:14; Heb. 12:4-11)