Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 29: Nuhewutu Mose Họnyi

Otàn 29: Nuhewutu Mose Họnyi

PỌ́N! Mose to hinhọnyi sọn Egipti. Be a mọ mẹhe to yinyan ẹn to godo lẹ ya? Be a yọ́n nuhewutu yé jlo na hù Mose ya? Gbọ mí ni dindona.

Mose to hinhọ̀n sọn Egipti

Mose whẹ́n to owhé Falo, ahọlu Egipti tọn gbè. E wá lẹzun omẹ nukundeji he yọnnuin taun de. Mose yọnẹn dọ emi ma yin Egiptinu, podọ Islaelivi afanumẹ lẹ wẹ yin mẹjitọ emitọn lẹ.

To gbèdopo, whenuena Mose tindo owhe 40, e basi dide nado yì pọ́n lehe omẹ etọn lẹ te do. Aliho he mẹ Egiptinu lẹ to nuyiwa hẹ yé te ylan taun. E mọ bọ Egiptinu de to nuli Islaelivi afanumẹ de. Mose pọ́n adusi bo pọ́n amiyọn, podọ to whenuena e ma mọ mẹde, e linú Egiptinu lọ bọ Egiptinu lọ kú. Mose sọ ze oṣiọ etọn whlá do okọ́glọ.

To aihọngbè, Mose tọ́n nado yì pọ́n omẹ etọn lẹ whladopo dogọ. E lẹndọ emi sọgan gọalọna yé bọ yé ma nasọ yin afanumẹ ba. Ṣigba e mọ Islaelivi awe he to avùnho, bọ e dọna mẹhe owhẹ̀ etọn ma whẹ́n lọ dọ: ‘Naegbọn hiẹ to nọvisunnu towe hò?’

Dawe lọ gblọn dọmọ: ‘Mẹnu wẹ yí we do basi ogán po whẹdatọ po do mí ji? Kavi a jlo na hù yẹnlọsu dile a hù Egiptinu lọ do wẹ ya?’

Obu jẹ Mose ji. E mọdọ gbẹtọ lẹ ko yọ́n nuhe e wà do Egiptinu lọ. Falo lọsu tlẹ ko sè nuhe jọ lọ bo ko domẹhlan nado hù Mose. Nuhewutu Mose dona họ̀n sọn Egipti niyẹn.

To whenuena Mose họ̀n sọn Egipti, e to yìyì kakajẹ Midiani, aigba he dẹn taun de ji. To finẹ, e dukosọ hẹ whẹndo Jẹtlo tọn bo dà dopo to viyọnnu etọn lẹ mẹ he nọ yin Zipola. Mose lẹzun lẹngbọyìntọ bo nọ penukundo lẹngbọ Jẹtlo tọn lẹ go. E nọ aigba Midiani tọn ji na owhe 40. Todin e ko tindo owhe 80. To gbèdopo, dile Mose to nukunpedo lẹngbọ Jẹtlo tọn lẹ go, nujiawu de jọ he diọ gbẹzan Mose tọn pete. Gbọ mí ni pọ́n nujiawu he jọ lọ.

Eksọdusi 2:11-25; Owalọ lẹ 7:22-29.



Kanbiọ lẹ

  • Fie wẹ Mose whẹ́n te, ṣigba etẹwẹ e yọnẹn gando mẹjitọ etọn lẹ go?
  • Etẹwẹ Mose wà to whenuena e tindo owhe 40?
  • Etẹwẹ Mose dọna Islaelivi he to avùnho de, podọ etẹwẹ dawe lọ gblọnna ẹn?
  • Naegbọn Mose do họnyi sọn Egipti?
  • Fie wẹ Mose họnyi, podọ mẹnu wẹ e mọ to finẹ?
  • Etẹwẹ Mose wà to owhe 40 he bọdego lẹ gblamẹ to whenuena e họnyi sọn Egipti godo?

Kanbiọ devo lẹ

  • Hia Eksọdusi 2:11-25.

    Mahopọnna owhe susu he Mose yí do plọn nuyọnẹn Egiptinu lẹ tọn, nawẹ e do nugbonọ-yinyin etọn na Jehovah po omẹ etọn lẹ po hia gbọn? (Eks. 2:11, 12; Heb. 11:24)

  • Hia Owalọ lẹ 7:22-29.

    Etẹwẹ mí sọgan plọn sọn nuyiwa Mose tọn mẹ to whenuena e tẹnpọn nado tún Islaeli dote sọn kanlinmọgbenu Egipti tọn mẹ na ede? (Owalọ 7:23-25; 1 Pita 5:6, 10)