Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 26: Job Yin Nugbonọ Na Jiwheyẹwhe

Otàn 26: Job Yin Nugbonọ Na Jiwheyẹwhe

BE ONÚ dawe he to azọ̀njẹ ehe tọn wàlẹblanuna we ya? Job wẹ e nọ yin, podọ asi etọn wẹ yọnnu he tin to yẹdide lọ mẹ. Be a yọ́n nuhe e to didọna Job ya? ‘Gbẹ́ Jiwheyẹwhe dai bo kú.’ Gbọ mí ni pọ́n nuhewutu e do dọ ohó mọnkọtọn podọ nuhewutu Job do jiya sọmọ.

Agbasa Job tọn gọ́ na nutitẹ̀

Job yin dawe nugbonọ de he nọ setonuna Jehovah. E nọ nọ̀ Uzi, yèdọ otò de he ma dẹn do Kenani. Jehovah yiwanna Job taun, ṣigba mẹde tin he gbẹwanna ẹn. Be a yọ́n mẹlọ ya?

Satani Lẹgba wẹ. Flindọ Satani yin angẹli ylankan de he gbẹwanna Jehovah. E penugo nado hẹn Adam po Evi po vẹtolina Jehovah, podọ e lẹndọ emi sọgan hẹn mẹhe pò lẹpo nado vẹtolina Jehovah ga. Ṣigba be e penugo nado wàmọ ya? Lala. Lẹnnupọndo sunnu gọna yọnnu nugbonọ susu he go mí ko plọnnu gando wayi lẹ ji. Yinkọ nẹmu to yé mẹ tọn wẹ a flin bo sọgan dọ?

To whenuena Jakọbu po Josẹfu po ko kú to Egipti godo, Job wẹ yin nugbonọ na Jehovah hugan to aigba lẹpo ji. Jehovah jlo dọ Satani ni yọnẹn dọ e ma sọgan hẹn mẹlẹpo nado wà nuylankan, enẹwutu e dọna ẹn dọmọ: ‘Pọ́n Job. A mọ lehe e yin nugbonọ na mi do.’

Satani dọ̀nnu dọmọ: ‘Ewọ yin nugbonọ na hiẹ dona ẹn bọ e sọ tindo onú dagbe susu. Ṣigba eyin hiẹ yí onú ehelẹ sọn e si, e na gbẹ́ we dai.’

Enẹwutu Jehovah dọmọ: ‘Eyọn. Bẹ nutindo etọn lẹ sọn e si. Wà nuylankan he jlo we lẹpo na Job. Mí na pọ́n eyin e na gbẹ́ mi dai. Ṣigba onú dopo he hiẹ ma dona wà wẹ yindọ a ma na hù i.’

Tintan whẹ́, Satani hẹn gbẹtọ lẹ nado fìn oyìn po kanklosọ́ Job tọn lẹ po, podọ lẹngbọ etọn lẹ yin hùhù. E sọ yí yujẹhọn do hù ovi etọn 10 lẹ. Enẹgodo, Satani dó azọ̀nylankan ehe Job. Job jiya taun. Enẹ wẹ zọ́n bọ asi Job tọn do dọna ẹn dọ: ‘Gbẹ́ Jiwheyẹwhe dai bo kú.’ Ṣigba Job ma wàmọ. Humọ, họntọn lalo atọ̀n wá e dè bo dọna ẹn dọ gbẹzan ylankan he e ko zan dai wutu wẹ. Etomọṣo Job hẹn nugbonọ-yinyin etọn go.

Ehe hẹn homẹhun Jehovah tlala, podọ to godo mẹ e dona Job, dile a sọgan mọ to yẹdide lọ mẹ do. E hẹn azọ̀n etọn gbọ. Job wá ji ovi whanpẹnọ 10 devo lẹ, bosọ tindo oyìn, lẹngbọ, po kanklosọ́ lẹ po he yì donù awe sọha he e tindo dai tọn.

Be a na yin nugbonọ na Jehovah to whepoponu di Job ya? Eyin a wàmọ, Jiwheyẹwhe na dona hiẹ lọsu. A na penugo nado nọgbẹ̀ kakadoi to whenuena Jiwheyẹwhe na hẹn aigba blebu nado yọnwhanpẹ di jipa Edẹni tọn.

Job 1:1-22; 2:1-13; 42:10-17.

Job po whẹndo etọn po


Kanbiọ lẹ

  • Mẹnu wẹ yin Job?
  • Etẹwẹ Satani tẹnpọn nado wà, ṣigba be e pà ẹ ya?
  • Etẹwẹ Jehovah na dotẹnmẹ Satani nado wà, podọ etẹwutu?
  • Naegbọn asi Job tọn do dọna ẹn dọ ni “gbẹ́ Jiwheyẹwhe dai, bo kú”? (Pọ́n yẹdide.)
  • Dile hiẹ sọgan mọ to yẹdide awetọ mẹ do, nawẹ Jehovah dona Job gbọn, podọ etẹwutu?
  • Eyin mílọsu yin nugbonọ na Jehovah taidi Job, dona tẹlẹ wẹ mí na mọyi?

Kanbiọ devo lẹ

  • Hia Job 1:1-22.

    Nawẹ Klistiani lẹ sọgan hodo apajlẹ Job tọn to egbehe gbọn? (Job 1:1; Flp. 2:15; 2 Pita 3:14)

  • Hia Job 2:1-13.

    Nawẹ aliho he mẹ Job yinuwa hlan homẹkẹn Satani tọn te gbọnvo na asi etọn tọn gbọn? (Job 2:9, 10; Howh. 19:3; Mika 7:7; Mal. 3:14)

  • Hia Job 42:10-17.

    Dopolọ-yinyin tẹlẹ wẹ tin to dona he Job mọyi po dehe Jesu mọyi na gbẹzan nugbonọ-yinyin tọn etọn po ṣẹnṣẹn? (Job 42:12; Flp. 2:9-11)

    Nawẹ dona he Job mọyi na tenọgligo-hinhẹn etọn hlan Jiwheyẹwhe yin tulinamẹnu de na mí gbọn? (Job 42:10, 12; Heb. 6:10; Jak. 1:2-4, 12; 5:11)