Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 25: Whẹndo lọ Sẹtẹn Yì Egipti

Otàn 25: Whẹndo lọ Sẹtẹn Yì Egipti

JOSẸFU masọ sọgan whlá numọtolanmẹ etọn lẹ ba. E dọna devi etọn lẹpo nado tọ́n sọn ohọ̀ lọ mẹ. To whenuena e pò ewọ po nọvisunnu etọn lẹ po kẹdẹ, Josẹfu jẹ avivi ji. Pọ́n lehe e na ko paṣa nọvisunnu etọn lẹ do, na yé ma yọ́n nuhewutu e do to avivi. To godo mẹ, e dọna yé dọmọ: ‘Yẹn Josẹfu wẹ. Be otọ́ ṣie gbẹ́ pò togbẹ̀ ya?’

E paṣa nọvisunnu etọn lẹ sọmọ bọ yé ma sọgan kẹnù. Obu jẹ yé ji. Ṣigba Josẹfu dọmọ: ‘Mì jaale bo sẹpọ mi.’ To whenuena yé wàmọ, e dọmọ: ‘Yẹn Josẹfu, nọvisunnu mìtọn he mì sà do Egipti wẹ.’

Josẹfu zindonukọn nado dọhona yé po homẹdagbe po dọmọ: ‘Mì ma dowhẹ mìde na mì sà mi do file wutu blo. Jiwheyẹwhe lọsu wẹ do mi hlan Egipti nado whlẹn ogbẹ̀ gbẹtọ lẹ tọn gán. Falo ko yí mi do basi ogán otò lọ blebu tọn. Todin, mì yawu lẹkọyi otọ́ ṣie dè bo dọ ehe na ẹn. Mì sọ dọna ẹn dọ ni wá nọfi.’

Enẹgodo, Josẹfu tẹdo nọvisunnu etọn lẹ go bo plasikọna yé bosọ donùnùgo na yé. To whenuena Falo sè dọ nọvisunnu Josẹfu tọn lẹ wá, e dọna Josẹfu dọmọ: ‘Gbọ yé ni yí kẹkẹ lẹ bo yì plan otọ́ yetọn po whẹndo yetọn lẹ po bosọ lẹkọwa fi. Yẹn na na yé aigba he yọ́n hugan aigba lẹpo to Egipti.’

Nuhe yé wà lọ niyẹn. To yẹdide ehe mẹ, a sọgan mọ whenue Josẹfu yì pé otọ́ etọn dile e wá Egipti po whẹndo etọn blebu po.

Whẹndo Jakọbu tọn ko klo taun. To lẹndopọ mẹ, sọha yetọn yin 70 to whenuena yé sẹtẹn wá Egipti, eyin mí hia Jakọbu, ovi etọn lẹ po ovivi etọn lẹ po. Ṣigba asi yetọn lẹ sọ tin to finẹ podọ vlavo devi susu lẹ ga. Yemẹpo wá sawhé do Egipti. Yé nọ yin yiylọdọ Islaelivi lẹ, na Jiwheyẹwhe ko diọ yinkọ Jakọbu tọn zun Islaeli wutu. Islaelivi lẹ wá lẹzun akọta titengbe de na Jiwheyẹwhe, dile mí na mọ do to nukọn mẹ.

Gẹnẹsisi 45:1-28; 46:1-27.

Josẹfu po whẹndo etọn po


Kanbiọ lẹ

  • Etẹwẹ jọ to whenuena Josẹfu do ede hia nọvisunnu etọn lẹ?
  • Zẹẹmẹ tẹwẹ Josẹfu gbọn homẹdagbe dali basi na nọvisunnu etọn lẹ?
  • Etẹwẹ Falo dọ to whenuena e sè dogbọn nọvisunnu Josẹfu tọn lẹ dali?
  • Nawẹ whẹndo Jakọbu tọn klo sọ to whenuena yé sẹtẹn yì Egipti?
  • Nawẹ whẹndo Jakọbu tọn wá yin yiylọdọ to godo mẹ podọ etẹwutu?

Kanbiọ devo lẹ

  • Hia Gẹnẹsisi 45:1-28.

    Nawẹ kandai Biblu tọn he gando Josẹfu go dohia dọ Jehovah sọgan diọ nuhe na gbleawuna devizọnwatọ etọn lẹ to aliho de mẹ bọ e na hẹn kọdetọn dagbe wá gbọn? (Gẹn. 45:5-8; Isa. 8:10; Flp. 1:12-14)

  • Hia Gẹnẹsisi 46:1-27.

    Jidevọnamẹ tẹwẹ Jakọbu mọyi sọn Jehovah dè to whenuena e to aliji jei Egipti? (Gẹn. 46:1-4)