Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 22: Josẹfu Yin Wiwle Do Gànpamẹ

Otàn 22: Josẹfu Yin Wiwle Do Gànpamẹ

OWHE 17 poun wẹ Josẹfu tindo to whenuena e yin hinhẹn yì Egipti. To finẹ, e yin sisà na dawe de he nọ yin Pọtifali. Pọtifali nọ wazọ́n na ahọlu Egipti tọn he nọ yin yiylọdọ Falo.

Josẹfu to gànpamẹ

Josẹfu nọ wazọ́n sinsinyẹn na ogán etọn Pọtifali. Enẹwutu, to whenuena Josẹfu whẹ́n dogọ, Pọtifali yí i do basi ogán nulẹpo tọn to owhé etọn gbè. Eyin mọ wẹ, naegbọn Josẹfu wá tin to gànpamẹ tofi? Asi Pọtifali tọn wutu wẹ.

To whenuena Josẹfu whẹ́n, e lẹzun dẹpẹ whanpẹnọ de, podọ asi Pọtifali tọn jlo dọ e ni zanhẹ emi. Ṣigba Josẹfu yọnẹn dọ ehe ma sọgbe, bo gbẹ́ ma nado wàmọ. Asi Pọtifali tọn gblehomẹ sinsinyẹn. Enẹwutu to whenuena asu etọn gọ̀, e dolalo na ẹn dọmọ: ‘Josẹfu, ovi gbigble enẹ, tẹnpọn nado zanhẹ mi!’ Pọtifali yí asi etọn sè bosọ gblehomẹ do Josẹfu go taun. Podọ e wle e do gànpamẹ.

To madẹnmẹ, mẹhe nọ penukundo gànpa lọ go mọdọ mẹdagbe de wẹ Josẹfu yin. Enẹwutu, e yí i do basi ogán na gàntọ he pò lẹ. To nukọn mẹ, Falo gblehomẹ do ahànkọnnọtọ po nudàtọ etọn po go bo sú yé do gànpamẹ. To zánmẹ gbèdopo, dopodopo yetọn kúdlọ vonọtaun de, ṣigba yé ma yọ́n zẹẹmẹ odlọ yetọn lẹ tọn gba. To aihọngbè etọn, Josẹfu dọmọ: ‘Mì dọ odlọ mìtọn lẹ na mi.’ Podọ to whenuena yé wàmọ, Josẹfu dọ zẹẹmẹ odlọ yetọn lẹ tọn na yé po alọgọ Jiwheyẹwhe tọn po.

Josẹfu dọna ahànkọnnọtọ lọ dọmọ: ‘To azán atọ̀n gblamẹ, hiẹ na yin didetọn sọn gànmẹ bo nasọ lẹzun ahànkọnnọtọ Falo tọn whladopo dogọ.’ Enẹwutu Josẹfu yidogọ dọmọ: ‘Eyin hiẹ wá tọ́n, dọho ṣie na Falo bo gọalọna mi nado tọ́n sọn file.’ Ṣigba, Josẹfu dọna nudàtọ lọ dọmọ: ‘To azán atọ̀n gblamẹ, Falo na degbè nado gbòtana we.’

To azán atọ̀n gblamẹ, nuhe Josẹfu dọ lọ lẹ jọ pẹpẹ. Falo degbè nado gbòtana nudàtọ lọ. Ahànkọnnọtọ lọ yin didetọn sọn gànmẹ bosọ gọ̀ jẹ azọ́n he e nọ wà na ahọlu lọ kọ̀n. Ṣigba ahànkọnnọtọ lọ wọn Josẹfu pete! E ma dọho depope na Falo, podọ Josẹfu gbọṣi gànmẹ.

Gẹnẹsisi 39:1-23; 40:1-23.



Kanbiọ lẹ

  • Owhe nẹmu wẹ Josẹfu tindo to whenuena e yin hinhẹn yì Egipti, podọ etẹwẹ jọ to whenuena e jẹ dọ́n?
  • Nawẹ Josẹfu wá mọ ede to gànpamẹ gbọn?
  • Azọngban tẹwẹ Josẹfu mọyi to gànpamẹ?
  • To whenuena Josẹfu tin to gànpamẹ, etẹwẹ e wà na ahànkọnnọtọ po nudàtọ Falo tọn po?
  • Etẹwẹ jọ to whenuena ahànkọnnọtọ lọ yin didesọn gànpamẹ godo?

Kanbiọ devo lẹ

  • Hia Gẹnẹsisi 39:1-23.

    To whenuena e yindọ kandai osẹ́n tọn de sọn Jiwheyẹwhe dè ma tin to azán Josẹfu tọn gbè he gbẹ́ galilọ, etẹwẹ whàn ẹn nado họ̀nna asi Pọtifali tọn? (Gẹn. 2:24; 20:3; 39:9)

  • Hia Gẹnẹsisi 40:1-23.

    Dọ odlọ ahànkọnnọtọ lọ tọn po zẹẹmẹ he Jehovah na Josẹfu po to kleun mẹ. (Gẹn. 40:9-13)

    Odlọ tẹwẹ nudàtọ lọ kú, podọ etẹwẹ e zẹẹmẹdo? (Gẹn. 40:16-19)

    Nawẹ pipli afanumẹ nugbonọ nuyọnẹntọ lọ tọn nọ do gbigbọ dopolọ hia taidi Josẹfu to egbehe gbọn? (Gẹn. 40:8; Ps. 36:9; Joh. 17:17; Owalọ 17:2, 3)

    Nawẹ Gẹnẹsisi 40:20 tá hinhọ́n do pọndohlan Klistiani lẹ tọn ji gando hùnwhẹ jijizan tọn lẹ go gbọn? (Yẹwh. 7:1; Malku 6:21-28)