Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 20: Dina Biọ Tukla Mẹ

Otàn 20: Dina Biọ Tukla Mẹ

BE A mọ mẹhe Dina jlo na yì dlapọn lẹ ya? E jlo na yì pọ́n delẹ to awhli he nọ nọ̀ aigba Kenani tọn ji lẹ mẹ. Be Jakọbu otọ́ etọn na hùnhomẹ do ehe go ya? Nado sọgan na gblọndo kanbiọ ehe tọn, tẹnpọn bo flin nuhe Ablaham po Isaki po lẹn gando yọnnu Kenani tọn lẹ go.

Dina yì dla awhli Kenani tọn lẹ pọ́n

Be Ablaham jlo dọ visunnu etọn Isaki ni dà yọnnu de sọn Kenani ya? Lala. Be Isaki po Lebeka po jlo dọ visunnu yetọn Jakọbu ni dà yọnnu Kenaninu de ya? Lala. Be a yọ́n nuhewutu wẹ?

Na mẹhe nọ nọ̀ Kenani lẹ nọ sẹ̀n yẹwhe lalo lẹ wutu wẹ. Yé ma yin mẹdagbe he e jẹ nado dà taidi asu kavi asi gba, mọdopolọ yé ma yin mẹhe mẹde sọgan jihọntọn vivẹ hẹ. Enẹwutu, e họnwun dọ homẹ Jakọbu tọn ma na hùn dọ viyọnnu etọn to họntọnji hẹ yọnnu Kenani tọn lẹ.

E ma yin nupaṣamẹ dọ Dina wá biọ tukla mẹ. Be a mọ dẹpẹ Kenaninu he to Dina pọnhlan to yẹdide lọ mẹ ya? Ṣẹkẹmi wẹ e nọ yin. To gbèdopo he Dina wá dla viyọnnu lọ lẹ pọ́n, Ṣẹkẹmi plan Dina bo zanhẹ ẹ gánnugánnu. Ehe ma sọgbe, na sunnu po yọnnu po he wlealọ hẹ yedelẹ kẹdẹ wẹ dona tindo kọndopọ zanhẹmẹ tọn. Nuylankan he Ṣẹkẹmi wà na Dina ehe hẹn tukla susu wá dogọ.

To whenuena nọvisunnu Dina tọn lẹ sè nuhe jọ lọ, homẹgble yé tlala. Awe to yé mẹ, Simeọni po Levi po, gblehomẹ sọmọ bọ yé dọ̀n ohí bo yì tòdaho lọ mẹ bosọ tọ́n do gbẹtọ lẹ ji to ajiji mẹ. To pọmẹ hẹ nọvisunnu yetọn lẹ, yé hù Ṣẹkẹmi po sunnu he pò to tòdaho lọ mẹ lẹpo po. Homẹgble Jakọbu na nuylankan he visunnu etọn lẹ wà ehe wutu.

Etẹwẹ hẹn tukla ehe lẹpo wá? Na Dina jihọntọn hẹ mẹhe ma nọ setonuna osẹ́n Jiwheyẹwhe tọn lẹ wutu wẹ. Mí ma dona jihọntọn mọnkọtọn lẹ gba, kavi e ma yin mọ wẹ?

Gẹnẹsisi 34:1-31.



Kanbiọ lẹ

  • Naegbọn Ablaham po Isaki po ma jlo dọ ovi yetọn lẹ ni wlealọ hẹ omẹ Kenani tọn lẹ?
  • Be homẹ Jakọbu tọn hùn dọ viyọnnu etọn jihọntọn hẹ viyọnnu Kenani tọn lẹ wẹ ya?
  • Dẹpẹ tẹwẹ to Dina pọ́n to yẹdide lọ mẹ, podọ nuylankan tẹwẹ e wà?
  • Etẹwẹ nọvisunnu Dina tọn Simeọni po Levi po wà to whenuena yé sè nuhe jọ lọ?
  • Be Jakọbu kọngbedopọ hẹ nuhe Simeọni po Levi po wà ya?
  • Etẹwẹ hẹn tukla whẹndo lọ tọn lẹpo wá?

Kanbiọ devo lẹ

  • Hia Gẹnẹsisi 34:1-31.

    Be dopodopo vlavo wẹ Dina nọ yì viyọnnu Kenani tọn lẹ dè ya? Basi zẹẹmẹ. (Gẹn. 34:1, NW)

    Naegbọn mí sọgan gblewhẹdo Dina jẹ obá de mẹ na alọji-ninọ etọn hinhẹnbu? (Gal. 6:7)

    Nawẹ jọja lẹ to egbehe sọgan dohia dọ nuhe jọ do Dina go yin avase de na yé gbọn? (Howh. 13:20; 1 Kọl. 15:33; 1 Joh. 5:19)