Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 18: Jakọbu Yì Halani

Otàn 18: Jakọbu Yì Halani

BE A yọ́n sunnu he Jakọbu to hodọ hẹ ehelẹ ya? To gbejizọnlin azán susu tọn godo, Jakọbu mọ yé to dotọ̀ de kọ̀n. Yé to nukunpedo lẹngbọ yetọn lẹ go. Jakọbu kanse yé dọmọ: ‘Fie wẹ mì wá sọn?’

Yé gblọn dọ: ‘Halani.’

Jakọbu sọ kanse yé dọ: ‘Be mì yọ́n Labani ya?’

Yé yigbe dọ: ‘Mọwẹ. Pọ́n, viyọnnu etọn Laheli wẹ ja sọn dọ́n po lẹngbọ otọ́ etọn tọn lẹ po.’ Be a mọ Laheli dile e to zọnlinzin ja ya?

Jakọbu yì pé Laheli

To whenuena Jakọbu mọ Laheli po lẹngbọ ylọnẹn etọn Labani tọn lẹ po, e yì bli osé sẹ̀ sọn dotọ̀ lọ ji na lẹngbọ lọ lẹ nido sọgan nùsin. Enẹgodo Jakọbu donùnùgo na Laheli bo dọ mẹhe ewọ yin na ẹn. E vivi na Laheli taun bọ e lẹkọyi whégbè bo dọ nuhe jọ lọ na otọ́ etọn Labani.

Homẹ Labani tọn hùn tlala nado yí Jakọbu do owhé etọn gbè. Podọ to whenuena Jakọbu biọ nado dà Laheli, Labani jaya taun. Ṣigba, e biọ to Jakọbu si nado wazọ́n to ogle etọn mẹ na owhe ṣinawe nado sọgan dà Laheli. Jakọbu wàmọ na e yiwanna Laheli taun wutu. Ṣigba to whenuena alọwlezan lọ pé, be a yọ́n nuhe jọ ya?

Labani ze viyọnnu etọn mẹho, Lea, na Jakọbu kakati nido yin Laheli. To whenuena Jakọbu yigbe nado wazọ́n na Labani na owhe ṣinawe devo, Labani wá na ẹn Laheli dogọ. To ojlẹ enẹlẹ mẹ, Jiwheyẹwhe na dotẹnmẹ sunnu lẹ nado dà asi hugan dopo. Ṣigba todin, dile Biblu dohia do, asi dopo gee wẹ sunnu de dona tindo.

Gẹnẹsisi 29:1-30.



Kanbiọ lẹ

  • Mẹnu wẹ yin awhli he tin to yẹdide lọ mẹ, podọ etẹwẹ Jakọbu wà na ẹn?
  • Etẹwẹ Jakọbu wleawufo nado wà nado sọgan dà Laheli?
  • Etẹwẹ Labani wà to whenuena ojlẹ lọ sọ̀ na Jakọbu nado plan Laheli taidi asi?
  • Etẹwẹ Jakọbu yigbe nado wà nado sọgan dà Laheli?

Kanbiọ devo lẹ

  • Hia Gẹnẹsisi 29:1-30.

    Etlẹ yin to whenuena Labani blu Jakọbu, nawẹ Jakọbu do ede hia di walọ dagbenọ gbọn, podọ etẹwẹ mí sọgan plọn sọn ehe mẹ? (Gẹn. 25:27; 29:26-28; Mat. 5:37)

    Nawẹ apajlẹ Jakọbu tọn do vogbingbọn he tin to owanyi nujọnu tọn po nukunta tọn po ṣẹnṣẹn hia gbọn? (Gẹn. 29:18, 20, 30; Ohàn 8:6)

    Yọnnu ẹnẹ tẹlẹ wẹ wá lẹzun hagbẹ whẹndo Jakọbu tọn bo jivi na ẹn to godo mẹ? (Gẹn. 29:23, 24, 28, 29)