Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 16: Isaki Mọ Asi Dagbe De

Otàn 16: Isaki Mọ Asi Dagbe De

BE A yọ́n yọnnu he tin to yẹdide ehe mẹ ya? Lebeka wẹ e nọ yin. Podọ sunnu he e jlo na yì pé lọ wẹ Isaki. E na wá lẹzun asi etọn. Nawẹ ehe jọ gbọn?

Otọ́ Isaki tọn, Ablaham, jlo na mọ asi dagbe de na visunnu etọn. E ma jlo dọ Isaki ni dà dopo to yọnnu Kenani tọn lẹ mẹ, na yẹwhe lalo lẹ wẹ yé nọ sẹ̀n wutu. Enẹwutu Ablaham ylọ devi etọn bo dọnaẹn dọmọ: ‘Yẹn jlo dọ hiẹ ni lẹkọyi fie hẹnnumẹ ṣie lẹ nọ nọ̀ to Halani bo dín asi de na visunnu ṣie Isaki.’

To afọdopolọji, devi Ablaham tọn yí kanklosọ́ ao bo bẹ gbejizọnlin gaa lọ jẹeji. To whenuena e sẹpọ fie hẹnnumẹ Ablaham tọn lẹ nọ nọ̀, e nọte to dotọ̀ de kọ̀n. Whèjai pete wẹ, yèdọ ojlẹ he mẹ yọnnu tòdaho lọ mẹ tọn lẹ nọ wá dotọ̀ lọ kọ̀n nado dàsin. Devi Ablaham tọn hodẹ̀ hlan Jehovah dọmọ: ‘Na yọnnu he na na mi sìnnùnù bosọ na kanklosọ́ ṣie lẹ ni yin mẹhe hiẹ de nado yin asi Isaki tọn.’

Lebeka yì pé Isaki

E ma dẹn bọ Lebeka wá finẹ nado dàsin. To whenuena devi lọ biọ ẹ sìnnùnù, e na ẹn. Enẹgodo e sọ yì dàsin wá na kanklosọ́ he ovẹ́ to húhú lọ lẹpo. Azọ́n sinsinyẹn de wẹ enẹ yin na kanklosọ́ lẹ nọ nùsin taun.

To whenuena Lebeka wà ehe godo, devi Ablaham tọn kàn yinkọ otọ́ etọn tọn biọ ẹ. E sọ kanse e eyin emi sọgan dọ́ owhé yetọn gbè jẹ aihọngbè. Lebeka dọmọ: ‘Bẹtueli wẹ otọ́ ṣie nọ yin, podọ fie a sọgan dọ́ tin to owhé mítọn gbè.’ Devi Ablaham tọn yọnẹn dọ nọvisunnu Ablaham tọn Nahọli wẹ ji Bẹtueli. Enẹwutu e jẹklo bo dopẹna Jehovah he plan ẹn jẹ hẹnnumẹ Ablaham tọn lẹ dè.

To ozán enẹ mẹ, devi Ablaham tọn dọ nuhe hẹn ẹn wá na Bẹtueli po Labani he yin nọvisunnu Lebeka tọn po. Yé omẹ awe lẹ yigbe dọ Lebeka sọgan hodo e yì nado lẹzun asi Isaki tọn. Etẹwẹ Lebeka dọ to whenuena yé kàn linlẹn etọn sè e? E yigbe nado yì. Enẹwutu to aihọngbè, yé hẹ́ kanklosọ́ lẹ ji bo bẹ gbejizọnlin gaa lọ jẹeji nado lẹkọyi Kenani.

Owhè ko jai whẹpo yé do gọ̀. Lebeka mọ sunnu de to zọnlinzin to glemẹ. Isaki wẹ. Homẹ etọn hùn nado mọ Lebeka. Onọ̀ etọn Sala ko kú owhe atọ̀n poun jẹnukọnna ojlẹ enẹ, podọ e gbẹ́ pò to awubla. Ṣigba todin, Isaki wá yiwanna Lebeka taun bọ ayajẹ etọn sọ gọwá.

Gẹnẹsisi 24:1-67.



Kanbiọ lẹ

  • Mẹnu wẹ sunnu po yọnnu po he tin to yẹdide ehe mẹ lẹ yin?
  • Etẹwẹ Ablaham wà nado mọ asi de na visunnu etọn, podọ etẹwutu?
  • Nawẹ odẹ̀ he devi Ablaham tọn hò mọ gblọndo gbọn?
  • Etẹwẹ yin gblọndo Lebeka tọn to whenuena e yin kinkanse eyin e jlo na dà Isaki?
  • Etẹwẹ hẹn ayajẹ Isaki tọn gọwá?

Kanbiọ devo lẹ

  • Hia Gẹnẹsisi 24:1-67.

    Jẹhẹnu dagbe tẹlẹ wẹ Lebeka dohia to whenuena e dukosọ hẹ devi Ablaham tọn to dotọ̀ kọ̀n? (Gẹn. 24:17-20; Howh. 31:17, 31)

    Apajlẹ dagbe tẹwẹ tito he Ablaham basi na Isaki lọ zedai na Klistiani lẹ to egbehe? (Gẹn. 24:37, 38; 1 Kọl. 7:39; 2 Kọl. 6:14)

    Naegbọn mí dona nọ dín whenu na ayihamẹlinlẹnpọn dile Isaki wà do? (Gẹn. 24:63; Ps. 77:12; Flp. 4:8)

Plọnnu Dogọ

Lebeka Jlo Na Hẹn Homẹ Jehovah Tọn Hùn

Nawẹ mí sọgan hodo apajlẹ Lebeka tọn gbọn? Hia otàn lọ bo plọn nususu gando ewọ go.