Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 15: Asi Lọti Tọn Pọ́n Godo

Otàn 15: Asi Lọti Tọn Pọ́n Godo

LỌTI po whẹndo etọn po nọpọ́ hẹ Ablaham to aigba Kenani tọn ji. To gbèdopo, Ablaham dọna Lọti dọmọ: ‘Tẹnmẹ he tin tofi ma pé na kanlin mítọn lẹ. Jaale, gbọ mí ni klan. Eyin hiẹ yì awà de ji, yẹn na yì awà awetọ ji.’

Lọti pọ́n aigba lọ lẹdo. E mọ fide to otò lọ mẹ he yọnwhanpẹ taun bo tindo osin po ogbé-mú susu po na kanlin etọn lẹ. Agbegbe Jọdani tọn wẹ. Enẹwutu Lọti sẹtẹnna whẹndo etọn po kanlin etọn lẹ po yì finẹ. Yé wá sawhé do tòdaho Sọdọmi tọn mẹ to godo mẹ.

Mẹhe nọ nọ̀ Sọdọmi lẹ nọ wà nuylankan taun. Ehe nọ hẹn homẹgble Lọti na mẹdagbe de wẹ ewọ. E sọ nọ hẹn homẹgble Jiwheyẹwhe lọsu. To godo mẹ, Jiwheyẹwhe do angẹli awe hlan nado na avase Lọti dọ emi na và Sọdọmi po tòdaho Gọmọla tọn he to yakẹ po na ylanwiwa yetọn wutu.

Angẹli lọ lẹ dọna Lọti dọmọ: ‘Yawu! Plan asi towe po viyọnnu towe awe lẹ po bo tọ́n sọn fi!’ Lọti po whẹndo etọn po dọngbàn nado yì, enẹwutu angẹli lọ lẹ hẹn alọ yetọn bo plan yé tọ́n sọn tòdaho lọ mẹ. Dopo to angẹli lọ lẹ mẹ sọ dọna yé dọmọ: ‘Mì họnyi nado whlẹn ogbẹ̀ mìtọn! Mì pọ́n godo blo! Mì họnyi osó lẹ ji na mì nikaa kú.’

Lọti po viyọnnu etọn lẹ po setonu bo họnyi sọn Sọdọmi. Yé ma tlẹ nọte depope, podọ yé ma pọ́n godo. Ṣigba asi Lọti tọn vẹtoli. To whenuena yé ko dẹn do Sọdọmi vude, e nọte bo pọ́n godo na e to nuhe e jodo lẹ flin wutu. To afọdopolọji, asi Lọti tọn lẹzun dòtin ojẹ̀ tọn. Be a mọ ẹn to yẹdide lọ mẹ ya?

Mí sọgan mọ nuplọnmẹ dagbe de yí sọn ehe mẹ. Nujijọ ehe dohia dọ Jiwheyẹwhe nọ whlẹn mẹhe setonuna ẹn lẹ, ṣigba mẹhe vẹtolina ẹn lẹ na hẹn ogbẹ̀ yetọn bu.

Gẹnẹsisi 13:5-13; 18:20-33; 19:1-29; Luku 17:28-32; 2 Pita 2:6-8.

Lọti to hinhọ̀n sọn Sọdọmi


Kanbiọ lẹ

  • Naegbọn Ablaham po Lọti po do klan?
  • Naegbọn Lọti de nado nọ Sọdọmi?
  • Gbẹtọ nankọ wẹ Sọdọminu lẹ yin?
  • Avase tẹwẹ angẹli awe delẹ na Lọti?
  • Naegbọn asi Lọti tọn lẹzun dòtin ojẹ̀ tọn?
  • Etẹwẹ mí sọgan plọn sọn nuhe jọ do asi Lọti tọn go mẹ?

Kanbiọ devo lẹ

  • Hia Gẹnẹsisi 13:5-13.

    Na nuhe dù nuhahun lẹ dididẹ to ode awetọ ṣẹnṣẹn, etẹwẹ mí sọgan plọn sọn Ablaham dè? (Gẹn. 13:8, 9; Lom. 12:10; Flp.2:3, 4)

  • Hia Gẹnẹsisi 18:20-33.

    Nawẹ aliho he mẹ Jehovah yinuwa hẹ Ablaham te na mí jide dọ Jehovah po Jesu po na dawhẹ to dodo mẹ gbọn? (Gẹn. 18:25, 26; Mat. 25:31-33)

  • Hia Gẹnẹsisi 19:1-29.

    Etẹwẹ kandai Biblu tọn ehe dohia gando pọndohlan Jiwheyẹwhe tọn go na nuhe dù zanhẹmẹ to omẹ vijinu dopolọ tọn lẹ ṣẹnṣẹn? (Gẹn. 19:5, 13; Lev. 20:13)

    Vogbingbọn tẹwẹ tin to aliho he mẹ Lọti po Ablaham po yinuwa hlan anademẹ Jiwheyẹwhe tọn te mẹ, podọ etẹwẹ mí sọgan plọn sọn ehe mẹ? (Gẹn. 19:15, 16, 19, 20; 22:3)

  • Hia Luku 17:28-32.

    Pọndohlan tẹwẹ asi Lọti tọn tindo gando agbasanu lẹ go, podọ nawẹ ehe yin avase de na mí gbọn? (Luku 12:15; 17:31, 32; Mat. 6:19-21, 25)

  • Hia 2 Pita 2:6-8.

    To apajlẹ Lọti tọn hihodo mẹ, nukun tẹwẹ mí dona nọ yí do pọ́n aihọn ylankan he lẹdo mí? (Ezek. 9:4; 1 Joh. 2:15-17)