Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Owe Ṣie He Bẹ Otàn Biblu Tọn lẹ Hẹn

Otàn 14: Jiwheyẹwhe Whlé Yise Ablaham Tọn Pọ́n

Otàn 14: Jiwheyẹwhe Whlé Yise Ablaham Tọn Pọ́n

BE A mọ nuhe Ablaham to wiwà tofi ya? Ohí de to alọ etọn mẹ, bọ e taidi dọ e jlo na hù visunnu etọn. Naegbọn e na do wàmọ? Jẹnukọn whẹ́, gbọ mí ni pọ́n lehe Ablaham po Sala po penugo nado ji visunnu yetọn do.

Ablaham to Isaki yí do sanvọ́

Flindọ Jiwheyẹwhe dopagbe na yé dọ yé na ji visunnu de. Ṣigba enẹ taidi nuhe ma yọnbasi, na Ablaham po Sala po ko poyọnho taun. Ṣogan, Ablaham yise dọ Jiwheyẹwhe sọgan wà nuhe tlẹ taidi nuhe ma yọnbasi. Nawẹ nulẹ wá yì do?

To whenuena Jiwheyẹwhe dopagbe lọ godo, owhe dopo blebu juwayi. Enẹgodo, to whenuena Ablaham ko tindo owhe 100 bọ Sala tindo owhe 90, yé ji visunnu de he nọ yin Isaki. Jiwheyẹwhe hẹn opagbe etọn di!

Ṣigba to whenuena Isaki whẹ́n, Jehovah whlé yise Ablaham tọn pọ́n. E ylọ ẹ bo dọmọ: ‘Ablaham!’ Ablaham sọ yigbe dọmọ: ‘Yẹn die!’ Enẹgodo Jiwheyẹwhe dọna ẹn dọmọ: ‘Yí visunnu towe, yèdọ Isaki, visunnu towe dopo akàn lọ bo yì osó he yẹn na dohia we ji. Eyin a jẹ finẹ, hù visunnu towe bo yí i do sanvọ́.’

Lehe hogbe enẹlẹ na ko hẹn Ablaham blawu do sọ, na e yiwanna visunnu etọn taun. Sọ flindọ Jiwheyẹwhe ko dopagbe dọ ovi Ablaham tọn lẹ na nọ aigba Kenani tọn ji. Ṣigba, nawẹ enẹ sọgan yọnbasi do eyin Isaki kú? Ablaham ma yọnẹn, ṣogan e setonuna Jiwheyẹwhe.

To whenuena Ablaham jẹ osó lọ ji, e blá Isaki bo ze e do agbà he e wleawuna lọ ji. Enẹgodo e de ohí tọ́n nado hù visunnu etọn. Ṣigba ojlẹ enẹ mẹ pẹpẹ wẹ Jiwheyẹwhe ylọ ẹ gbọn angẹli de gblamẹ bo dọmọ: ‘Ablaham, Ablaham!’ Ablaham sọ yigbe dọmọ: ‘Yẹn die!’

Jiwheyẹwhe dọmọ: ‘Ma gbleawuna visunnu lọ kavi wà nudepope na ẹn blo. Yẹn yọnẹn todin dọ hiẹ yí mi sè, na a ma whlẹn visunnu towe, yèdọ visunnu towe dopo akàn lọ do mi wutu.’

Lehe yise Ablaham tọn to Jiwheyẹwhe mẹ lodo do sọ! E yise dọ nude ma glo Jehovah, podọ Jehovah tlẹ sọgan fọ́n Isaki sọnku. Ṣigba na nugbo tọn, Jiwheyẹwhe ma jlo dọ Ablaham ni hù Isaki. Enẹwutu Jiwheyẹwhe hẹn azò lẹngbọ de tọn nado ján do zùnkan de mẹ sẹpọ finẹ bo dọna Ablaham nado yí i do sanvọ́ kakati nido yin visunnu etọn.

Gẹnẹsisi 21:1-7; 22:1-18.



Kanbiọ lẹ

  • Opagbe tẹwẹ Jiwheyẹwhe do na Ablaham, podọ nawẹ Jiwheyẹwhe hẹn opagbe etọn di gbọn?
  • Dile e yin didohia do to yẹdide lọ mẹ, nawẹ Jiwheyẹwhe whlé yise Ablaham tọn pọ́n gbọn?
  • Etẹwẹ Ablaham wà, dile etlẹ yindọ e ma mọnukunnujẹ nuhewutu Jiwheyẹwhe do degbena ẹn mẹ?
  • Etẹwẹ jọ to whenuena Ablaham de ohí tọ́n nado hù visunnu etọn?
  • Obá tẹ mẹ wẹ yise Ablaham tọn to Jiwheyẹwhe mẹ lodo jẹ?
  • Etẹwẹ Jiwheyẹwhe na Ablaham nado yí do sanvọ́, podọ gbọnna?

Kanbiọ devo lẹ

  • Hia Gẹnẹsisi 21:1-7.

    Naegbọn Ablaham do gbowhẹ kavi gboadà na visunnu etọn to azán ṣinatọ̀ntọ gbè? (Gẹn. 17:10-12; 21:4)

  • Hia Gẹnẹsisi 22:1-18.

    Nawẹ Isaki litaina otọ́ etọn Ablaham gbọn, podọ nawẹ ehe do nujijọ titengbe he na wá jọ to nukọn mẹ de hia gbọn? (Gẹn. 22:7-9; 1 Kọl. 5:7; Flp. 2:8, 9)

Plọnnu Dogọ

HODO APAJLẸ YISE YETỌN TỌN

Ablaham—“Otọ́ Mẹhe Tindo Yise” Lẹpo Tọn

Nawẹ Ablaham do yise hia gbọn? Aliho tẹlẹ mẹ wẹ hiẹ na jlo nado hodo apajlẹ yise Ablaham tọn te?